भैरहवा- रुपन्देहीमा सञ्चालित पाँचतारे होटल टाइगर प्यालेस रिसोर्ट (टाइगर वान प्रालि)ले अदालतको आदेशविपरीत बिक्री प्रक्रिया अगाडि बढाएको छ। सरकारी जग्गा अतिक्रमण गरी रुपन्देहीको तिलोत्तमा नगरपालिका-१३, कोटिहवामा निर्माण गरिएको भनिएको उक्त रिसोर्टले जिल्ला अदातल रुपन्देहीको आदेशको अवज्ञा गर्दै रिसोर्ट बिक्रीको प्रक्रिया अगाडि बढाएको हो।
सरकारी जग्गामा रिसोर्टका कतिपय संरचना निर्माण गरेको भन्दै रिसोर्टविरुद्ध जिल्ला अदालत रुपन्देहीमा मुद्दा दायर भएको थियो।
रिसोर्टले भैरहवा लुम्बिनी भूमिगत जल (भैलुभुज)को करिब १० कठ्ठा भन्दा बढी जग्गा (सार्वजनिक कुलो तथा नहर) अतिक्रमण गरी संरचना निर्माण गरिएको दाबी गरिएको छ। तत्कालीन भैलुभुज परियोजनाअन्तर्गत नलकुप जल उपभोक्ता संघ रुपन्देहीका अध्यक्ष थानेश्वर घिमिरेले 'सरकारी सम्पत्तिमा निर्मित संरचना भत्काई सरकारी सम्पत्तिको संरक्षण गरी पाऊँ' भनी रुपन्देही जिल्ला अदालतमा मुद्दा दायर गरेका थिए।
रिसोर्टले रुपन्देहीको साविक टिकुलीगढ ९ ‘घ’ (हाल तिलोत्तमा नगरपालिका-१३) स्थित नहरको (नलकुप)को कित्ता नम्बर १२०, १४८, १५२ र १९० तथा कित्ता नम्बर ७३ को सरकारी जग्गामा कमाउन्ड लगाई होटलका संरचना निर्माण गरी भोगचलन गर्दै आएको दाबी रिटमा गरिएको छ।
तत्कालीन भैरहवा लुम्बिनी भूमिगत जल (भैलुभुज) परियोजनाको करिब १० कठ्ठा १८ धुर सार्वजनिक जग्गा मिचेर निर्माण गरिएको भन्दै रिसोर्टविरुद्ध रुपन्देही जिल्ला अदालतले गत असार २० गते सुनुवाइ गर्दै रिसोर्टको संरचना तथा सम्पत्ति बिक्रीवितरण नगर्नु-नगराउनु भनी अन्तरकालीन आदेश जारी गरेको थियो।
मुद्दाको प्रारम्भिक सुनुवाई गर्दै तत्कालीन एक नम्बर इजलासका न्यायधीश नरिश्वर भण्डारीले प्रतिवादीको नाममा 'मुलुकी देवानी कार्यविधि संहिता २०७४' को दफा १५६ बमोजिम अन्तरकालीन आदेश जारी गरेका थिए।
'मुद्दाको अन्तिम टुङ्गो नलागेसम्म सार्वजनिक तथा सरकारी कित्ताका जग्गा र तीसँग जोडिएका अन्य कित्तामा समेत संरचना निर्माण, बेचबिखन तथा दृष्टिबन्धक लगायतका कुनै पनि काम नगर्नु-नगराउनु' भन्ने आदेशमा उल्लेख छ। अदालतले रिसोर्टलाई बाटोको म्यादबाहेक २१ दिने सूचना जारी गर्दै अदालतमा हाजिर हुन पत्राचार गरेको थियो।
टाइगर प्यालेस रिसोर्ट अस्ट्रेलियाको सिड्नी स्टक एक्सचेन्जमा सूचिकृत तथा हङकङमा कार्यालय रहेको सिल्भर हेरिटेज ग्रुपको चेन होटल हो। उक्त ग्रुपले रिसोर्टका विरुद्धमा मुद्दा परेको र आफूहरु कानुनी प्रक्रियामा सामेल हुने गत जुलाई ११ मा जारी विज्ञप्तिमा उल्लेख गरेको छ।
यस्तो छ विज्ञप्तिः
तर, सो समयसीमा भित्रमा रिसोर्ट पक्ष अदालतमा उपस्थित नभएको बुझिएको छ। उक्त मुद्दालाई हाल तामेलीमा राखिएको रुपन्देही जिल्ला अदालतका श्रेष्तेदार नेत्र भुसालले जानकारी दिए।
तर, मुद्दाको टुङ्गो नलाग्दै सिल्भर हेरिटेज ग्रुपले आफ्नो स्वामित्वमा रहेको टाइगर प्यालेस रिसोर्टको मलेसियाका गैरआवासीय नेपाली इन्द्रबहादुर थापासँग खरिदबिक्री प्रक्रिया अघि बढेको आफ्नो वेबसाइटमा उल्लेख गरेको छ। वेबसाइटमा उल्लेखित विवरणअनुसार खरिदकर्ता थापाको तर्फबाट आई हग होम्स कम्पनीले खरिद प्रक्रिया अघि बढाएको छ।
वेबसाइटमा राखिएको प्रारम्भिक सम्झौता पत्रअनुसार थापाले ३३ दशमलब ९ मिलियन डलर खरिद गर्न लागेको जनाएको छ। कम्पनीले थापालाई बैना वापतको ३ मिलियन अमेरिकी डलर जम्मा गर्नका लागि १५ अगस्टसम्मको समयसमेत दिएको छ।
बैना भएको ९० दिनसम्ममा रिसोर्ट किनबेचको प्रक्रिया पूरा हुने पनि ग्रुपले स्पष्ट पारेको छ।
रिसोर्ट बिक्रीका सम्बन्धमा जारी गरिएको सूचनाः
रिसोर्ट खरिदका लागि नेपालका व्यापारिक घराना विशाल ग्रुप, आइएमआई ग्रुप, चौधरी ग्रुपले चासो देखाएका थिए। तर, यी घरानालाई पछि पार्दै थापाले रिसोर्ट खरिद गर्न लागेका हुन्।
अदालतले बिक्रीमा रोक लगाएको अवस्थामा रिसोर्टले अटेर गर्दै बिक्री प्रक्रियालाई अघि बढाएको हो।
रिसोर्ट सञ्चालनमा आएदेखि नै स्थानीयको माग र आग्रहलई बेवास्ता गर्दै होटलले सार्वजनिक जग्गा मिचेर संरचना निर्माण गरेको थियो। सञ्चालनमा आएको छोटो समयमा नै होटलका साझेदारबीच विवाद लगायतका कारण स्टक मार्केटमा कम्पनीको 'भ्यालू' ओरालो लाग्दै गएको थियो भने स्थानीयसँग गरेको समझदारी रिसोर्टले कार्यान्वयन गरेको थिएन। जसका कारण रिसोर्ट सञ्चालनमा पटक-पटक अवरोध आएपछि कम्पनीले रिसोर्ट बिक्री गर्नतर्फ लागेको बताइएको छ।
यता जिल्ला अदालतमा मुद्दा दायर गरेको लुम्बिनी नलकुप जल उपभोक्ता समितिले जिल्ला अदालतको अन्तरकालीन आदेश नै चित्त नबुझेको भन्दै फेरि उच्च अदालत तुल्सीपुर, बुटवल इजलासमा रिट दायर गरेको छ। सार्वजनिक सम्पत्ति फिर्ता नगरेसम्म होटलको सम्पूर्ण सम्पत्ति नै रोक्काको मागदाबी गर्दै पुनः रिट दायर गरिएको उपभोक्ता समितिले जनाएको छ।
होटलले मिचेको नहरको जग्गामध्ये १५२ नम्बर कित्तामा स्विमिङ पुल र क्यासिनो भवनको केही भाग पनि कुलोको जग्गामा पर्ने लुम्बिनी नलकुप जल उपभोक्ता समिति रुपन्देहीका सचिव अवध बिहारी दुवेले दाबी गरे। (तस्बिर- फोर्ब्स्)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
