जुम्ला– विनाविभागीय राज्यमन्त्री गोमा कुँवरले मुलुक संघीयतामा गइसक्दा पनि कर्णाली उपेक्षामा परेको बताएकी छिन्।
हुम्लामा आयोजित एक कार्यक्रममा राज्यमन्त्री कुँवरले प्रतिनिधि र प्रदेशसभा सदस्यको निर्वाचनमा समेत कर्णालीलाई उपेक्षा गरिएको आरोप लगाइन्।
'यसको प्रमुख कमजोरी क्षेत्रीय नेतृत्वको हो, हिजो कर्णाली सिंहदरबारबाट उत्पीडनमा पर्योम, अहिले भेरीबाट पर्दैछ', उनले भनिन्। उनले क्षेत्रीय नेतृत्वको कर्णालीप्रति हेर्ने दृष्टिकोण फरक रहेको बताउँदै संघीयता कर्णालीका लागि ‘कागलाई बेल पाक्यो हर्ष न विस्मात’झैँ भएको बताइन्।
कार्यक्रममा नेकपा एमालेकी नेता मेनका पछाईले पनि प्रदेश नेतृत्वको पूर्वाग्रहका कारण समानुपातिक सूचीमा कर्णालीबाट नगण्य संख्यामा उम्मेदवारी परेको बताइन्। भनिन्, 'नेतृत्वको मानसिकता र व्यवहारले उत्पीडित क्षेत्र कर्णालीमा संघीयता आएजस्तो लागेन।'
कांग्रेस नेता तथा चन्दननाथ नगरपालिका प्रमुख कान्तिका सेजुवालले प्रदेश ६ को समानुपातिक संसद् चयनमा कांग्रेसले न्याय गरे पनि एमाले र माओवादी केन्द्रले कर्णालीप्रति उपेक्षा गरेको टिप्पणी गरिन्। कर्णालीको नेतृत्व केन्द्रमा नभएकै कारण यसले संघीयता कार्यान्वयन तहमा पुग्दा उचित न्याय पाउन नसकेको उनको भनाइ थियो।
प्रदेश ६ को ४० सदस्य रहेको प्रदेशसभाका लागि समानुपातिकमा एमालेका मीनासिंह रखाल, कौशिला खत्री, बदमी बोहोरा, पद्मा खड्का, देवी ओली र राजु नेपाली तथा कांग्रेसबाट दीनबन्धु श्रेष्ठ, हिमबहादुर शाही, यज्ञबहादुर बिसी, अमृता शाही र झोवा विक परेका छन्।
त्यसैगरी माओवादी केन्द्रबाट समानुपातिक सांसदमा पुष्पा घर्ती विष्ट, सीताकुमारी नेपाली, विमला केसी र कृष्णा शाह र राप्रपाबाट सोशिलाकुमारी शाही परेका छन्।
यी मध्ये कर्णालीका पाँच जिल्लाबाट ४ जना मात्र समानुपातिक सांसद् प्रदेशसभा सदस्यमा आउने देखिन्छ। समानुपातिकमा हुम्लाबाट कुनै पनि पार्टीले नाम पठाएका छैनन्। यस्तै माओवादीले केन्द्रले कर्णालीका पाँचै जिल्लाबाट प्रदेश ६ को समानुपातिकमा कसैको नाम सिफारिस गरेको छैन। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
