काठमाडौं- प्रधानमन्त्री केपी शर्मा ओलीले समयतालिका निर्धारण गरेर काम गर्न मन्त्री र सचिवहरुलाई निर्देशन दिएका छन्। जनताले सरकार भएको महसुस गर्दै परिणाम देखिने गरी काम गर्न उनले मन्त्री र सचिवलाई बुधबार निर्देशन दिएका हुन्।
आर्थिक वर्ष २०७६/७७ को वार्षिक कार्ययोजना प्रस्तुतीकरण तथा कार्यसम्पादन सम्झौता कार्यक्रमलाई सम्बोधन गर्दै प्रधानमन्त्री ओलीले यस्तो निर्देशन दिएका हुन्। समग्र सरकारको कामप्रति जनताले प्रश्न उठाइरहेको र कतिपय मन्त्रीहरुको कामप्रति प्रधानमन्त्री असन्तुष्ट रहेको समयमा उनले सबैलाई सचेत गराए।
सुरुमा उपप्रधान एवं रक्षामन्त्री ईश्वर पोखरेलसँग सम्झौताको फाइल साटासाट गरेका थिए। ‘राजनीतिक अस्थिरताले काम गर्न दिएन भन्ने अवस्था छैन, वार्षिक कार्ययोजना, मासिक कार्ययोजना बनाएर काममा लाग्नुहोस्,’ प्रधानमन्त्रीले भने, ‘दुई तिहाइको स्थिर सरकार भएकाले त्यही अनुसार परिणाम जनतालाई दिनुपर्छ।’
प्रधानमन्त्री ओलीले देशमा विद्यमान गरिबी र पछौटेपन बदल्ने गरी काम गर्न सबै मन्त्रीहरुलाई निर्देशन दिए।
त्यस अवसरमा सचिवहरुले मन्त्रीहरुसँग पनि कार्यसम्पादन सम्झौता गरेका थिए। चालू आर्थिक वर्षको नीति तथा कार्यक्रम र बजेट कार्यान्वयनको कामलाई पूर्णता दिन प्रधानमन्त्री ओलीले मन्त्रीहरुसँग र मन्त्रीहरुले सचिवहरुसँग कार्यसम्पादन सम्झौता गर्ने कामको सुरुवात गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
