काठमाडौं- २५ वर्षे उत्सव मनाइरहेको नेपथ्यले म्युजिक भिडियो रिलिज गर्ने क्रममा ब्यान्डकै पहिलो गीत छनोट गरेको छ। ब्यान्डको पहिलो गीत ‘आँगनैभरि हिउँ नै झरे, आरुफूल है टिपी राखे है’ लाई भिडियोको नयाँ आवरणमा ल्याएको हो।
यो गीत नेपथ्यको सांगीतिक जीवनमा सबैभन्दा पहिले रेकर्ड हुनुका साथै पहिलो एल्बमकै पहिलो गीतका रुपमा प्रस्तुत भएको थियो। पहिलो एल्बम सन् १९९३ को अप्रिल १ तारिखमा रिलिज भएको आधारमा त्यसै दिनलाई नेपथ्यको स्थापना दिवस पनि मानिएको छ।
नब्बेको दशकको सुरुवातमा पोखराका तीन तन्नेरी दीपकजंग राणा, भीम पुन र अमृत गुरुङको प्रयासबाट नेपथ्य ब्यान्डको जग हालिएको थियो। त्यसपछि रविन श्रेष्ठ, सुरेश पुन र बुद्धि गुरुङले यो टोलीसँग सहकार्य गरेपछि नेपथ्यको पहिलो एल्बम जन्मिएको थियो।
‘नब्बेको दशक प्रारम्भमा यस गीतका शब्दहरु केलाउँदै मैले र दिपकले संगीत भर्ने कोशिस गर्दाका क्षण म अहिले पनि सम्झन्छु,’ नेपथ्यका अगुवा एवं मुख्य गायक अमृत भन्छन्, ‘पछि रेकर्ड हुँदा यसमा स्वर चाहिँ रविनले दिएका थिए।’
नेपाली संगीतमा संलग्न भएर नेपथ्यले २५ वटा स्वर्णिम वर्षहरु बिताइसकेको छ । त्यस क्रममा ब्यान्डले २१ जना संगीतकर्मीहरु उसका सदस्यका रुपमा भित्र्याउने र विदा गरिसकेको छ।
‘यो म्युजिक भिडियो २५ वर्ष लामो यात्रामा ब्यान्डलाई योगदान दिने तमाम सदस्यहरुप्रति आभार प्रकट गर्ने माध्यम पनि बनेको छ,’ नेपथ्यलाई प्रवर्द्धन गर्दै आएको नेपालयका किरणकृष्ण श्रेष्ठ भन्छन्, ‘भिडियोमा उनीहरु सबैलाई सम्झने कोसिस गरिएको छ।’
यो भिडियो नेपथ्यको वर्तमान टोलीले प्रस्तुत गर्दाको प्रत्यक्ष रेकर्डमा आधारित छ। बुटवलमा २०७३ फागुन १४ मा नेपथ्यको कन्सर्टका बेला गाइएको आवाज नै यसमा प्रयोग गरिएको हो। त्यसैगरी दृश्यहरु पनि बुटवलको कालिका स्कुल, काठमाडौंको टुँडिखेल र पोखराको रंगशालामा कन्सर्ट गर्दाका क्षणबाट लिइएको हो।
‘पहिलो एल्बमका निम्ति खिचिएका तस्बिरहरु हेर्दा म यो गीत रिलिज गर्ने क्षणहरु सम्झन पुग्छु जसले मलाई यो उमेरसम्मको लामो यात्रामा आइपुग्दाका प्रारम्भिक दिनहरुको सम्झना गराउँछ,’ अमृत भन्छन्, ‘त्यतिबेला २५ वर्षे ठिटो अहिले ५० पुग्नै लागेको छु । उमेरसँगै कपाल खरानी रंगमा परिणत हुँदै गएका छन्। यसरी सबैथोक फेरिँदा पनि हामीलाई मन पराइदिने श्रोता-दर्शक चाहिँ सदैव उस्तैगरी जहाँको त्यहीँ रहिरहेको, अझ वृद्धि हुँदै गएको देख्दा एक किसिमको अनुगृहित हुन पुगिँदोरहेछ। उहाँहरुको साथ रसहयोग नभइदिएको भए हामीले यति लामो यात्रा तय गर्नै सक्दैन थियौं ।’
नेपथ्यले रजत वर्ष मनाउन थालेदेखि नै आफ्ना हरेक कन्सर्टमा नबिराई यो गीतलाई प्रस्तुत गर्दै आएको छ। त्यसैगरी ब्यान्डले जसै यो गीत गाउन सुरुगर्छ त्यसै क्षण एउटा ठट्टा पनि गरिदिन्छ।
‘२५ वर्ष बूढो गीत पो हो यो,’ गायक अमृतले भनिदिन्छन्, ‘यो कन्सर्टमा उपस्थित हुनुभएका धेरैलाई हेर्दा तपाईंहरु त यो गीत आएको बेलामा जन्मिनु पनि भएको थिएन।’
अमृतले यसो भनेपछि उपस्थित श्रोता-दर्शकहरु माझ हाँसो फैलिनुका साथै आफ्नो प्रिय गीत सुन्नका निम्ति ताली बज्न थालिहाल्छ।
यो गीत जसरी नयाँ श्रोताहरुको निम्ति नयाँ गीत हो, त्यसैगरि अमृतसँगै पाको हुँदै गएकाहरुको निम्ति भने एउटा लामो कालखण्डको सहयात्रा स्मरण गराउने माध्यम ।कन्सर्टहरुमा चालिस आसपासका श्रोता, मुख्यतः महिला श्रोताहरु प्रायः गायकसँगै साथमा साथ मिलाएर गाइरहेका देखिन्छन्।
‘नेपथ्यको २५ वर्षे लामो यात्रामा साथ र सहयोग दिने सबै प्रतिभाशाली सहकर्मी र साथीहरुलाई म फेरि पनि धन्यवाद दिन चाहन्छु,’ अमृत भन्छन्, ‘हामीलाई सदैब साथ र हौसलादिँदै आउनुभएका तमाम श्रोताहरु प्रति पनि आभारी छौं।’
श्रोता-दर्शकका शुभकामना र ब्यान्डका वर्तमान सदस्यहरुको प्रतिबद्धताले नेपथ्यलाई नेपाली संगीतको फाँटमा उत्तिकै लगनशीलताका साथ अघि बढ्न ऊर्जा मिलिरहेको अमृतबताउँछन्।
नेपथ्यमा यतिबेला अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुविन शाक्य, गितारमा निरज गुरुङ र मादलमा शान्ति रायमाझीले सघाउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
