काठमाडौं– वैदेशिक रोजगारीका क्रममा आर्थिक वर्ष २०७५/७६ मा ७ सय ५३ जना कामदारले ज्यान गुमाएका छन् भने ३ सय ३५ अंगभंग भएका छन्। ज्यान गुमाउनेहरुमा ७ सय ३० जना पुरुष र २३ जना महिला कामदार छन्।
त्यस्तै अंगभंग हुने पनि सबैभन्दा बढी पुरुष कामदारहरु छन्। वैदेशिक रोजगारीका क्रममा अंगभंग हुने ३ सय २३ पुरुष र १२ जना महिला कामदारहरु छन्।
यो संख्या वैदेशिक रोजगार बोर्डले वैदेशिक रोजगार कल्याणकारी कोषबाट आर्थिक सहायता पाएका कामदारको संख्या मात्रै हो।
यस आर्थिक वर्षमा बोर्डबाट आर्थिक सहायता नपाएका थुप्रै संख्यामा कामदारहरुले ज्यान गुमाएका तथा अंगभंग भएका हुन सक्ने अनुमान गरिएको छ। कार्यास्थलमा दुर्घटना, सडक दुर्घटना, हत्या, झैझगडा, खतरनाक रोग लगायत विभिन्न कारणबाट वैदेशिक रोजगारीका क्रममा नेपाली युवाहरुले ज्यान गुमाउने गरेका छन्। कार्यस्थल दुर्घटना, सडक दुर्घटना लगायतकै कारणबाट ठूलो संख्यामा वैदेशिक रोजगारीमा रहेका नेपाली कामदारहरु अंगभंग हुने गरेका छन्।
कतार, मलेसिया, साउदी, युएई, कुवेत, बहराइन, ओमान, दक्षिण कोरिया, जापान लगायत मुलुकहरुमा ठूलो संख्यामा नेपाली कामदारहरुले ज्यान गुमाउने तथा अंगभंग हुने गरेका छन्। वैदेशिक रोजगारीको क्रममा ज्यान गुमाएका व्यक्तिका परिवारले ७ लाखसम्म आर्थिक सहायता प्राप्त गर्छन्।
२०७४ साउन १५ गतेभन्दा अगाडी ज्यान गुमाएका व्यक्तिका परिवारलाई बोर्डले ३ लाख आर्थिक सहायता उपलब्ध गराउँदै आएको छ। २०७४ साउन १६ देखियता ज्यान गुमाउने व्यक्तिका परिवारलाई बोर्डले ७ लाख आर्थिक सहायता उपलब्ध गराउँदै आएको छ।
त्यस्तै वैदेशिक रोजगारीका क्रममा अंगभंग भएका कामदारहरुको अंगभंगको प्रकृति हेरेर बोर्डले आर्थिक सहायता उपलब्ध गराउँदै आएको छ।
आर्थिक वर्ष २०७५/७६ मा वैदेशिक रोजगार बोर्डको बैठकले उपचारको क्रममा स्वदेश फर्किएर करार अवधिभित्रै ज्यान गुमाएका १ सय १४ व्यक्तिका हकवालालाई वैदेशिक रोजगार कल्याणकारी कोषबाट आर्थिक सहायता उपलब्ध गराउने निर्णय गरेको छ।
वैदेशिक रोजगारीबाट विदामा स्वदेश फर्किएको बेलामा अन्य दुर्घटना, कुटपिट, हत्या लगायत अन्य विभिन्न कारण ज्यान गुमाएका व्यक्तिका हकवालालाई भने आर्थिक सहायता उपलब्ध गराउन नसकिएको बोर्डका कार्यकारी निर्देशक राजनप्रसाद श्रेष्ठले जानकारी दिए।
वैदेशिक रोजगारीका क्रममा रही करार अविधि भित्रै स्वदेश फर्किएको अवस्थामा ज्यान गुमाएका २ सय ३२ परिवारले आर्थिक सहायताका लागि बोर्डमा निवेदन दिएका थिए।
निवेदन दिएका मध्ये उपचारको क्रममा स्वदेश ल्याई मृत्यु भएका १ सय १४ व्यक्तिका हकवालाले मात्रै आर्थिक सहायता पाएका छन्।
बिदाको समयमा स्वदेश फर्किएर सडक दुर्घटना, हत्या, झैझगडा लगायत अन्य कारणबाट ज्यान गुमाएका १ सय १८ व्यक्तिका हकवालाले आर्थिक सहायता पाउन सकेका छैनन्।
वैदेशिक रोजगार नियमावलीमा त्यस्ता व्यक्तिलाई आर्थिक सहायता उपलब्ध गराउने सम्बन्धमा स्पष्ट नीति नभएकाले १ सय १८ व्यक्तिका हकवालालाई आर्थिक सहायता उपलब्ध गराउन नसकिएको बोर्डले जनाएको छ।
‘वैदेशिक रोजगारीका क्रममा स्वदेश फर्किएर ज्यान गुमाएका सबै कामदारका हकवालालाई आर्थिक सहायता उपलब्ध गराउने गरी वैदेशिक रोजगार नियमावली संशोधनको तयारी गरिरहेका छौं,’ बोर्डका कार्यकारी निर्देशक राजनप्रसाद श्रेष्ठले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
