काठमाडौं- राष्ट्रिय ध्वजाबाहक नेपाल एयरलाइन्समा कार्यरत पाइलट गोपाल सिंह विष्टको दुई वटा जन्म मिति भएको फेला परेको छ।
विष्टको नागरिकता र पाइलट लाइन्सेन्स तथा पासपोर्टमा फरकफरक जन्म मिति भएको पुष्टि भएको छ।
नेपाल एयरलाइन्सका उपनिर्देशक रहेका विष्ट एमए–६० का आइपी पाइलट (प्रशिक्षक पाइलट) हुन्। उनी २०१४ अगस्टमा नेपाल एयरलाइन्सको स्थायी सेवामा प्रवेश गरेका थिए। विष्टले निगममा बुझाएका अभिलेख/नागरिकता र उनीसँग रहेको पासपोर्ट/पाइलट लाइसेन्समा फरकफरक जन्म मिति भएको प्रमाण नेपाल लाइभले फेला पारेको हो।
उनै पाइलट विष्टलाई निगमले नियमविपरीत एमए–६० को पाइलटबाट सिधै एयरबस ३२० को पाइलटमा पठाउने तयारी गरेसँगै उनीसँग दुई वटा जन्ममिति भएको रहस्य बाहिर आएको हो।
नेपाल वायुसेवा निगम व्यवस्थापनले विष्टलाई २०७५ माघ २८ मा काटेको पत्रबाटै उनीसँग फरकफरक दुई जन्म मिति रहेको खुल्न आउँछ।
विष्टलाई निगमले २०७५ फागुन २७ मा ५८ वर्ष पूरा भएकाले २०७५ फागुन २८ गतेबाट निगमको सेवाबाट अनिवार्य अवकाश पाउने भन्दै पत्र लेखेको थियो। उक्त पत्रको आधारमा विष्ट अहिले ५९ वर्ष लागिसकेका छन्।
‘यस विभागमा रहेको तपाईंको वैयक्तिक अभिलेख अनुसार मिति २०७५/११/२७ मा तपाईंको उमेर ५८ वर्ष पूरा हुने भएकाले निगमको कर्मचारी सेवा सर्त सम्बन्धको विनियमावली २०६८ को विनियम ६३ अनुरुप मिति २०७५/११/२७ देखि उमेर हदका कारण निगमको सेवाबाट अनिवार्य अवकाश हुने व्यहोरा अग्रिम जानकारी गराइएको छ,' एयरलाइन्स व्यवस्थापनले विष्टलाई लेखेको पत्रमा भनिएको छ, 'आफ्नो बिदा तथा नोकरी विवरण सम्बन्धीको अद्यावधिक जानकारीका लागि अवकाश हुने मितिले एक हप्ता अगावै मानव संशाधन विभागको अभिलेख शाखामा सम्बन्धित फाँटवालाकहाँ सम्पर्क राख्न हुनसमेत अनुरोध छ।’
हेर्नुस् पत्र-
.jpg)
यसको आधारमा उनको नागरिकता उल्लेख भएको जन्म मिति २०१७ फागुन २९ गते हुन्छ। तर, विष्टको पाइलट लाइसेन्स र पासपोर्टमा उल्लेख भएको जन्म मिति भने सन् १९६३ डिसेम्बर १२ उल्लेख छ। यो भनेको २०२० मंसिर २६ गते हुन आउँछ।
.jpg)
निगम व्यवस्थापनले उनलाई ५८ वर्ष पूरा भएको पत्र थमाए पनि लाइसेन्स र पासपोर्टमा रहेको उमेरको विषयमा भने केही जनाकारी नभएको बताएको छ।
यस विषयमा निगमका कार्यकारी अध्यक्ष मदन खरेल सम्पर्कमा आउन चाहेनन्। निगम प्रवक्ता नवराज कोइरालाले भने यसबारे आफूले डकुमेन्ट हेर्ने काम गरिरहेको बताए।
पाइलट विष्टको समेत प्रतिक्रिया लिन खोज्दा उनले 'आफै अफिसमा गएर हेर्नु' भन्दै थप बोल्न चाहेनन्।
यो पनि : एमए-६० का पाइलटलाई नियमविपरीत ए-३२० को तालिममा पठाउँदै नेपाल एयरलाइन्स
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
