काठमाडौं– कोपा अमेरिका फुटबलको सेमिफाइनलमा फुटबलका दुई हस्ती देशहरु अर्जेन्टिना र ब्राजिल पुगेका छन्।
क्वार्टरफाइनलमा भेनेजुएलालाई २–० ले हराउँदै अर्जेन्टिना सेमिफाइनल पुगेपछि यो भेट तय भएको हो। सेमिफाइनलमा हुने यो भिडन्त आयोजक ब्राजिल र अर्जेन्टिनासँग मात्र सीमित हुनेछैन। यसमा विश्व फुटवलका दुई स्टारहरु लियोनल मेसी र नेइमारबीचको प्रतिस्पर्धाको रुपमा लिइने छ। तर नेइमार घाइते भएर सुरुदेखि नै मैदानबाहिर छन्। उनको स्थान ब्राजिली फरवार्ड काउन्टिन्हो, विलियन र आर्थरले सम्हाल्दै आएका छन्।
ब्राजिल यसअघि नै सेमिफाइनलमा प्रवेश गरेर आफ्नो प्रतिस्पर्धी कुरेर बसिरहेको थियो। गएराति सम्पन्न खेलमा अर्जेन्टिनाले जित हात पार्दै पुरानो चिरपरिचित प्रतिद्वन्द्वी ब्राजिलसँगको भेट तय गरेको हो। अर्जेन्टिनाको जितमा लौतारो मार्तिनेज र झिओभानी लो केल्सोले गोल गरेका थिए।
आउँदो बुधबार फाइनल प्रवेशका लागि ब्राजिल र अर्जेन्टिना भिड्नेछन्। पाराग्वेलाई पेनाल्टी सुटआउटमा हराउँदै ब्राजिल सेमिफाइनलमा पुगेका थियो।
बार्सिलोनाबाट जर्मन क्लब पेरिस सेन्ट पुगेका नेइमारले पुन बार्सिलोना फर्कने चाहना देखाइरहेका छन्। मेसी हाल पनि बार्सिलोनामै रहेका छन्।
अर्जेन्टिना-ब्राजिल आमनेसामने
सन् १९१६ देखि हालसम्म अर्जेन्टिना र ब्राजिल ३२ पटक कोपा अमेरिकी कममा आमनेसामने भएका छन्। त्यसमा ब्राजिलले ८ पटक जित हात पारेको छ भने अर्जेन्टिनाले १६ खेलमा जित हासिल गरेको छ। दुवै देशबीच भएका खेलमा ८ खेल बराबरीमा सकिएको थियो।
विश्वकप, ओलम्पिक र अन्य खेलहरुको संख्या जोड्ने हो भने दुवै देश ५९ पटक आमनेसामने भएका छन्। त्यसमा ३२ अर्जेन्टिना र २७ ब्राजिलको पक्षमा निर्णय भएको देखिन्छ। कोपा अमेरिका कपमा पछिल्लो पटक २००७ मा यी दुई देशको भिडन्त हुँदा ३–० ले ब्राजिलले आफ्नो पक्षमा नजिता पारेको थियो। त्यसअघि २००४ को खेलमा २–२ को बराबरी भएको थियो र नतिजा ब्राजिलको पक्षमा पुगेको थियो।
ब्राजिल VS अर्जेन्टिनाको इतिहास
अर्जेन्टिना र मेस्सीको चर्चा धेरै भए पनि उपाधि दिलाउन कम भूमिका हुने गरेको आरोप लाग्ने गरेको छ। यो सेमिफाइनलमा सबैभन्दा धेरै दबाब मेसीमाथि हुनेछ। सिंगो ब्राजिलियन टिम मेसीको पछाडि हुनेछन्। ब्राजिलियन खेलाडीहरुलाई चक्मा दिँदै मेसीले बार्सिलोनालाई दिएको उपाधिको स्वाद चखाउनुपर्ने चुनौती पनि छ। ब्राजिललाई पाखा लगाएर मात्र फाइनल पुग्न सक्ने अवस्था भएकाले मेसीको महत्वपूर्ण भुमिका हुने देखिन्छ।
१२ वर्षपछि ब्राजिल कोपा अमेरिका कमको सेमिफाइलमा प्रवेश गरेको हो। घरेलु मैदानका कारण पनि उसलाई थप हौसला मिलेको छ।
२००७ मा उपाधि जितेको ब्राजिल त्यसयता पहिलो पटक सेमिफाइनल प्रवेश गरेको हो। २०११ र २०१५ को संस्करणमा ब्राजिल क्वार्टरफाइनलमा पाराग्वेसंग नै हारेको थियो। २०१६ मा भने ब्राजिलले समूह चरणसमेत पार नगरी बाहिरिएको थियो।
यता, कोलम्बियालाई हराउँदै चिली पनि सेमिफाइलमा पुगेको छ। प्रतियोगिताको अन्तिम क्वार्टरफाइनल खेल उरुग्वे र पेरुबीच भोलि हुनेछ। यो खेलको विजेताले फाइनल प्रवेशका लागि चिलीसँग खेल्नुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
