जनकपुर- सञ्चार तथा सूचना, प्रविधि मन्त्री गोकुल प्रसाद बाँस्कोटाले आफ्नो अधिकार क्षेत्रभित्र बसेर काम गर्न प्रदेश सरकारहरुलाई सुझाव दिएका छन्।
जनकपुरस्थित नेपाल पत्रकार महासंघ धनुषाको सभाकक्षमा आज आयोजित पत्रकार भेटघाट कार्यक्रममा मन्त्री बाँस्कोटाले भने, ‘कसको के अधिकार छ त्यो सबै संविधानमा स्पष्ट व्यवस्था गरिएको छ। प्रदेश सरकारले एक स्टेप अगाडि बढेर काम गर्न नखोजोस्।'
मन्त्री बाँस्कोटाले केपी ओली नेतृत्वको सरकार ५ वर्षसम्म परिवर्तन नहुने ठोकुवासमेत गरे। उनले वर्तमान सरकारले प्रगति, सामाजिक न्याय र अग्रगतिलाई विशेष मुद्दा बनाइसकेका कारण अबको ५ वर्षसम्म सरकारले विकासलाई नै मुख्य केन्द्र बनाएर अघि बढ्ने बताए।
मन्त्री बाँस्कोटाले यो सरकार स्थायी सरकार भएको जिकिर गर्दै संघ, प्रदेश र स्थानीय सरकारले चुनावमा गरेको वाचा अब पूरा गर्नुपर्ने बेला आएको स्मरण गरे।
बाँस्कोटाले श्रम, उत्पादन, रोजगारी, कृषिलगायत सबै क्षेत्रमा गति र मानक पैदा गर्नुपर्ने बेला आएको भन्दै यसमा सबैको सहयोग आवश्यक रहेको जिकिर गरे। उनले अरुलाई दोष दिएर नहुने बताउँदै तीनै तहका सरकारले संविधानले तोकेका जिम्मेवारी तथा चुनावको बेला गरेको प्रतिबद्धता पूरा गर्न इमानदारीपूर्वक भूमिका निर्वाह गर्न जरुरी रहेको धारणा राखे।
पत्रकार महासंघ धनुषाका अध्यक्ष अनिल मिश्रको अध्यक्षतामा सम्पन्न भेटघाट कार्यक्रममा उनले जनताको इच्छा र सरकारको कामबारे निष्पक्ष भएर कलम चलाउन सञ्चारकर्मीलाई सुझाए।
उनले सञ्चारकर्मीलाई पूर्वाग्रही भएर कलम नचलाउन आग्रह गर्दै भने, ‘राम्रोलाई राम्रो र नराम्रोलाई नराम्रो भन्नुस्। तर, तथ्यपरक हिसाबले।’
मन्त्री बाँस्कोटा स्मार्ट विद्यालयको उद्घाटन गर्न सोमबार जनकपुुर आइपुगेका हुन्। सञ्चार तथा सूचना, प्रविधि मन्त्रालयले सूचना प्रविधिमैत्री विद्यालय बनाउने अभियानअन्तर्गत जनकपुरधामस्थित संकट मोचन देवशरण रामरति माध्यमिक विद्यालयलाई सूचना प्रविधि विद्यालयको रुपमा रुपान्तरण गरिएको छ। सो विद्यालयको सोमबार मन्त्री बाँस्कोटोले उद्घाटन गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
