काठमाडौं- सरकारले सवारी आयातकर्ताहरुलाई आफूले गाडी खरिद गरेको मूल्य र अधिकतम खुद्रा बिक्री मूल्य (एमआरपी)समेत सार्वजनिकरुपमा प्रकाशन गर्न दिएको निर्देशन व्यवसायीहरुले लत्याएका छन्।
भन्सार विभागले साउन ७ गते सबै सवारी आयातकर्तालाई ‘फर्म्याट’सहितको पत्रमार्फत खरिद र बिक्री दुवै मूल्य प्रकाशित गर्न भनेको थियो।
तर, सबैजसो व्यवसायीहरुले खरिद मूल्य र बिक्री मूल्य एकै राखेर प्रकाशित गरेको पाइएको छ। नेपालका लागि महिन्द्रा गाडीको आधिकारिक बिक्रेता अग्नि इनकर्पोरेटेडबाहेक सबैले खरिद र बिक्री मूल्य दुवै एउटै प्रकाशित गरी सरकारको आँखामा छारो हाल्ने काम गरेका छन्।
भन्सार विभागले विदेशबाट मालवस्तु पैठारी गर्दा भन्सारमा मूल्य घोषणा गर्नुअगाडि त्यस्ता मालवस्तुको राष्ट्रियस्तरको दैनिक पत्रिकामा अधिकतम खुद्रा बिक्री मूल्य प्रकाशित गर्नुपर्ने व्यवस्था भएअनुसार 'भन्सार मूल्यांकन निर्देशिका, २०६८' (पहिलो संशोधन २०७२)को अनुसूची ५ मा भएको ढाँचा सवारी आयातकर्ताहरुलाई उपलब्ध गराएको थियो।
भन्सारले उपलब्ध गराएको नयाँ ढाँचामा मालवस्तुको मूल्य, आकारप्रकार, ब्रान्ड, मोडल, क्षमता, उत्पतिको राष्ट्र, इकाई, प्रतिइकाई मूल्य र एमआरपीसहितको विवरण प्रकाशित गर्नुपर्छ।
सरकारले खरिद गरेको मूल्य लेख्नु नभनेकाले त्यहीअनुसार ढाँचा पुर्याएर मूल्य प्रकाशित गरिएको नाडा अटोमोबाइल्स एसोसिएसन अफ नेपालका महासचिव सुनिल रिजालले बताए। ‘हामीले भन्सारले दिएको फर्म्याटअनुसार नै मूल्य प्रकाशित गरेका हौं,’ उनले भने, ‘उक्त ढाँचामा भारतीय रुपैयाँअनुसारको मूल्य लेख्न भनिएको छैन।’
विगतमा कम्पनी, मोडल, इन्जिन क्षमता र एमआरपी मात्र प्रकाशित गर्दै आएका थिए। आर्थिक वर्ष २०७६/७७ देखि भने भन्सारले नयाँ ढाँचामा एमआरपी प्रकाशित गर्न आयातकर्ताहरुलाई निर्देशन दिएको हो। भन्सारको निर्देशन अग्नि इनकर्पोरेटेडले मात्र पालना गरेको देखिन्छ।
अग्निले महिन्द्राका गाडीको खरिद मूल्य भारतीय रुपैयाँमा नै प्रकाशित गरेको छ। भन्सारको पत्रअनुसार सवारी खरिदकर्ताले आधिकारिक बिक्रेताबाट किनिएको सवारीको मूल्यसमेत प्रकाशित गर्नुपर्छ। त्यसो गर्दा विगतमा उठेको 'व्यवसायीले अनावश्यक नाफा खान्छन्' भन्ने समस्याको समाधान हुने विश्वास भन्सारको हो।
यस्तो छ सवारीसाधन आयातकर्ताहरुको अधिकतम मूल्यसूचीः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
