हेटौंडा- मकवानपुरको इन्द्रसरोवर गाउँपालिकास्थित कुलेखानी जलाशयको ढोका नखोलिने भएको छ।
जिल्ला प्रशासन कार्यालय मकवानपुरले पानीको सतह बढेपछि फुट्ने खतरा कम गर्न भन्दै बिहान सबै ढोका खोल्ने निर्णय गरेको थियो। अहिले उक्त निर्णय रद्द गरिएको छ।
ढोका खोल्नुको सट्टा सबै टर्वाइन घुमाएर विद्युत् निकालिने भएको प्रमुख जिल्ला अधिकारी अस्मान तामाङले जानकारी दिए। उनका अनुसार तीन/चार दिनसम्मका लागि भारतबाट आपूर्ति भइरहेको विद्युत कटौती गरेर कुलेखानीको सबै टर्वाइन घुमाएर विद्युत निकालिनेछ।
असारमै भरियो जलाशय
लगातार वर्षाका कारण कुलेखानी जलविद्युत केन्द्रको जलाशय असारमै भरिएको छ।
गत वर्ष भर्षभरिमा जलाशयमा पानीको सतह १५२६ मिटर रहेकोमा यस वर्ष सोमबार बिहानसम्म १५२६ मिटर पुगेको छ।
सोमबार बिहान साढे पाँच बजे १५२५.१७ मिटर रहेको जलाशयको पानीको सतह १० बजे बढेर १५२६ मिटर पुगेको हो।
जलाशयमा अधिकतम १५३१ मिटरसम्म मात्रै पानी भण्डारण हुन सक्छ। त्यस क्षेत्रमा लगातार परिरहेको पानीका कारण तीन/चार दिनमै जलाशयमा पानीको सतह करिब २० मिटर बढेको छ।जलाशयमा पानी भरिएपछि कुलेखानी पहिलो (६० मेगावाट) र दोस्रो (३२ मेगावाट) पूर्ण क्षमतामा चलाइएको नेपाल विद्युत प्राधिकरणका कार्यकारी निर्देशक कुलमान घिसिङले जानकारी दिए।
‘पानी पर्न भरखर सुरु भएको छ, विगतका वर्षमा असोजमा मात्रै भरिने जलाशय यस वर्ष तीन महिना अगाडि नै भरियो’, उनले भने, ‘विगतमा बर्खामा कुलेखानी विद्युतगृह चल्दैन थियो। अहिले असारमै पानी भरिएपछि कुलेखानीलाई पूर्ण क्षमतामा चलाई भारततर्फ विद्युत आयात घटाएका छौं।’
कुलेखानी पहिलो विद्युतगृह पूर्ण क्षमतामा चलाउँदा एक घन्टामा जलाशयको पानीको सतह २ सेन्टिमिटर मात्रै घट्ने कार्यकारी निर्देशक घिसिङले जानकारी दिए।
कुलेखानी बर्खाको पानी जम्मा गरी मुख्य रुपमा विद्युतको अत्यधिक माग हुने हिउँदमा मात्रै चलाउने आयोजना हो। विद्युत आवश्यक परेको बेला प्रणालीलाई सन्तुलन कायम गर्न मात्रै कुलेखानी चलाइन्छ।
प्राधिकरणले अहिले ढक्केबर–मुजफ्फपुर क्रस बोर्डर प्रसारण लाइनबाट मात्रै करिब १५० मेगावाट विद्युत् आयात गरिरहेको छ। अविरल वर्षका कारण तराईमा विद्युत माग घटेको छ। अहिले मुलुकभरको विद्युत्को माग करिब ६ सय मेगावाट मात्रै छ।
(राससको सहयोगमा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
