काठमाडौं- नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टी रोल्पाका स्थानीय नेता लालबहादुर वली ‘विश्व’ १ सय २७ दिनमापछि रिहा भएका छन्।
शुक्रबार सर्वोच्च अदालतले रिहा गर्न चौथोपटक आदेश दिएपछि उनी हिरासतमुक्त भएका हुन्।
राज्यले गैरन्यायिक तरिकाले थुनामा राखेको भन्दै तत्काल रिहाइको मागसहित उनका छोरा विनोद वलीले सर्वोच्चमा बन्दी प्रत्यक्षीकरणको रिट दायर गरेका थिए।
रिट निवेदनमाथि आइतबार भएको बहसमा न्यायाशीशहरु सपना प्रधान मल्ल र प्रकास ढुंगानाको संयुक्त इजलाशले वली अपराधिक कार्यमा संलग्न नरहेको ठहर गरेको थियो।
उनीमाथि प्रहरीले लगाएको आरोप पुष्टि नभएको भन्दै शुक्रबार सर्वोच्चले उनलाई रिहाइको आदेश दिएको हो। रोल्पाको गंगादेव गाउँपालिका-३ का स्थायी बासिन्दा वलीलाई प्रहरीले पटक-पटक पक्राउ गर्दै आएको थियो।
अदालतले उनलाई यसअघि तीनपटक रिहा गर्न आदेश दिए पनि प्रहरीले उनलाई तीनैपटक अदालत परिसरबाटै गिरफ्तार गरेको थियो।
गत बैसाख ६ गते उनलाई प्रहरीले दाङको राम्रीबाट गिरफ्तार गरेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।