धनगढी- धनगढी उपमहानगरपालिका-४ स्थित निलम होटलका सञ्चालक केशव पाण्डे सधैंझैं होटलकै काममा व्यस्त थिए।
बिहीबार साँझ पौने ७ बजेतिर से ७ प ३१४४ नम्बरको मोटरसाइकल आएर बाहिर रोकियो। उक्त मोटरसाइकलबाट उत्रिएका दुई जनाले सुरुमा पानी पिए र बाहिरको टेबलमा बसे।
पाण्डे चिया पकाउने, खाजा बनाएर ग्राहकलाई दिने व्यस्ततामै थिए। 'उनीहरुलाई मैले सुरुमा पानी खान दिएँ। त्यसपछि चिया र समोसा अर्डर गरे,’ सञ्चालक पाण्डे भन्छन्, 'चिया/समोसा खाइसकेपछि चुरोट पनि मागेका थिए। म यता नास्ता बनाइरहेको बेला अचानक ड्याम्म पड्कियो।'
घटनापछि कानमा चोट लागेकाले आफू नजिकको फार्मेसीमा पुगेको उनको भनाइ छ। फार्मेसीले माया मेट्रो अस्पतालमा रिफर गरेपछि उनी अहिले उपचाररत अवस्थामै छन्।
सञ्चालक पाण्डेका अनुसार उनीहरुको साथमा झोला पनि थियो। झोलाभित्रकै केही वस्तु पड्केको हुन सक्ने उनी बताउँछन्।
घटनाका बेला होटलभित्र चार र बाहिर तीन जना नास्ता खादै गफगाफ गरिरहेका थिए। भित्रका ग्राहकलाई कुनै असर नभए पनि बाहिर रहेका अन्डा तथा कुखुरा व्यवसायी संघ कैलालीका अध्यक्ष जितेन्द्र यादव, ग्यारेज सञ्चालन गर्दै आएका भारतीय नागरिक मोबिन खान तथा मोटरसाइकलमा आएका रामबहादुर सिंह र लक्ष्मण सेरेला घाइते भए।
सुरुमा ग्यास पड्किएको हल्ला भए पनि घटनास्थल पुगेको प्रहरीले बम नै पड्किएको पुष्टि गरिसकेको छ। घटनास्थलमा तार र फलामका टुक्राहरु समेत प्रहरीले फेला पारेको छ।
उक्त स्थानबाट ९ एमएमको चाइनिज पेस्तोल र एक मोटरसाइकल प्रहरीले बरामद गरेको छ। सिंहले टिफिन बक्समा फिट गरेको बम झोलाभित्र हालेर बोकेको हुन सक्ने कैलाली प्रहरी प्रवक्ता एवं प्रहरी नायव उपरीक्षक दक्षकुमार बस्नेतले बताए।
एक जनाको मृत्यु
घटनालगत्तै घाइतेहरुलाई उपचारका लागि प्रहरीले माया मेट्रोमा पठाएको थियो।
सिंहको उपचार त्यहाँ सम्भव नभएपछि कोहलपुर रिफर गरियो। प्रवक्ता बस्नेतका अनुसार सिंहलाई कोहलपुर लग्ने क्रममा बाटोमै मृत्यु भएको हो। बमको छर्राले उनको ढाड र खुट्टाको मासु बाहिर छुट्टिएको उनको भनाइ छ।
स्थानीय विक्रम विष्ट विस्फोटका समयमा आफू औषधि पसलमै रहेको बताउँछन्। टाउको र कानमा चोट लागेको अवस्थामा आएका पाण्डेलाई माया मेट्रोमा उपचार गर्न आफूले सुझाव दिएर पठाएको उनको भनाइ छ।
‘यहाँ ग्यास सिलिन्डर पटकपटक पड्किन्थ्यो। त्यसैले सुरुमा त ग्यास नै पड्किएको हो भन्ने सोचेका थियौं,' उनले भने, 'पछि बम नै भएपछि असुरक्षित महसुस भइरहेको छ। औषधि किन्ने बहानामा भोलि कसैले बम ल्याएर नआऊलान् भन्न सकिँदैन।’
घाइते सबैको हाल उपचार भइरहेको छ।
मृतक सिंह पूर्वलडाकु
मृतक सिंह र घाइते रहेका सेरेला तत्कालीन माओवादीका समेत लडाकु रहेको प्रारम्भिक अनुसन्धानबाट खुलेको प्रहरीले जनाएको छ।
घाइते सेरेला पनि पनि माओवादीको पूर्वलडाकु हुन। सेना समायोजनका बेला उनले ५ लाख लिएर स्वेच्छिक अवकाश लिएको श्रीमती विमलाले बताइन्।
‘स्वेच्छिक अवकास लिँदा पाएको ५ लाखले झिलमिलामा ५ कट्टा जग्गा किनेर बसेका हौं। श्रीमान् कहाँ के गर्थे आफूलाई केही थाहा छैन,’ विमलाले भनिन्, ‘एक हप्ताअघि काठमाडौं जान्छु भनेर घरबाट निस्केका हुन्। हिजो (बिहीबार) बिहान फोन गरेर नेपालगञ्ज छु। दुईचार दिनमा घर आउँछु भन्थे। साँझ प्रहरीले तपाईंको श्रीमानलाई यस्तो भयो भनेर भनेपछि घटना बारे थाहा पाएँ।’
स्वेच्छिक अवकाशबापत ५ लाख रकम पाएपछि सेरला परिवार डडेल्धुराको भागेश्वरबाट बेल्डाँडीको झिलमिलामा आएर बसेका हुन्।
यसैबीच, विप्लव नेतृत्वको नेपाल कम्युनिस्ट पार्टी (नेकपा) ले धनगढीमा भएको घटनाको जिम्मा लिएको छ। सेती-महाकाली ब्युरो इन्चार्ज निर्माणले विज्ञप्तिमार्फत बम विस्फोटको जिम्मा लिएका हुन्।
(1).jpg)
घाइतेहरुको उपचार खर्च पार्टीले बेहोर्ने प्रतिबद्धता जनाइएको छ भने सर्वसाधारण नागरिकमा पर्न गएको असहजताप्रति पार्टीले दुःख व्यक्त गरेको छ।
आत्मसुरक्षाका लागि बोकेको विस्फोटक पदार्थ पड्किएको जनाउँदै नेकपाले घटनाको परिणामको जिम्मेवार वर्तमान सरकार भएको उल्लेख गरेको छ।
मृतक सिंहलाई उक्त पार्टीले सहिद घोषणा पनि गरेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
