काठमाडौं– नेपाल आयाल निगमको थानकोट डिपोले झन्डै ५ सय लिटर पेट्रोलियम प्रदार्थ चोरी गर्ने ट्यांकर र चालकलाई नियन्त्रणमा लिएको छ।
भारतको बरौनीबाट तेल लोड गरेर आएको ना४ख ५६२६ नम्बरका ट्यांकर चालकले तेल चोरी गरेको फेला परेको हो। थानकोट डिपोका अनुसार गत जुलाई २४ मा बरौनीबाट तेल लोड गरी आएको ट्यांकर मंगलबार मात्रै काठमाडौं आइपुगेको थियो।
तेल ल्याएको ट्यांकर डिपोमा आएपछि निगमको प्राविधिक टोलीले जाँच गरेको थियो। जाँचका क्रममा तेल चोरी भएको फेला परेको डिपोले जनाएको छ।
तेल ल्याउने क्रममा बाटोमै तेल चोरी गर्ने ट्यांकर चालक र ट्यांकरलाई नियन्त्रण लिइएको डिपोको भनाइ छ।
थानकोट डिपोले तेल चोरी गर्ने चालकसहितको गिरोहलाई हदैसम्मको कारबाहीको सिफारिस गर्दै निगमको केन्द्रीय कार्यालय, बरमहलमा पत्रचार गर्ने तयारी गरेको जनाएको छ।
निगम प्रवक्ता विरेन्द्र गोइतले पनि तेल चोरी भएको विषयमा कार्यालयमा जानकारी आएको बताए। तेल चोरी गर्ने चालकलाई कानुनले दिएको अधिकार प्रयोग गरेर हदैसम्मको कारबाही गर्ने तयारी भएको उनको भनाइ छ।
निगमले तेल चोरी नियन्त्रणका लागि लकिङ प्रणाली लागू गरेको छ। ‘लकिङ प्रणाली लागू भएपछि तेल चोरी गर्नु भनेको ठूलो अपराध हो,' उनले भने, ‘तेल चोरी गर्ने चालकलाई कुनै पनि बाहानामा कारबाही छुट हुँदैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
