प्रदीप यादव पर्सा १ बाट विजयी सांसद हुन्। संघीय समाजवादी फोरमका तर्फबाट चुनावमा प्रतिस्पर्धा गरेका उनले २१ हजार १ सय ३२ मत पाए। उनका मुख्य प्रतिस्पर्धी कांग्रेसका अनिलकुमार रुंगटाले १६ हजार ४ सय ८१ मत पाए।
यादव पहिलो पटक सांसद भएका हुन्। नेपाल लाइभले सुरु गरेको 'संसदमा नयाँ अनुहार' शृंखलाका लागि यादवसँग किशोर दहालले गरेको कुराकानी :
जनताले तपाईंलाई किन सांसद बनाए भन्ने लाग्छ?
मधेसको अधिकारको सवाल छ। संविधान संशोधन गरेर त्यो अधिकारको सुनिश्चितता गर्नुपर्नेछ। त्यसलाई निश्चित गर्न नै मलाई जनताले सांसद बनाएका हुन्। त्यस्तै कांग्रेस एमालेले २८ वर्षसम्म शासन गर्दा पनि यहाँ विकास गर्नेतर्फ ध्यान दिएनन्। त्यसैले पनि अब विकास गर्न र विकासको गति बढाउनको लागि जनताले मलाई मत दिएर सांसद बनाएका हुन्।
कांग्रेस एमालेले २८ वर्षसम्म गर्न नसकेको र गर्न ध्यान नदिएको विकास तपाईंले पाँच वर्षमा गर्नुहुन्छ भन्ने आधार के छ?
म मुखले भनेर होइन, काम गरेर देखाउँछु। कथनी र करनीमा फरक पर्छ। मसँग विकासको भिजन छ। त्यही भिजन अनुसारकै काम गरेर देखाउँछु।
केके काम गर्ने भिजन छ तपाईंको?
कामहरु धेरै छन्। पर्साका चार वटै क्षेत्रको गाउँतिर जानुभयो भने एक किलोमिटर पनि पिच रोड देख्नुहुन्न। सहरका पनि दुर्दशा त्यस्तै छ। पानी पर्दा हिँड्ने ठाउँ हुँदैन। स्कुल गइरहेका बच्चाहरुलाई बोकेर स्कुल पुर्यापउनुपर्छ। पानीको निकास गर्नेतर्फ कसैको ध्यान गएको छैन। सडक पनि व्यवस्थित छैन। सामुदायिक स्कुलहरु धराशायी भएका छन्। तिनीहरुको भवन गतिलो छैन।
स्वास्थ्य, सडक, नाला सबै खराब छ। अरु पनि धेरै समस्या छ। मैले प्राथमिकतामा राखेको मुख्य कामहरु यस्तै छन्। युवाको रोजगारीको विषय पनि मेरो प्राथमिकता छ। दहेज प्रथाको जालो पनि मधेसमा चर्को छ। त्यसलाई चिर्न पनि जनचेतना फैलाउनुपर्नेछ।
अरु केही ठूला योजनाका कामबारे पनि पहल गर्ने सोच्नुभएको छ कि?
वीरगञ्जजमा विश्वविद्यालय बनाउन पहल गर्नेछु। अन्य ठूला योजनाका बारेमा यहाँका सरोकारवालाहरुसँग छलफल गरेर अगाडि बढ्ने हो।
तपाईं पहिलो पटक सांसद बन्नुभएको छ। संसद कस्तो होला भन्ने ठान्नुभएको छ?
म पनि सानो उमेरदेखि राजनीति गरेको मान्छे हुँ। सांसद र मन्त्री धेरै देखेको छु। यो चिज कस्तो होला भनेर मलाई सबै थाहा छ। कस्तो काम गर्न सकिन्छ, बाँकी सबै पछि नै थाहा हुन्छ। तर म लोभपाप चाहिँ गर्दिन। त्यसो नगरेर जनताको विकास गर्न सकिने कुरामा विश्वास गर्छु। सांसदको रुपमा गर्नुपर्ने काम धेरै छ। म त्यसको जानकारी छ। यो बीचमा काम नै गर्छु, सुतेर बिताउँदिनँ।
तपाईंले संविधान संशोधन गर्न जनताले जिताएका हुन् भन्नुभयो। त्यसका लागि तपाईंको तर्फबाट केके पहल हुनेछ?
संसदमा हाम्रो बहुमत छैन। बहुमत त एमाले र माओवादीको बहुमत छ। त्यसैले हाम्रो पार्टीको कस्तो नीति हुन्छ, अध्यक्षज्युले कस्तो पहल गर्नुहुन्छ; म त्यसलाई नै सघाउँछु।
हुन त मधेसमा हामीले पाएको मतलाई ठूला दलले पनि कदर गर्नुहोला नि! उनीहरुले पनि हामीले पाएको मतको अर्थ बुझ्नुपर्छ। नेपालको शान्ति र समृद्धिको लागि उहाँहरुले हामीलाई साथ दिनुहुन्छ भन्ने विश्वास छ। उहाँहरुले साथ दिनुभयो भने नै देशमा छिटो समृद्धि आउँछ। मधेस पनि समृद्ध हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785910910.png)
-1764146706.png)
