काठमाडौं- नेकपा एमालेका नेता शेरधन राईले दुई साताभित्र नयाँ सरकार बन्ने दाबी गरेका छन्।
रिपोर्टर्स क्लब नेपालको साक्षात्कारमा नेता राईले दलहरुबीचको सहमतिमा राष्ट्रियसभा गठनसम्बन्धी अध्यादेशको विवाद टुंगो लागेर निर्वाचनको सम्पूर्ण नतिजा आएपछि दुई साताभित्र नयाँ सरकार बन्ने बताए।
'राष्ट्रपतिलाई विवादमा ल्याउने काम वर्तमान सरकारले गरेको छ', उनले भने, 'राजनीतिक सहमतिमा अध्यादेश टुंगो लगाउनुपर्छ।'
नेता राईले मुलुकलाई स्थिर, सुशासन र शान्तिको बाटोमा लैजान जनताले वाम गठबन्धनलाई बहुमत दिएको भन्दै एमालेका अध्यक्ष केपी शर्मा ओलीको नेतृत्वमा नयाँ सरकार बन्ने बताए।
पूर्वमन्त्री राईले एमाले र माओवादी केन्द्रबीच पार्टी एकताबारे छलफल अगाडि बढिसकेको भन्दै पार्टी नेतृत्व कसले गर्ने भन्ने विषय आपसी समझदारीमा निर्धारण हुने स्पष्ट पारे।
प्रदेश नम्बर १ को मुख्यमन्त्रीका रुपमा समेत हेरिएका नेता राईले उक्त प्रदेशमा भएका प्राकृतिक सम्पदाको प्रयोग गरेर नमुना प्रदेश बनाउने बताए। त्यसका लागि आफूले गुरुयोजना समेत बनाइसकेको उनले उल्लेख गरे। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
