काठमाडौं– मेलम्ची खानेपानी आयोजनाको ठेक्का प्राप्त गरी काम गर्न पुगेको कम्पनीलाई स्थानीय ठेकेदारले फर्काइदिएका छन्।
पीडित व्यवसायीले आफ्नो रकम भुक्तानी नदिएको भन्दै मेलम्ची खानेपानी आयोजनाको मुहान क्षेत्रमा काम गर्न आएका श्रेष्ठ कन्ट्रक्सनलाई उनीहरुले फर्काईदिएका हुन्।
सरकारले सुटुक्क मुहानको हेडबक्सलगायतका अन्य काम गर्ने जिम्मा श्रेष्ठ कन्ट्रक्सनलाई दिएको थियो। कामको जिम्मा पाएपछि कम्पनी कामदार बोकेर मेलम्चीको मुहान पुगेको थियो। तर स्थानीयले आयोजनामा आफूहरुको डुबेको रकम पहिला भुक्तानी दिएपछि मात्र काम सुचारु गर्नु पर्ने नत्र अवरोध हुने चेतावनी दिएपछि श्रेष्ठ कन्ट्रक्सनका मानिसहरु फर्केको स्थानीय संर्घष समितिमा अध्यक्ष उत्तरकुमार श्रेष्ठले बताए।
‘काम गर्न आएका ठेकेदार कम्पनीका मानिसलाई हामीले आफ्नो समस्या र मागको बारेमा जानकारी गरायौं’ उनले भने, ‘ स्थानीयको उक्त आवाज सुनेपछि माथि कुरा गर्ने भन्दै श्रेष्ठ कन्ट्रक्सनका कर्मचारी फर्केका हुन्। ’इटालिएन कम्पनी सिएमसीलाई रकम नदिएर भागेपछि टेन्डर खुलाएर मेलम्चीले अर्को ठेक्का प्रक्रिया थालेको थियो।
स्थानीयबासीलगायत निर्माण व्यावसायीहरुको डेढ अर्ब भुक्तानी पाउनु पर्ने माग राखेर आन्दोलनरत छन्। ‘हामीले सल्लाहले नै आफूहरुले सिएमसीसँगको गरेको कामको पैसा मागेका हौं’ उनले भने, ‘तीन अर्ब धरौटी जफत भएकाले त्यहीबाट भुक्तानी दिनु पर्दछ।
आफूहरुले सरकारसँग रकम नमागेको भन्दै उनले आयोजना छिटो सुरु गर्न पहल होस् भन्ने आफूहरुको माग भएको उनले बताए।
मन्त्रिपरिषद्ले सबै अधिकार खानेपानी आयोजनालाई दिएको अवस्थामा किन हाम्रो भुक्तानी रोकिने भन्ने आफूहरुको प्रश्न भएको उनले बताए। हाम्रो रकम भुक्तानी नदिएसम्म काम चल्न नदिने जानकारी सरोकारवालाहरुले यसअघि देखि नै दिदै आएका छन्।
यता स्थानीय सरकारले पनि स्थानीय समस्या समाधान नगरी मेलम्ची लाने सपना नदेख्न खुलेर चेतावनी दिँदै आएको छ। खानेपानी आयोजनाको काम सुरु गर्न पहल गरिदिन आयोजनाका कार्यकारी निर्देशक सूर्यराज कडेँलले स्थानीय हेलम्बु गाउँपालिकाका अध्यक्ष निमा ग्याल्जेन शेर्पालाई आग्रह पनि गरेका छन्।
आयोजनाका कार्यकारी निर्देशक कँडेलले मोबाइलबाट म्यासेज गरेर काममा अवरोध आए स्थानीय जिम्मेवार हुने भन्दै म्यासेज समेत पठाएका छन्। कार्यकारी निर्देशकको उक्त सन्देशपछि स्थानीयहरु झन् आक्रोशित बनेका छन्। 'कार्यकारी जस्तो जिम्मेवार व्यक्तिले के लेख्ने हो के गर्ने हो भन्ने थाहा छैन?' हेलम्बु गाउँपालिकाका अध्यक्ष निमा ग्याल्जेन शेर्पाले आक्रोश पोखे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।