डडेल्धुरा- गएराति सुदुरपश्चिम प्रदेशका अधिकांश जिल्लाका एनसेलका टावरमा आगजनी गरिएको छ। अज्ञात समूहले डडेल्धुरा, कैलाली, बझाङ र डोटीमा एनसेलको टावरमा आगजनीको प्रहरी कार्यालयहरुले जनाएका छन्।
डडेल्धुरा
जिल्लाको आलिताल गाउँपालिका–२ काफलीडाँडामा रहेको टावरमा आगजनी गरिएको हो।
बुधबार राति ११ बजेतिर टावरमा आगजनी भएको जिल्ला प्रहरी कार्यालय, डडेल्धुराका प्रहरी निरिक्षक लक्ष्मण खड्काले जानकारी दिए। सदरमुकामबाट टाढा रहेकाले अहिले प्रहरी घटनास्थल पुगेको उनले बताए।
‘अहिले प्रहरी टोली घटनास्थल पुगेको छ,’ उनले भने, ‘क्षतिको विवरण आउन बाँकी छ।’ टावरमा आगजनी भएपछि गएरातिदेखि नै जिल्ला सदरमुकाम क्षेत्रमा एनसेलको टेलिफोन र इन्टरनेट सेवा अवरुद्ध भएको छ।
डोटी
डोटीमा पनि बुधबार राति अज्ञात समूहले एनसेलको टावर जलाएको छ। जिल्लाको जोरायल गाउँपालिका–१ घण्टेश्वरको कटौंजथला भन्ने ठाउँमा रहेको एनसेल टावर जलाइएको हो।
टावरमा मध्यरातको समयमा भएको आगजनीबाट सिस्टम सञ्चालन गर्ने विभिन्न केवलहरु, बिटिएस र्याक, ब्याट्री र्याक, एसइडिपी च्यानल लगायतका सामानहरु जलेर क्षति भएको एनसेलका स्थानीय प्रतिनिधि मानसिं धामीले जानकारी दिए।
आफूहरुलाई घटनाबारे बिहीबार बिहान मात्रै खबर भएको र जानकारी पाएलगत्तै घटनास्थल पुगेको र अहिले पनि घटनास्थलमै रहेको घण्टेश्वर प्रहरीचौकीका प्र्रमूख असइ करन सिं धामीले जानकारी दिए।
उनका अनुसार बुधबार बेलुका ५ बजेदेखि ९ बजेसम्ममा घण्टेश्वर प्रहरी चौकीबाट सुरक्षा दिइए पनि रातिको समयमा टावर जलाइएको हो।
साउन महिनामा मात्रै डोटीमा दुई स्थानीय तहमा एकएक गरी दुई वटा वडा कार्यालयमा आगजनी भएको छ भने अज्ञात समूहबाट आगजनी भएको यो तेस्रो घटना हो। घटनाको मुचुल्का तयारी र विस्तृत अनुसन्धान भइरहेको डोटी प्रहरीले जनाएको छ।
कैलाली
सुदूरपश्चिम प्रदेशको अस्थायी राजधानी कैलालीको धनगढीमा रहेको एनसेल टावरमा समेत आगजनी भएको छ।
जिल्लाको उप–महानगरपालिको वडा नम्बर ६ जालीमा रहेको एनसेल टावारमा आगजनी गरिएको हो। प्रहरीका अनुसार बुधबार राति सवा १२ बजेको समयमा आगजनी गरिएको हो। गेटको ताला काटेर टावारमा आगजनी गरेको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक दक्ष कुमार बस्नेतले बताएका छन्।
उनका अनुसार आगजनीबाट टावारका ब्याट्रीहरु जलेका छन्।
बझाङ
बझाङमा पनि एनसेल टावरमा आगजनी भएको छ। गएराति नै जिल्लाको मष्टा गाउँपालिका थलारा गाउँपालिका र वित्थडचिर गाउँपालिकामा रहेको एनसेल टावरमा आगजनी भएको हो।
एनसेलले कर नतिरेकोले टावरमा आफूहरुले आक्रमण गरेको नेत्रविक्रम चन्द विप्लव समूहका बझाङ जिल्ला सेक्रेटरी हरिलालले पुष्टि गरे।
यस विषयमा जिल्ला प्रहरी कार्यालय बझाङले आधिकारिक जानकारी नआएको र टावरको सुरक्षा गर्न र अवस्था बुझ्न प्रहरी परिचालन गरिएको जिल्ला प्रहरी कार्यालय बझाङले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
