काठमाडौं- वाम गठबन्धनका शीर्ष नेताले पार्टी एकता र नयाँ सरकार गठनका विषयमा छलफल गरेका छन्।
ललितपुरको मानभवनस्थित एक गोप्य स्थानमा गरिएको छलफलमा पार्टी एकतालाई निष्कर्षमा पुर्याउन थप गृहकार्य गर्ने सहमति भएको छ। एकता प्रक्रिया लम्बिँदै जाँदा थप राजनीतिक जटिलता पैदा हुने भन्दै एमाले अध्यक्ष केपी ओली र माओवादी केन्द्रका अध्यक्ष पुष्पकमल दाहाल 'प्रचण्ड' छलफलमा जुटेका थिए।
दुई नेताबीच राष्ट्रियसभाको निर्वाचनमा वामपन्थी उम्मेदवारलाई जिताउने सहमति भएको माओवादी अध्यक्ष दाहालको निजी सचिवालयले जनाएको छ।
एकीकृत पार्टीको नेतृत्वको विषयमा वाम गठबन्धनभित्र सहमति जुट्न सकेको छैन। नयाँ बन्ने सरकारको नेतृत्व एमाले अध्यक्ष केपी ओलीलाई दिन माओवादी केन्द्र सहमत छ। तर, सरकारको नेतृत्व एमालेले गरे एकीकृत पार्टीको नेतृत्व दाहालले गर्न पाउनुपर्ने माओवादी केन्द्रले अडान लिएको छ। सोही कारण दुई पार्टीबीचको एकता प्रक्रिया लम्बिँदै गएको छ।
दुई पार्टी एकीकरण प्रक्रियामा जाँदै गर्दा अन्तर्राष्ट्रिय शक्तिहरु त्यस विरुद्ध उत्रिएको वाम गठबन्धनका शीर्ष नेताले बताउँदै आएका छन्। प्रदेश तथा प्रतिनिधिसभा निर्वाचन हुँदै राष्ट्रियसभाको निर्वाचनसम्म सहकार्य गर्दै आएका दुवै वाम पार्टीले नयाँ सरकार गठन अगाडि नै एकीकरण प्रक्रियालाई टुंग्याउने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
