काठमाडौं- मधेसकेन्द्रित राजनीतिक दलले प्रदेश नम्बर २ मा सरकार गठनका लागि वार्ता र छलफललाई तीव्रता दिएका छन्।
प्रदेश सरकारका लागि गठजोडमा रहेका संघीय समाजवादी फोरम र राष्ट्रिय जनता पार्टी (राजपा) नेपालले पदीय भागबन्डाका विषयमा अनौपचारिक रुपमा केही खाका तयार पारे पनि त्यसलाई मूर्तरुप भने दिन सकेका छैनन्।
मुख्यमन्त्री, सभामुखलगायतका पद बाँडफाँटबारे छलफल चलिरहेको तर ठोस सहमतिमा पुग्न नसकेको ती दलका नेताहरु बताउँछन्।
दुवै दलले आगामी माघ २१ गते बोलाइएको प्रदेशसभा बैठक लगत्तै सरकार गठनको प्रक्रिया सुरु गर्ने जनाएका छन्। समानुपातिकतर्फको प्रदेश सांसदको निर्वाचन परिणाम आइसकेपछि सरकार गठनबारे अनौपचारिक छलफलमा दुवै दल जुटेका छन्।
प्रदेशसभा बैठकलगत्तै मुख्यमन्त्री, सभामुख चयनलगायतका प्रक्रिया अघि बढ्ने राजपाका महासचिव मनिष सुमनले जानकारी दिए।
'प्रदेश सांसदको निर्वाचन परिणाम घोषणा भएपछि प्रदेश सरकार गठनबारे औपचारिक छलफल त भएको छैन तर आगामी प्रदेश बैठकपछि सरकार गठनको रफ्तार सुरु हुन्छ', उनले भने।
संविधानमा व्यवस्था भए अनुसार प्रदेश सांसदको निर्वाचन परिणाम सार्वजनिक भएको ३० दिनभित्र प्रदेश सरकार गठन गर्नुपर्ने छ। निर्वाचन आयोगले गत माघ ३ गते प्रदेशसभाका समानुपातिक उम्मेदवारको अन्तिम सूची प्रकाशित गरेको थियो।
कुल १०७ सिट संख्या रहेको प्रदेश नम्बर २ मा राजपा फोरमको बहुमत छ। समाजवादी फोरमको २९ र राजपाको २५ सिट छ। यीमध्ये कुन दलले कस्तो जिम्मेवारी लिने भन्नेमा दुवै दलमा भागबन्डा सुरु भएको छ।
कुन दलले के जिम्मेवारी लिने भन्ने पदीय भागबन्डापछि मात्र सरकार गठनको प्रक्रिया सुरु हुने समाजवादी फोरमका नेता शिवजी यादवले बताए। उनका अनुसार, सिट संख्याका आधारमा फोरमले मुख्यमन्त्री र राजपाले सभामुख पाउने लगभग पक्का छ, अन्य पदमा भने छलफल चलिरहेको छ।
प्रदेश बैठकपछि सरकार गठनको प्रक्रिया सुरु हुने हुँदा सो अवधिसम्म दलीय भागबन्डा मिलिसक्ने उनको भनाइ छ। प्रदेश प्रमुखले प्रदेशसभामा बहुमत प्राप्त संसदीय दलको नेतालाई मुख्यमन्त्री नियुक्त गर्नेछ र निजको अध्यक्षतामा प्रदेश मन्त्रिपरिषद्को गठन हुनेछ।
प्रदेशसभामा कुनै पनि दलको स्पष्ट बहुमत नरहेको अवस्थामा प्रदेशसभामा प्रतिनिधित्व गर्ने दुई वा दुईभन्दा बढी दलको समर्थनमा बहुमत प्राप्त गर्न सक्ने प्रदेशसभाको सदस्यलाई प्रदेश प्रमुखले मुख्यमन्त्री नियुक्त गर्नेछ।
प्रदेश नम्बर २ मा मधेसकेन्द्रित दलको पल्लामा भारी मत रहेकाले उनीहरुको बहुमतको सरकार बन्ने निश्चित छ। सो प्रदेशलाई विकास र समृद्धिको दिशामा अघि बढाउन ठूलो जिम्मेवारी मधेसकेन्द्रित दलको काँधमा छ।
यद्यपि, आफ्ना न्यूनतम साझा कार्यक्रममा सहमत हुने अन्य राजनीतिक दललाई सरकारमा सहकार्य गर्न आवश्यक पहल गरिने नेताहरुले बताएका छन्।
राजपाका महासचिव सुमनका अनुसार, राष्ट्रिय निर्वाचनमा नेपाली कांग्रेससँग सहकार्य गर्ने निर्णय भएकाले ऊसँग सहकार्य हुन सक्नेछ। मधेसका मुद्दाप्रति वाम गठबन्धनले सहमत जनाएको खण्डमा उनीहरुसँग पनि सरकार गठनमा सहकार्य हुनेछ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
