काठमाडौं- नेपालले पहिलो पटक आयोजना गर्न गइरहेको ‘सगरमाथा संवाद’को प्रक्रिया अघि बढेको छ।
त्यसअन्तर्गत शुक्रबार परराष्ट्र मन्त्रालयमा निर्देशक समितिको पहिलो बैठक बसेको हो। पहिलो बैठकमा अवधारणात्मक विषयमा छलफल भएको मन्त्रालयका नीति योजना, विकास कूटनीति र प्रवासी नेपाली महाशाखाका प्रमुख सहसचिव कुमारराज खरेलले जानकारी दिए।
‘पहिलो बैठकमा कार्यक्रमको अवधारणा र पृष्ठभूमि के हो भन्ने बारेमा छलफल भयो,’ खरेलले बैठकबारे जानकारी दिँदै भने, ‘नेपालले भोग्नु परेका, प्रभाव पारिरहेका विश्वव्यापी मुद्दा र चासोका विषयहरुमा नेपालले आफ्ना अनुभव र उपलब्धिहरु सुनाउने र यस्ता मुद्दा एउटा देशले मात्रै समाधान नगर्ने भएकाले त्यसमा मतऐक्यता विकास गर्दै एउटा समाधान निकाल्न छलफलको स्थायी मञ्चका रुपमा यसलाई अघि सारिएको हो भन्ने निष्कर्षमा पुगियो।’
बैठकले सगरमाथा संवादको वृहत्तर विषय क्षेत्रभित्र समाजिक, आर्थिक, सांस्कृतिक र वातावरणीय मुद्दा रहने निर्धारण गरेको उनले बताए।
मन्त्रिपरिषद्को बैसाख २ गतेको बैठकले नेपालमा पहिलोपटक सगरमाथा संवाद आयोजना गर्ने निर्णय गरेको थियो। त्यस्तै, साउन ६ गते बसेको मन्त्रिपरिषद्को बैठकले संवाद आयोजना गर्न निर्देशक समिति र आयोजक समिति बनाएको थियो।
नीतिगत मार्ग दर्शन गर्ने निर्देशक समिति १० जनाको रहेको छ। निर्देशक समितिको संयोजक परराष्ट्रमन्त्री प्रदीप ज्ञवाली छन् भने अन्य सदस्यहरु अर्थमन्त्री युवराज खतिवडा, प्रधानमन्त्रीका परराष्ट्र मामिला सल्लाहाकार राजन भट्टराईं, राष्ट्रिय योजना आयोगकी सदस्य इशा झा, परराष्ट्र मन्त्रालयका सविच शंकरदास बैरागी, प्राध्यापक डा खड्ग केसी, पूर्व परराष्ट्र सविच ज्ञानचन्द्र आचार्य, संयुक्त राष्ट्र संघका पूर्वसहायक महासचिव कुलचन्द्र गौतम र कानुनविद् विपीन अधिकारी छन्।
समितिको सदस्य सचिवमा नीति आायोजना महाशाखा प्रमुख खरेल रहेका छन्। यसमा विषय विज्ञ र सरोकारवालालाई आमन्त्रण गर्न सकिने व्यवस्था समेत छ।
यस्तै, पराराष्ट्र मन्त्रीकै अध्यक्षतामा रहेको आयोजक समितिको बैठक पनि आइतबार बस्दैछ। आमन्त्रित सदस्यबाहेक २० जना रहने आयोजक समितिले कार्यक्रम आयोजनाका लागि व्यवस्थापकीय निर्णय गर्ने खरेलले जानकारी दिए।
संवादको ढाँचा
संवादको पहिलो शृखंला सन् २०२० को मार्च महिनाको अन्तिमतिर आयोजना गरिनेछ। ‘जलवायु परिवर्तन र हिमाल’का विषयमा संवादको पहिलो शृंखला केन्द्रित हुनेछ।
कार्यक्रमको ढाँचाबारे अन्तिम टुंगो नलागे पनि यसमा खुल्लारुपमा कुरा राख्ने, सुन्ने र टिप्पणी गर्न सकिनेछ। ‘यो सुरुवाती चरणमा छ र यो टुंगो लागिसकेको छैन,’ कार्यक्रमको ढाँचाबारे जानकारी दिँदै खरेलले भने, ‘यसमा कार्यशालमा जस्तो कार्यपत्र प्रस्तुत गर्ने र टिप्पणी गर्ने हुँदैन। योे खुल्लारुपमा कुरा राख्ने, सुन्ने र टिप्पणी गर्ने कार्यक्रम हो।’
कार्यक्रममा करिब २ सयको हाराहारीमा अतिथिहरु बोलाइनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
