काठमाडौं– माथिको तस्बिर राम्ररी हेर्नुभयो? तस्बिरमा एकजना वयस्क र उनीसँगै टास्सिएकी बालिका उनकी छोरी हुन्। सबैभन्दा विरक्तलाग्दो कुरा त के भने, यो २ जना बाबुछोरीको शवको एक तस्बिर हो।
रियो ग्रान्ड नदीको घाँसे किनारामा देखिएका बाबुछोरीको शवको कथा शरणार्थी जीवनसँग जोडिएको छ।
सन् २०१५ मा सिरियाली बालक एलन कुर्दीको तस्बिर-कथा पनि यस्तै हृदयविदारक थियो। नदीको किनारामा घोप्टो अवस्थामा तैरिरहेको बच्चाको शवको दृश्यले संसारलाई अवाक् बनाएको थियो। ठिक त्यस्तै परिदृश्य दोहोरिएको छ फेरि।
मेक्सिन मिडियाका अनुसार यो तस्बिरमा देखिएका दुई बाबुछोरी एल साल्भेडरमा बस्दै आइरहेका अस्कर एलबेर्तो मारटिनेज यामिरेज र उनकी छोरी बलेरियाको हो। उनीहरु आफ्नो अस्थायी बासस्थान छोडेर शरणार्थीका रुपमा अमेरिका जान चाहन्थे। पटकपटक यसको प्रयास पनि गरेका थिए।
अमेरिकी–मेक्सिकन बोर्डर नजिकैको रियो ग्रान्डको यो दृश्यले फेरि शरणार्थीको गहिरो घाउलाई सतहमा ल्याइदिएको छ।
यो परिवारले अमेरिकामा शरण माग्न प्रयास गरिरहेको थियो। उनीहरुले पटकपटक अमेरिका पुग्न खोज्दा प्रयास सफल नभएपछि परिवार नै तनावमा रहेको मेक्सिन मिडियाहरुले लेखेका छन्।
आइतबार जब उनी नदी पार गरिरहेका थिए तब केही बेरका लागि नदी किनारामा बसेर आफ्नी श्रीमतीलाई प्रतीक्षा गरे। तर त्यति नै बेला उनकी छोरी बेलेरिया पानीमा खसिन्।
उनलाई बचाउन उनी पनि नदीमा हाम फाले। तर दुःखको कुरा उनले छोरी बचाउन सकेनन्। सक्दो प्रयास गरे। सन्तानको माया कति हुन्छ भन्ने कुरा यो तस्बिरले पनि बोलेको छ। उनले आफ्नो अन्तिम प्राण चलेसम्म प्रयास गरेकै हुनुपर्छ। छोरीलाई पानीमा भेटाए। तर जीवित छोरीलाई लिएर पानीबाहिर आउन हाम फालेका बाबुकै मृत्यु भयो। सानी छोरीले पानीमा नै अन्तिम सास फेरिन्। उनीहरुको शव नदी किनारामा फेला पर्यो।
यसपछि बालिकाकी आमा अर्थात् कुर्दीकी श्रीमती विक्षिप्त बनेकी छन्।
सोनोरामको मरुभूमीदेखि रियो ग्रान्डसम्म फैलिएको अमेरिकी–मेक्सिको सीमामा पछिल्लो थुप्रै समयदेखि हज्जारौं शरणार्थी छन्।
गत वर्ष यहाँ करिब २ सय ८३ शरणार्थीको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।