काठमाडौं- इंग्ल्यान्डमा जारी १२औं आइसिसी विश्वकप क्रिकेटमा भारतले वेस्टइन्डिजमाथि फराकिलो जित निकालेको छ।
म्यान्चेस्टरमा भएको खेलमा भारत वेस्टइन्डिजमाथि १ सय २५ रनको फराकिलो जित निकाल्न सफल भएको हो।
सेमिफाइनलमा स्थान बनाउन दुवै टोलीका लागि महत्वपूर्ण मानिएको खेलमा वेस्टइन्डिजले कमजोर प्रदर्शन गर्दा भारत सेमिफाइनल नजिक पुगेको छ।
समूह चरणका ३ खेल खेल्न बाँकी रहँदा भारत ६ खेलमा ११ अंकसिहत अपराजित छ र उ अंकतालिकाको दोस्रो स्थानमा उक्लिएको छ। इंग्ल्यान्ड, बंगलादेश र श्रीलंकासँग खेल्न बाँकी रहेको भारतका लागि सेमिफाइनलमा पुग्न अब यी ३ टोलीमध्ये एकलाई पराजित गरे पुग्छ।
क्रिकेटमा बिरलै मानिने बराबरी वा वर्षाका कारण खेल रद्द भए पनि भारतलाई सेमिफाइनल पुग्न सहज हुनेछ। अष्ट्रेलियाले यसअघि नै १२ अंकसहित अन्तिम ४ मा आफ्नो स्थान पक्का गरिसकेको छ। बाँकी सबै खेलमा पराजित भए पनि भारतले नेट रनरेटका आधारमा सेमिफाइनलमा पुग्न बलियो दाबेदारी दिनसक्नेछ।
हारसँगै वेस्टइन्डिज भने २ खेल अगावै विश्वकपबाटै बाहिरिएको छ। ७ खेलमध्ये एकमा मात्रै जित निकालेको वेस्टइन्डिज विश्वकपबाट बाहिरिने तेस्रो टोली बनेको छ। यसअघि उपाधिको दाबेदार मानिएको दक्षिण अफ्रिका र एसियाली टोली अफगानिस्तान विश्वकपको दौडबाट बाहिरिइसकेका छन्।
टस जितेर पहिले ब्याटिङ रोजेको भारतले निर्धारित ५० ओभरमा ७ विकेटको क्षतिमा २ सय ६७ रनको मध्यम योगफल खडा गरेको थियो।
कप्तान विराट कोहलीको अर्धशतक भारतका लागि प्रेरणा बनेको थियो। प्लेयर अफ दि म्याचसमेत बनेका कोहलीले टोलीका लागि सर्वाधिक ७२ रनको पारी खेले। यो जारी विश्वकपमा उनको लगातार चौथो अर्धशतकीय पारी हो। यसअघि उनले अफगानिस्तानविरुद्ध ६७, पाकिस्तानविरुद्ध ७७ र अष्ट्रेलियाविरुद्ध ८२ रन जोडेका थिए।
आजको खेलमा बनाएको ७२ रनको पारी सँगै उनी सबैभन्दा छिटो २० हजार अन्तर्राष्ट्रिय रन बनाउने खेलाडी बनेका छन्। सचिन तेन्दुलकर र राहुल द्रविडपछि यो आँकडा पार गर्ने उनी तेस्रो भारतीय ब्याट्सम्यान हुन्।
यस्तै भारतका विकेटकिपर ब्याट्सम्यान महेन्द्रसिंह धोनीले ५६, केएल राहुलले ४८ र हार्दिक पान्ड्याले ४६ रनको योगदान दिए। निकै उछाल आउने पिचमा भारतका ब्यट्सम्यानले वेस्टइन्डिजका बलरहरुका अघि निकै सुझबुझपूर्ण ब्याटिङ गरेका थिए।
किनकी यस्तो पिचमा वेस्टइन्डिजका उचो कदका बलरहरुले अधिकतम फाइदा लिन सक्थे। यसकारण पनि भारतलाई वेस्टइन्डिजले मध्यम योगफलमा रोकेको थियो।
वेस्टइन्डिजका लागि केमार रोचले ३ तथा जसोन होल्डर तथा सेल्डन कोट्रेलले समान २/२ विकेट हात पारे।
२ सय ६८ रनको लक्षसहित मैदानमा उत्रिएको वेस्टइन्डिजको सुरुवात राम्रो हुन सकेन। भारतका लागि खतरनाक आँकलन गरिएका विस्फोटक ब्याट्सम्यान क्रिस गेल ६ रनको व्यक्तिगत स्कोरमै पेवेलियन फर्किए। उनलाई मोहम्मद सामीले केदार जाधवको हातबाट क्याच आउट गराएका थिए।
वेस्टइन्डिजको स्कोर १६ रन पुग्दा उसले अर्को विकेट गुमायो। यसपटक आउट हुनेमा थिए साही होप र विकेट लिनेमा थिए उनै मोहम्मद सामी।
केही समय सम्हालिएर खेलेको वेस्टइन्डिज एक समय ७१/२ को अवस्थामा थियो। तर, विकेट गुमाउने सिलसिला नरोकिएपछि वेस्टविन्डिजले थप ७२ रन जोड्दा बाँकी ८ विकेट गुमाएको थियो।
उसका लागि निकोलस पुरनले सर्वाधिक २८ तथा सिम्रोन हेटमेयरले १८ रनको योगदान दिए। वेस्टइन्डिजका ६ जना ब्याट्सम्यानले दोहोरो अंकमा रन बनाउन सकेनन्।
वेस्टइन्डिजलाई दबाबमा राख्ने क्रममा मोहम्मद सामी एक्लैले ४ विकेट लिए। यसका लागि उनले ४.२ ओभरमा मात्र १६ रन खर्चिएका थिए। यसअघि पनि उनले अफगानिस्तानविरुद्धको खेलमा ह्याट्रिकसहित ४ विकेट लिएका थिए।
भारतका जस्प्रित बुम्राह र युजवेन्द्र चाहलले सामान २/२ विकेट हात पारे।
अब भारतले आगामी आइतबार आयोजक इंग्ल्यान्डको सामना गर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765768760.png)
-1763721444.png)
-1765273665.jpg)
