सुर्खेत– डोल्पाकी बदमी बोहोरा नेकपा एमालेले प्रदेश ६ को प्रदेशसभाका लागि समानुपातिकतर्फ सिफारिस गरेका ६ जनामध्ये कर्णालीबाट प्रतिनिधित्व गर्ने एक्ली सांसद हुन्। सुर्खेत जिल्लाबाट दुई जना सांसद सिफारिसमा पर्दा कर्णालीका पाँच जिल्लाबाट भने एक जनाको मात्र प्रतिनिधित्व एमालेले गराएको छ।
त्यस्तै, नेपाली कांग्रेसले सिफारिस गरेका ५ मध्ये २ जना कर्णाली क्षेत्रबाट परे भने माओवादी केन्द्रका ४ जनाभित्र कर्णालीका उम्मेदवार छनौटमै परेनन्। जबकि माओवादीले पनि एमालेले जस्तै सुर्खेतबाट मात्रै दुई जना सांसद सिफारिस गरेको छ।
प्रदेशसभामा प्रतिनिधित्व गर्ने प्रमुख तीन दलले कर्णाली प्रदेश भनेर चिनिने प्रदेश ६ मा प्राथमिकता नदिँदा समानुपातिकमा कर्णालीको प्रतिनिधित्व कमजोर भएको हो। दलहरुले कर्णालीलाई फेरि पनि उपेक्षा गरेको गुनासो कर्णालीका प्रतिनिधिहरुले गर्न थालेका छन्।
एमालेबाट समानुपातिकमा परेकी डोल्पाकी बदमी बोहोराले प्रदेश ६ को ठूलो भूभाग नै कर्णालीले ओगटेको भए पनि समानुपातिकमा सांसद सिफारिस गर्दा कर्णाली नै पछाडि पर्नु दुखद् भएको बताइन्। सधैं पछाडि पार्ने गरिएको कर्णालीलाई अहिले पनि प्रमुख दलहरुले उपेक्षा गरेको उनको आरोप छ।
प्रदेश ६ का १० मध्ये ५ जिल्ला कर्णालीका छन्। एमालेले प्रदेशसभामा समानुपातिकतर्फ कर्णालीबाट डोल्पाकी बोहोरालाई सांसद बनाएको छ भने कांग्रेसले जुम्लाका दीनबन्धु श्रेष्ठ र मुगुकी झोवा विकलाई सिफारिस गरेको छ। एमाले र माओवादीले जस्तै कांग्रेसले पनि सुर्खेतबाट मात्रै दुई जनालाई समानुपातिक कोटाबाटै सांसद बनाएको छ।
कर्णाली क्षेत्रलाई आफ्नो आधार क्षेत्रको दाबी गर्दै आएको माओवादी केन्द्रले भने प्रदेशसभामा समानुपातिकबाट एक जना पनि सांसद बनाएन। माओवादीले पाएको ४ सिटमा सुर्खेतका सीता नेपाली, पुष्पा घर्ती (विष्ट) सहित पश्चिम रुकुमका विमला केसी र जाजरकोटका कृष्णा शाहलाई सांसद सिफारिस गरेको छ।
प्रदेशसभामा १ सिट पाएको राष्ट्रिय प्रजातन्त्र पार्टीले भने कालीकोटकी शोसिला शाहीलाई सांसद बनाएको छ। समानुपातिकका १६ सांसदमध्ये कर्णालीबाट ४ जनाको मात्रै प्रतिनिधित्व भएको छ। बाँकी १२ जना भने कर्णालीबाहेकका जिल्लाका छन्।
प्रत्यक्षमा पनि कम
समानुपातिकमा मात्र होइन प्रत्यक्षतर्फबाट पनि प्रदेशसभामा कर्णालीको उपस्थिति केही कम छ। कर्णालीमा पर्ने पाँच जिल्ला कालीकोट, जुम्ला, हुम्ला, मुगु र डोल्पामा प्रदेशसभाका लागि २/२ वटा निर्वाचन क्षेत्र निर्धारण गरिएको थियो। जसले गर्दा पाँच जिल्लाबाट १० जना सांसद प्रत्यक्षतर्फबाट प्रदेशसभामा निर्वाचित भएका छन्।
यो प्रदेशमा पर्ने कर्णालीबाहेकका पाँच जिल्लामध्ये सुर्खेत र दैलेखमा भने प्रदेशसभाका लागि ४/४ वटा निर्वाचन क्षेत्र र अन्य जाजरकोट, पश्चिम रुकुम र सल्यानमा २/२ वटा निर्वाचन क्षेत्र निर्धारण गरिएको छ। जसबाट १४ जना सांसद निर्वाचित भएका छन्।
४० सदस्यीय प्रदेशसभामा प्रत्यक्ष र समानुपातिकबाट गरी कर्णालीका १४ जना सांसदको मात्रै प्रतिनिधित्व हुने भएको छ।
यी हुन् समानुपातिकमा परेका सांसदहरु
एमालेका सांसद
मीनासिंह रखाल (दैलेख), कौशिला खत्री (जाजरकोट), बदमी बोहोरा (डोल्पा), पद्मा खड्का (सुर्खेत), देवी ओली (पश्चिम रुकुम) र राजु नेपाली (सुर्खेत)
कांग्रेसका सांसद
दीनबन्धु श्रेष्ठ (जुम्ला), हिमबहादुर शाही (दैलेख), यज्ञबहादुर बिसी (सुर्खेत), अमृता शाही (सुर्खेत) र झोवा विक (मुगु)
माओवादी केन्द्रका सांसद
पुष्पा घर्ती विष्ट (सुर्खेत), सीताकुमारी नेपाली (सुर्खेत), विमला केसी (पश्चिम रुकुम) र कृष्णा शाह (जाजरकोट)
राप्रपाका सांसद
सोशिलाकुमारी शाही (कालीकोट)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
