जनकपुर- जनकपुरस्थित एक निजी कलेजको विज्ञापनमा प्रदेश २ का मुख्यमन्त्री लालबाबु राउत र सामाजिक विकास मन्त्री नवल किशोर साहको फोटोसमेत राखेर एक राष्ट्रिय दैनिकमा प्रकाशन गरेपछि सरकारको आलोचना सुरु भएको छ।
मुख्यमन्त्री र समाजिक विकास मन्त्रीले पदीय मर्यादा बिर्सेर निजी कलेजको प्रचारप्रसारमा लागेको भन्दै आलोचना भइरहेको हो।
जनकपुरस्थित मोडेल मल्टिपल कलेजकी छात्रा आँचल कुमारी कक्षा १२ को विज्ञान संकायतर्फ उत्कृष्ट नतिजासहित उत्तीर्ण भएको भन्दै मुख्यमन्त्री राउत र मन्त्री साहले आफूहरुलाई गौरवान्वित बनाएको भन्दै भदौ १ गतेको कान्तिपुर दैनिकको प्रथम पृष्ठमै कलेजको फोटोसहित शुभकामना विज्ञापन प्रकाशन गरेका थिए।
विज्ञापन प्रकाशनपश्चात् जनकपुरमा चौतर्फी प्रदेश सरकार र मुख्यमन्त्रीको टिप्पणी हुन थालेको छ।
सरकारी कलेज र विश्वविद्यालयलाई बेवास्ता गरी निजी कलेजलाई प्रदेश सरकारले प्रोत्साहन गरेको भन्दै प्रतिपक्षी दल नेकपा र नेपाली कांग्रेस लगायत स्थानीय बुद्धिजीविले असन्तुष्टि व्यक्त गरेका छन्।
नेपालीका कांग्रेस सांसद शिवचन्द्र चौधरीले सरकारले शिक्षामा सुधारका लागि कुनै ठोस योजना ल्याउन नसकेको अवस्थामा सरकारी पैसा निजी कलेजको प्रचारमा खर्चिनु कुनै हिसाबले राम्रो नभएको बताए। ‘विद्यार्थीले राम्रो गर्यो ठिक छ तर त्यसमा मुख्यमन्त्रीको के योगदान? विज्ञापनमा मुख्यमन्त्री, मन्त्री र कलेजको फोटो छाप्नु गलत हो,' उनले भने, 'यो सरकारी धन लुटाउने प्रवृत्तिबाहेक अरु केही होइन।’ सरकार निकट व्यक्तिको समेत सेयर भएकाले उक्त निजी कलेजको प्रचारमा जोड दिइएको उनको तर्क छ।
त्यसैगरी जनकपुरका बुद्धिजीवी परमेश्वर कापरले सरकारी कलेजलाई बेवास्ता गरी निजी कलेजको प्रचारमा सरकार लागेको आरोप लगाए। ‘मुख्यमन्त्रीले समग्रमा सबै विद्यार्थीलाई शुभकामना दिनुपर्थ्यो, तर उनमा काखा–पाखाको प्रवृत्ति देखियो,' उनको प्रतिक्रिया छ।
त्यस्तै नेकपाका सांसद दिलीप साहले मुख्यमन्त्री राउत र मन्त्री साहले पदीय मर्यादाविपरीत सरकारी कलेज र विद्यार्थीलाई निरुत्साहित गरेको आरोप लगाएका छन्।
‘मुख्यमन्त्रीले समग्र प्रदेशका विद्यार्थीलाई शुभकामना दिई मनोबल बढाउनुपर्थ्यो,’ सांसद साहले भने, ‘तर, उक्त विज्ञापनबाट सरकारले निजी कलेजलाई प्रोत्साहन र सरकारीलाई निरुत्साहित गरेको प्रस्ट हुन्छ।’
आलोचना भइरहेको उक्त विज्ञापनबारे मुख्यमन्त्री कार्यालयले अहिलेसम्म कुनै प्रतिक्रिया बाहिर ल्याएको छैन।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।