काठमाडौं- बिहीबारदेखिको अविरल वर्षापछि देशका विभिन्न स्थानमा आएको बाढी, पहिरो र डुवानबाट हालसम्म ४३ जनाको मृत्यु भएको नेपाल प्रहरीले जनाएको छ।
बाढी तथा पहिरोमा परी शनिबार रातिसम्मको तथ्यांकअनुसार ललितपुरमा ५ जना, भोजपुरमा ५ जना, मकवानपुरमा ४ जना, काठमाडौं, खोटाङ ,ओखलढुंगा र काभ्रेमा ३/३ जना, धादिङ , झापा, सिन्धुलीमा २/२ जना तथा पाल्पा, पर्सा, रामेछाप, इलाम, सुनसरी, बारा, रौतहट, सिराहा, धनुषा, चितवन र डोल्पामा १/१ जना गरी ४३ जनाको मृत्यु भएको छ। मृतकहरुमध्ये १८ जना महिला र २५ जना पुरुष रहेका प्रहरीले जनाएको छ।
प्रहरीका अनुसार हालसम्म देशभर १ हजार १ सय ४ जनाको उद्धार गरिएको छ। बाढी र पहिरो प्रभावित महोत्तरीका ५ सय जना, रौतहटका २ सय जना, काठमाडौंका १ सय ८५ जना, सर्लाहीका १ सय जना, सिन्धुलीका ७० जना, सप्तरीका २५ जना, उदयपुरका १० जना, ललितपुरका ८ जना, सिराहका २ जना तथा भक्तपुर, सुनसरी, मकवानपुर र खोटाङका १/१ जना गरी जम्मा १ हजार १ सय ४ जनाको सकुशल उद्दार गरी सुरक्षित स्थानमा स्थानान्तरण गरिएको छ।
हालसम्म २० जना घाइते भएका र उनीहरुको स्थानीय अस्पतालमा उपचार भइरहेको छ। मकवानपुरमा ४ जना, धनकुटामा ३ जना, भोजपुर, सुनसरी, काभ्रे र सिन्धुलीमा २ जना, खोटाङ, धादिङ, चितवन, दोलखा र रामेछापमा १/१ जना गरी घाइते भएका २० जनालाई अस्पताल भर्ना गरिएको हो।
प्रहरीका अनुसार देशभर २४ जना हराइरहेका छन्। बाढी, पहिरो तथा डुवानमा परी सिन्धुलीमा ६ जना, इलाम र मोरङमा ३/३ जना, पाँचथर, झापा, उदयपुर, सुनसरी, पर्सा, रौतहट, महोत्तरी, सिराहा, धनुषा, धादिङ, काठमाडौं, ललितपुरमा १/१ जना गरी २४ जना बेपत्ता भएका हुन्।
देशभरका विभिन्न स्थानमा बाढी तथा पहिरोका कारण अवरुद्ध सडक खुलाउने प्रयास भइरहेको पनि प्रहरीले जनाएको छ।
खोजी तथा उद्धारका लागि देशभर २७ हजारभन्दा बढी संख्यामा प्रहरी परिचालन गरिएको छ।
काठमाडौं उपत्यकामा मात्रै ८ हजार ८ सय ५६ प्रहरी परिचालन गरिएको बताइएको छ। त्यस्तै प्रदेश १ मा ६ हजार ३ सय ५ जना, प्रदेश २ मा ५ हजार ७ सय २ जना, प्रदेश ३ मा ३ हजार ४ सय ५ जना, कर्णाली प्रदेशमा ३ हजार १ सय १२ जना गरी प्रभावित स्थानहरुमा कूल २७ हजार ३ सय ८० जना प्रहरी कर्मचारीहरू उद्धारमा खटिएका छन्।
साथै बाढी, पहिरोको जोखिममा रहेका विभिन्न जिल्लाका घरपरिवारलाई सुरक्षित स्थानमा राख्ने, पहिरोमा पुरिएका धनमाल निकालेर सुरक्षा गर्ने कामसमेत विभिन्न निकाय र स्थानीयवासीको समन्वय र सहयोगमा प्रहरीले गरिरहेको बताएको छ।
प्रभावित स्थानहरुमा भएको क्षति न्यूनीकरण र उद्दारमा विभिन्न निकाय र स्थानीयवासीको समन्वय र सहयोगमा नेपाल प्रहरी सक्रिय रहेको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
