राजविराज– बालिकालाई अपहरण गरी बन्धक बनाएर बलात्कार गरेको आरोपमा सप्तरीमा एक १६ वर्षीय किशोर पक्राउ परेका छन्। इलाका प्रहरी कार्यालय कञ्चनपुरले किशोरलाई पक्राउ गरेको हो।
बालिकाको बयान र उजुरीका आधारमा पक्राउ गरिएको इलाका प्रहरी कार्यालय कञ्चनुरका डिएसपी मकेन्द्रकुमार मिश्रले बताए। बालिकाले किशोरविरुद्ध दिएको बलात्कारको उजुरीसमेत दर्ता भएको उनले जानकारी दिए।
बालिकाले दर्ता गराएको उजुरीमा गत बैसाख १५ गते आरोपितले आफूलाई जुसमा नसालु पदार्थ खुवाएर बेहोस बनाई काठमाडौं लगेको र कोठामा बन्धक बनाएर बलात्कार गरेको उल्लेख छ। किशोरले भने आफूहरु बीचमा लामो समयदेखि प्रेम सम्बन्ध रहेको र सहमतिमै काठमाडौं गएको बताएका छन्।
‘हाम्रो बीचमा प्रेम सम्बन्ध थियो, त्यसैले सहमतिमै भागेर काठमाडौं गएका हौं,' उनले भने, ‘परिवारले दबाब दिएर झुठो उजुरी दर्ता गराइएको छ, बलात्कारको आरोप गलत छ।’
आफू दलित र केटी गैरदलित भएकै कारण षडयन्त्रपूर्वक आफूलाई फसाइएको उनको आरोप छ। दलित भएर गैरदलित केटी भगाएको भन्दै केटी पक्षका मानिसहरुले आफ्नो परिवार र गाउँले समेतलाई शारीरिक र मानसिक यातना दिन थालेपछि काठमाडौंबाट पनि आफूहरु सहमतिमै घर फर्केर प्रहरीमा उपस्थित भएको उनको भनाइ छ।
केटी पक्षको षडयन्त्रमा परेर प्रहरीले समेत आफूविरुद्ध झुटो मुद्दा दर्ता गरेको किशोरले गुनासो गरे।
यस्तो थियो घटना
बलात्कारको आरोप लागेका किशोरले गत बैसाख १३ गते विवाह गरे। तर, विवाहको तेश्रो दिन (बैसाख १५ गते) बित्न नपाउँदै उनी घरबाट बेपत्ता भए। घरमा नयाँ बेहुली भित्र्याएर बेपत्ता भएका किशोरले प्रेमीका लिएर भागेको हल्ला चल्यो।
दलित केटाले गैरदलित केटी भगाएको भन्दै केटी पक्षले किशोरलाई झिकाउन परिवारलाई दबाब दिए। यही बीचमा किशोरीकी आमा दुर्घटनामा परेर अस्पताल भर्ना भएपछि केटी पक्षले गाउँलेलाई समेत निसाना बनाए। घरबाट भागेका किशोर/किशोरी फर्केर आउने सम्भावना नदेखेपछि बैसाख २४ गते ‘छलफल गर्नुछ’ भन्दै बोलाएर सबैलाई कुटपिट गरेको गाउँलेहरुको गुनासो छ।
दलित समुदायका व्यक्तिलाई कुटपिट गर्न वडा अध्यक्षले नै नेतृत्व गरेको गाउँलेको आरोप छ। न्यायको माग गर्दै उनीहरु बैसाख २५ गते सदरमुकाम राजविराज आए। तर, इलाका प्रहरी कार्यालयमा उजुरी दिनुपर्ने जानकारी पाएपछि उनीहरु फर्किएका थिए।
केटी पक्षले केटाको परिवारमा लगातार दबाब दिने र प्रताडित गर्ने कार्य निरन्तर जारी राखेपछि जेठ ३१ गते दुवै जना फर्केर आएको र उनीहरुलाई प्रहरीले पक्राउ गरेको स्थानीयले जानकारी दिए। ‘केटो नबोलाएको भन्दै उनका बुवालाई प्रहरीले नियन्त्रणमा लियो,’ दलित सरोकार मञ्चका अध्यक्ष युक्ति मरिवकले भने, ‘प्रहरी नै दबाब दिनमा लागि परेपछि दुवै जना काठमाडौंबाट फर्किएका हुन्।’
केटो दलित समुदायको भएकै कारण षड्यन्त्रपूर्वक बलात्कारको उजुरी दर्ता गराइएको उनको आरोप छ। प्रहरीको आडमा भइरहेका यस्ता क्रियाकलाप नसच्याए 'छुवाछुत तथा कसुर र सजाय ऐन, २०६८' अन्तर्गत मुद्दा दर्ता गर्ने उनले चेतावनी दिएका छन्।
डिएसपी मिश्रले भने केटीले मुद्दा लिएर आएपछि दर्ता गरेर अनुसन्धान सुरु गरिएको बताए। ‘अनुसन्धान भइरहेको छ, बयान हुन बाँकी छ,’ उनले भने, ‘अनुसन्धानले जे देखाउँछ, त्यसैअनुसार मुद्दा अगाडि बढ्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
