काठमाडौं- गाउँका २ सयभन्दा धेरै चेलीलाई भारतका वेश्यालयमा लगेर बिक्री गरेका नुवाकोटका वडाध्यक्ष सुनबहादुर तामाङ सर्वोच्च अदालत पुगेका छन्।
चेलिबेटी बेचबिखन मुद्दामा जिल्ला अदालत काठमाडौंले धरौटीमा छोडे पनि केन्द्रीय अनुसन्धान ब्युरो (सिआइबी) ले पक्राउ गरेपछि त्यसविरुद्ध बन्दी प्रत्यक्षीकरणको मुद्दा लिएर उनी सर्वोच्च पुगेका हुन्।
सुनबहादुरको हकमा प्रदीप तमाङले मंगलबार सर्वोच्चमा निवेदन दर्ता गराएका थिए। उनको बन्दी मुद्दामा सर्वोच्चले आज सुनुवाइ गर्दैछ। सुनबहादुरको मुद्दा न्यायाधीश तेजबहादुर केसीको एकल इजलाशमा पेशी तोकिएको छ।
चेलिबेटी बेचविखन जस्तो गम्भीर अपराधमा पक्राउ परेका तामाङलाई माघ ७ गते अदालतले धरौटीमा छाड्ने आदेश दिएको थियो। उनी गत आइतबार काठमाडौं जिल्ला अदालतको आदेशपछि ५ लाख रुपैयाँ धरौटीमा रिहा भएका थिए। लगत्तै सिआइबीले अर्को मुद्दामा अनुसन्धान गर्नुपर्ने भन्दै पक्राउ गरेको थियो। पक्राउ नगरेमा पुन: भारततिर भाग्ने अवस्था देखिएको भन्दै सिआइबीले तत्कालै नियन्त्रणमा लिएको थियो।
जिल्लाले थुनछेक आदेश गर्दै धरौटीमा रिहा गरे पनि प्रहरीले गैरकानुनी रुपमा पक्राउ गरेको दाबी तामाङका आफन्तको छ। जिल्ला अदालतमा मुद्दा विचाराधीन हुँदाहुँदै पक्राउ गर्नु गैरकानुनी भएको दाबी उनीहरुले गरेका छन्।
प्रहरीको अनुसन्धानमा उनले गाउँका २ सयभन्दा धेरै चेलीहरु बम्बई तथा दिल्लीका वेश्यालयहरुमा लगेर बिक्री गरेको खुलेको थियो। एक महिलासँग मिलेर उनी आफैंले पनि दिल्ली र मुम्बईमा वेश्यालय चलाउँदै आएको प्रहरीको प्रारम्भिक अनुसन्धानमा पाइएको छ।
१५ वर्ष कैद सजाय माग गरी मुद्दा दायर गरेकोमा उनलाई धरौटीमा छाड्ने आदेश भएपछि अनुसन्धानमा आबद्ध प्रहरी अधिकारीहरु आश्चर्यमा परेका छन्।
पैसा र 'पावर'का सुनबहादुर
सुनबहादुर २०५१ सालदेखि नै मानव बेचबिखनमा संलग्न व्यक्ति हुन्। २०५१ सालमा झापा हुँदै केही युवतीलाई भारत लैजाने क्रममा उनीविरुद्ध मुद्दा दायर भएको थियो।
तर, फरार रहँदै आएका उनले चेलीबेटी ओसारपसारको धन्दा जारी राखेका थिए। २०७१ सालमा पनि उनीविरुद्ध नुवाकोट जिल्ला अदालतमा मुद्दा दायर भएको थियो। त्यो मुद्दामा पनि उनी धरौटीमा छुटेका थिए।
वेश्यालय चलाएर प्रशस्त पैसा कमाएका उनले त्यही पैसाको बलमा नेताहरुलाई समेत आफ्नो हातमा लिएका छन्। पैसाकै बलमा नेपाली कांग्रेसबाट उनले वडा अध्यक्षको टिकट पाई चुनाव जितेका थिए। गाउँमा आफ्नोविरुद्ध बोल्नेहरुलाई उनले गाउँमै बस्न नदिने गरेको स्थानीयले बताएका छन्।
२०५१ सालकै मुद्दामा उनलाई अदालतले ६ वर्ष कैद सजाय सुनाइसकेको छ। नयाँ मुद्दामा अदालतले धरौटीमा छाड्ने आदेश दिएपनि उनी पुरानो मुद्दामा जेल बस्नुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
