जनकपुर- विप्लव समूहका सर्लाही जिल्ला इन्चार्ज कुमार पौडेलको मृत्यु दोहोरो भिडन्तमा भएको प्रहरीले दाबी गर्दै आइरहेको बेला मानव अधिकारवादी संघसंस्थाहरूले भने पौडेलको गैह्रन्यायिक हत्या गरिएको ठहर गरेका छन्।
गएको असार ५ गते सर्लाहीको लालबन्दी–१ लखनदेही खोला नजिक दोहोरो भिडन्तमा इन्चार्ज पौडेलको मृत्यु भएको थियो। सो घटनाको मानवअधिकार सम्बद्ध संघसंस्थाहरु अनौपचारिक क्षेत्र सेवा केन्द्र (इन्सेक) प्रदेश २, एडभोसी फोरम नेपाल, तराई मानव अधिकार रक्षक संजाल (थर्ड एलायन्स), महिला मानव अधिकार रक्षक संजाल, नेपाल मानव अधिकार संगठन र उन्नत नेपालले अनुगमन र छानबिन गरी तयार पारेको प्रतिवेदन सार्वजनिक गर्दै पौडेलको गैह्रन्यायिक हत्या गरिएको ठहर गर्दै दोषीलाई कारबाहीको माग गरिएको छ।
जनकपुरधाममा साउन १५ गते पत्रकार सम्मेलन गरी संयुक्त रुपमा प्रतिवेदन सार्वजनिक गर्दै प्रहरीले दाबी गरेको दोहोरो भिडन्त गलत र झुठो रहेको मानवअधिकारवादी संगठनको प्रारम्भिक प्रतिवेदनले ठहर गरेको छ। मुठभेडका नाममा प्रहरीले पौडेलको हत्या गरेको भन्दै मानवअधिकारकर्मीले उच्चस्तरीय संसदीय समिति गठन सहितका ५ बुँदे माग अघि सारेका छन्।
पौडेल हत्या घटनाको न्यायिक छानबिन गर्न उच्चस्तरीय संसदीय समिति गठन गरी सत्यतथ्य उजागर गर्दै घटनामा संलग्नलाई कारबाही गरी तथा दण्डहीनताको अवस्था अन्त्य गर्न माग गरिएको छ। नेपालको संविधान र नेपाल सरकारको अन्तर्राष्ट्रिय प्रतिबद्धता पूरा गर्न नेपाल सरकारसँग प्रतिवेदनमार्फत माग गरिएको छ।
साथै प्रतिवेदनमा कथित मुठभेडका नाममा व्यक्ति हत्या जस्तो जघन्य अपराधमा संलग्न संस्था वा व्यक्तिलाई उत्तरदायी बनाउन तथा कानुनी दायरामा ल्याउन र राष्ट्रिय मानवअधिकार आयोगले यस घटनाका सम्बन्धमा गरेको अनुसन्धान तथा अनुगमन प्रतिवेदन तत्काल सार्वजनिक गर्न माग समेत गरिएको छ।
पत्रकार सम्मेलनमा एड्भोकेसी फोरमका प्रदेश संयोजक राजकुमार महासेठले नेपालको संविधानमा 'बाँच्न पाउने हक र कसैलाई पनि मृत्युदण्डको सजाय दिने गरी कानुन बनाइने छैन' भनी उल्लेख गरिए पनि सोको उल्लंघन भएको दाबी गरे।
प्रहरीले दोहोरो भिडन्तमा पौडेल मारिएको दाबी गर्दै आए पनि यसको विश्वसनीय आधार पाउन नसकिएको भन्दै इन्सेकका प्रदेश संयोजक राजु पासवानले मानवअधिकारवादी विभिन्न संघ संस्थाले अनुगमनको क्रममा घटनास्थल, घटनाको अवस्था, शवको अवलोकन र स्थानीय तथा पोष्टमार्टममा खटिएका चिकित्सकहरुको भनाई अनुसार दोहरो भिडन्त होइन रणनीतिक षडयन्त्र तहत हत्या गरिएको देखिएको बताए।
‘स्थानीयका अनुसार दोहरो भिडन्त भएको भए दुईतर्फी गोलीको आवाज सुनिने थियो, तर त्यस्तो देखिएन। घटनाका दिन प्रहरीले घटनास्थलमा स्थानीयलाई प्रहरीले रोक लगाएको थियो, पछि हल्ला भयो कुमार पौडेल दोहोरो भिडन्तमा मारियो, प्रहरीले भन्दै आएको कुराको कुनै विश्वनीय आधार छैन,’उनको भनाइ थियो।
प्रतिवेदनको पूर्णपाठ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
