काठमाडौं- नेपाल वायुसेवा निगमका कर्मचारी नै सुनको अवैध कारोबारमा संलग्न रहेको भेटिएको छ। निगममा कार्यरत कमलनारायण विश्वासलाई त्रिभुवन अन्तर्राष्ट्रिय विमानस्थल भन्सार कार्यालयले अवैध सुनसहित पक्राउ गरेसँगै यो रहस्य खुलेको हो।
साउन २२ गते मलेसियन एयरको 'एमएच-०१७०' उडानमार्फत क्वालालाम्पुरबाट काठमाडौं आएका विश्वासले आफ्नो साथमा २०० ग्राम (करिब १७ तोला) अवैध सुन ल्याएको विमानस्थल भन्सार स्रोतले जानकारी दिएको छ। विश्वासले ५० ग्रामका ४ वटा सुनका बाला हातमा लगाएर ल्याएका थिए। भन्सारले विश्वाससँगै ११ लाख ९० हजार रुपैयाँ पर्ने सुनका बाला नियन्त्रणमा लिएको छ।
एउटा बाला देखिने गरी र बाँकी ३ वटा बाला कपडाले छोपिने गरी लगाएको अवस्थामा भन्सारले विश्वासलाई नियन्त्रणमा लिएको हो। 'कानुनअनुसार एउटा मात्रै बाला लगाएर आउन पाइन्छ, तर निगमकै कर्मचारीले ४ वटा बाला लगाएर आउनु त जानबुझ गलत गर्न खोजेको प्रष्ट हुन्छ,' विमानस्थल स्रोतले भन्यो।
भन्सारले विश्वासलाई नियन्त्रणमा लिएर थप कारबाही अघि बढाएको छ। स्रोतका अनुसार विश्वासमाथिको अनुसन्धान अघि बढाउन ७ दिन म्याद थपिएको छ। 'हामी अनुसन्धाको अन्तिम चरणमा छौँ,' स्रोतले भन्यो, 'यो विषयमा तयार भएको प्रारम्भिक प्रतिवेदन पनि अध्ययन भइरहेको छ।'
भन्सार प्रशासनले अध्ययनका क्रममा विश्वाससँग ३ दिन बयान लिएको थियो। बयान र अनुसन्धानले विश्वास यसअघि पनि त्यस्तै गतिविधिमा संलग्न रहेको पाइएको स्रोतले दाबी गरेको छ। 'एकपटक चुरोट र अर्को एक पटक यस्तै वस्तुको अवैध कारोबारमा संलग्न रहेको भेटिएको छ,' भन्सार स्रोतले भन्यो, 'अहिलेसम्मको विवरण हेर्दा उनले पटक-पटक यस्तै अवैध कारोबार गरेको भेटिएको छ।'
विश्वास निगमको ग्राउन्ड अपरेटरको रुपमा कार्यरत छन्। विमानस्थल भन्सारका अधिकारीहरु वायुसेवा सञ्चालककै कर्मचारीहरुबाट कानुन विपरीतका काम बेलाबखत हुने गरेको बताउँछन्। 'हाम्रोमा कस्तो कानुन कार्यान्वयन भइरहेको छ भन्ने बारेमा सबैभन्दा जानकार उनीहरु नै हुन्छन् र उनीहरुबाटै कानुनको उल्लंघन भइरहेको छ,' स्रोतले भन्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
