काठमाडौं- भारतमा आर्थिक वर्ष सन् २०१९/२० को बजेट पेस भएको छ। बजेट आज भारतकी प्रथम महिला अर्थमन्त्री निर्मला सीतारमणले त्यहाँको संसद् लोकसभामा पेस गरेकी हुन्।
उनले भारतमा बेलायती औपनिवेशिक कालदेखि नै प्रचलनमा रहेको बजेटको ब्रिफकेस बोकेर संसदमा जाने परम्परा तोडेकी छन्।
त्यसको साटो उनले गाढा रातो रङको परम्परागत बहिखाता बोकेकी थिइन्।
शुक्रबार मोदी सरकारको दोस्रो कार्यकालको पहिलो बजेट पेस गर्दा उनी रातो कपडाले बेरिएको बहिखाताका साथमा उपस्थित भएकी थिइन्। तर, यसअघिका अर्थमन्त्रीले सँधै ब्रिफकेसमा ल्याएर प्रस्तुत गर्दथे।
यसपाली संसद्मा पेस गर्नुअघि नै भारतीय बजेटको चर्चा सुरु भएको थियो। निर्मला ब्रिफकेसको साटो बहिखाताका साथ संसद् बाहिर देखिएकी थिइन्।
बहिखातालाई रातो र पहेँलो रङ भएको रिबनले बाँधिएको थियो र त्यसमा भारतीय राष्ट्रिय चिन्ह राखिएको थियो।
यसो गरिनुको मुख्य कारण उनका प्रमुख आर्थिक सल्लाहकार कृष्णामूर्ति सुब्रहमन्यमले बताएका छन्। यसबाट ‘पश्चिमा सोचाइप्रतिको दासताबाट अलग’ भएको प्रतीक प्रस्तुत हुने उनले बताएका छन्।
बजेटका लागि ब्रिफकेसको साटो बहिखाता प्रयोग गरिएको विषयमाथि भारतीय समाजिक सञ्जालमा व्यापक चर्चा भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768096008.png)
-1764146706.png)
