काठमाडौं- घरेलु टोली इंग्ल्यान्डलाई पराजित गर्दै अष्ट्रेलिया विश्वकप क्रिकेटको सेमिफाइनल पुग्ने पहिलो टोली बनेको छ। समूह चरणमा २ खेल खेल्न बाँकी रहँदै अष्ट्रेलिया विश्वकपको सेमिफाइनल पुगेको हो।
सेमिफाइनल पुग्नका लागि निकै महत्वपूर्ण मानिएको खेलमा अष्ट्रेलिया इंग्ल्यान्डमाथि हाबी भएको हो। ६४ रनको जित निकालेको अष्ट्रेलियाको ७ खेलमा १२ अंक भएको भएको छ र उ अंकतालिकाको शीर्ष स्थानमा उक्लिएको छ।
उता समान खेलमा ८ अंक जोडेको घरेलु टोली इंग्ल्यान्डका लागि भने सेमिफाइनलसम्मको यात्रा तय गर्न दबाब बढेको छ। इंग्ल्यान्डले अब जारी विश्वकपमा अपराजित र अंकतालिकामा आफूभन्दा माथि रहेका दुई टोलीहरु न्युजिल्यान्ड र भारतको सामना गर्नुपर्नेछ। अन्तिम ४ मा स्थान सुरक्षित गर्न इंग्ल्यान्डलाई यी दुवै खेलमा अनिवार्य जित हात पार्नुपर्ने चुनौती छ।
यदि इंग्ल्यान्डले दुवै खेलमा पराजय बेहोर्ने हो भने त्यसको प्रत्यक्ष फाइदा बंगलादेश, पाकिस्तान र श्रीलंकालाई मिल्नेछ। यी तीन वटै टोली अंकतालिकामा इंग्ल्यान्डपछि छन्।
लर्डस्को ओभल मैदानमा टस हारेर ब्याटिङमा उत्रिएको अष्ट्रेलियाले निर्धारित ५० ओभरमा ७ विकेटको क्षतिमा २ सय ८५ रनको योगफल तयार गर्यो। प्रारम्भिक ब्याट्सम्यानहरु एरोन फिन्च र डेभिड वार्नरले उत्कृष्ट शतकीय साझेदारी गरेपछि अष्ट्रेलियाले सो योगफल तयार गरेको हो। फिन्चले ११ चौका र २ छक्काको मद्दतमा १ सय रन प्रहार गरे।
आउट हुनुअघि वार्नरले ५३ रन बनाए। यस्तै स्टेभन स्मिथ र एलेक्स क्यारीले समान ३८ रनको योगदान दिए।
इंग्ल्यान्डका क्रिस वोयक्सले २ विकेट लिए।
२ सय ८६ रनको विजयी लक्ष लिएर मैदान उत्रिएको इंग्ल्यान्डको सुरुवात राम्रो हुन सकेन। दोस्रो बलमै जेम्स भिन्सलाई गुमाएको इंग्ल्यान्डले टोलीको स्कोर ५३ रन हुँदा ४ विकेट गुमाइसकेको थियो। मध्यक्रममा मध्यक्रममा ब्याटिङ गर्न आएका बेन स्टोक्सले ८९ रन बनाउनु बाहेक अन्य कुनै पनि ब्याट्सम्यानले सम्झिनलायक प्रदर्शन गरेनन्।
इंग्ल्यान्डको जितका लागि बलियो खम्बा मानिएका बेन स्टोक्सलाई सटिक योर्कर बलमार्फत मिचेल स्टार्कले आउट गराउनु ने खेलको टर्निङ पोइन्ट बन्यो।
टिभी कमेन्टेटरहरुले स्टार्कको सो योर्कर जारी विश्वकपकै उत्कृष्ट योर्कर बल रहेको टिप्पणी गरे। उनीहरुले सोही योर्कर बल नै अष्ट्रेलियाको जितको प्रमुख कडी रहको समेत दाबी गरेका थिए।
स्टोक्स पेवेलियन फर्केपछि इंग्ल्यान्डले ४४ रन मात्र जोड्न सकेको थियो।
इंग्ल्यान्डलाई २ सय २१ रनमा समेट्ने क्रममा जसोन ब्हेरेन्ड्रोफले ५ तथा स्टार्कले ४ विकेट हात पारे। योसँगै स्टार्क १९ विकेटका साथमा जारी प्रतियोगितामा सर्वाधिक विकेट लिनेमा शीर्ष स्थानमा उक्लिएका छन्। स्टार्कपछि जोफ्रा आर्चरले १६ तथा मोहम्मद आमिरले १५ विकेट लिएका छन्।
सबैभन्दा बढी रन बनाउने सूचीमा पनि अष्ट्रेलियाका प्ररम्भिक ब्याट्सम्यानद्वय फिन्च र वार्नर नै छन्। वार्नरले ५ सय र फिन्चले ४ सय ९६ रन बनाएका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।