काठमाडौं- नेपाल आयल निगमको जग्गा खरिद गर्दा भ्रष्टाचार भएको घटनामा अख्तियार दुरुपयोग अनुसन्धान आयोगले तत्कालीन आपूर्ति सचिव प्रेमकुमार राईसँग पनि बयान लिने भएको छ।
निगमको जग्गा खरिदमा भ्रष्टाचार काण्डमा परेका पूर्व कार्यकारी निर्देशक गोपालबहादुर खड्कासँग आयोगले मंगलबारदेखि बयान लिन सुरु गरेको छ। भ्रष्टाचार काण्डमा तत्कालीन सचिव राईको पनि भूमिका देखिएकाले बुधबार बयानका लागि बोलाइएको अख्तियार स्रोतले बतायो। राई हाल प्रधानमन्त्री कार्यालयमा सचिवका रुपमा छन्।
निगमको सञ्चालक समितिको अध्यक्षको रुपमा राईको भूमिका समेत जग्गा खरिदमा देखिएपछि बयानमा बोलाइएको अख्तियारका प्रवक्ता पदमप्रसाद पाण्डेयले बताए।
भ्रष्टाचार काण्डका मुछिएपछि कारबाहीस्वरुप निगमबाट आपूर्ति मन्त्रालयमा तानिएका खड्कासँग अख्तियारले मंगलबार बयान सुरु गरेको थियो। जग्गा विवाद आएपछि राई पनि आपूर्ति मन्त्रालयबाट तानिएर प्रधानमन्त्री कार्यालयमा जगेडा सचिवको रुपमा कार्यरत छन्।
अख्तियारका प्रवक्ता पाण्डेयले खड्का राईको बयान बुधबार नसकिए केही दिन निरन्तर चल्ने बताए। खड्का र राईपछि यस प्रकरणमा जोडिएका अन्य व्यक्तिहरुको बयान लिने अख्तियारको तयारी छ।
अख्तियारले उनीहरुसँग निगमले चलनचल्तीभन्दा महँगो दरमा जग्गा खरिद गर्नु, सार्वजनिक खरिद नियमावलीको प्रक्रिया मिच्नु र सार्वजनिक निकायका लागि आवश्यक जग्गा अधिग्ररण गर्ने प्रक्रिया अवलम्बन नगर्नु आदिको कारणबारे बयान लिनेछ। जग्गा खरिदमा १ अर्ब ६१ करोड रुपैयाँ भ्रष्टाचार गरेको संसदीय समितिहरुको अनुगमनमा देखिएको थियो।
सरकारले निगमको कार्यकारी निर्देशकबाट गत असोज २ गते बर्खास्त गरे पनि सर्वोच्च अदालतको आदेशले असोज २२ मा पुनर्वहाली भएपछि खड्का आपूर्ति मन्त्रालयमा हाजिर हुँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
