काठमाडौं- अर्थमन्त्री डा युवराज खतिवडाले पुँजी बजारले राम्रोसँग काम नगरे सरकारले हस्तक्षेप गर्ने बताएका छन्।
अर्थमन्त्री खतिवडाले पुँजी बजारलाई सञ्चालनमा सरकारले रोकावट नगरे पनि त्यसले राम्रोसँग काम नगरे कडा निगरानीमा राख्ने पनि स्पष्ट पारे। मंगलबारबाट काठमाडौंमा सुरु भएको वित्तीय साक्षरतासम्बन्धी वृहत् अन्तर्राष्ट्रिय सम्मेलनमा बोल्दै उनले नेपालमा पनि पुँजी बजारले राम्रोसँग काम नगरेकाले नियमनकारी निकायलाई निगरानी गर्नुपरेको जिकिर गरे।
अर्थमन्त्री खतिवडाले नेपालमा रेमिट्यान्सको पुँजी परिचालन गर्नेहरुलाई वित्तीय साक्षर बनाउनुपर्नेमा पनि जोड दिए। ५० लाखभन्दा बढी युवाहरुले वैदेशिक रोजगारीमा गएका कारण उनीहरुका परिवारका सदस्यले वित्तीय कारोबार गरे पनि उनीहरुलाई सुरक्षित र भरपर्दो बैंक तथा वित्तीय संस्थाहरुको बारेमा समेत जानकारी नभएको अर्थमन्त्री खतिवडाको भनाइ छ।
उनले महिलाहरु पनि वित्तीय कारोबारमा संलग्ने हुने क्रम बढेकाले उनीहरुलाई साक्षर बनाउने काममा पनि लगानी गर्नुपर्नेमा जोड दिए। अर्थमन्त्री खतिवडाले बैंक तथा वित्तीय संस्थालाई भरपर्दो प्रविधिको प्रयोग गर्न पनि सचेत गराए।
नेपाल धितोपत्र बोर्ड र ओइसिडीले वित्तीय साक्षरता बढाउने उद्देश्यका साथ सो २ दिने अन्तर्राष्ट्रिय सम्मेलन आयोजना गरेको हो। सम्मेलनमा भारत, अमेरिका, सिंगापुर, थाइल्याण्ड, दक्षिण अफ्रिका, चीन, अष्ट्रेलिया, भुटानसहितका पुँजी बजारका विज्ञहरु, लगानीकर्ताहरु सहभागी भएका छन्। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
