काठमाडौं- विवादास्पद सुपुर्दगीसम्बन्धी विधेयकविरुद्ध प्रदर्शन चर्केपछि हङकङ सरकार तत्काका लागि पछि हटेको छ।
बढ्दो विरोधलाई मध्यनजर गर्दै हङकङकी प्रमुख कार्यकारी क्यारी लामले शनिबार उक्त विधेयक स्थगित गरेको घोषणा गरेकी हुन्।
‘विधेयकका लागि संवाद र व्याख्यामा केही कमजोरी भएको मैले स्वीकार गर्नुपर्छ,’ शनिबार आयोजित पत्रकार सम्मेलनका क्रममा उनले भनिन्, ‘हङकङ मुख्यरूपमा शान्ति र सुव्यवस्था कायम गर्न क्रियाशील छ।’
बुधबार विधेयकको विरोधमा प्रदर्शन भएको थियो। प्रदर्शन हिंसात्मक भएपछि हङकङमा प्रहरीले प्रदर्शनकारीमाथि रबरका गोली प्रहार गरेको थियो। प्रदर्शनकारीले मुख्य सरकारी भवन रहेका सडक अवरुद्ध गर्दै प्रहरीमाथि इँटा प्रहार गरेका थिए।
प्रदर्शकारीमाथि प्रहरीले रबरका गोली प्रहार गरेको दशकपछिको यो पहिलो घटना हो। प्रदर्शनमा २२ जना घाइते भएका थिए।
आइतबार पनि त्यहाँ ठूलो प्रदर्शन भएको थियो। प्रदर्शनमा लाखौँ मानिस सहभागी भए। प्रहरी र प्रदर्नकारीहरूबीच हिंसात्मक झडपसमेत भएको थियो।
सेतो पोसाकमा देखिएका प्रदर्शनकारीले चर्को गर्मीमा पनि घण्टौं प्रदर्शन गरेका थिए। प्रदर्शनमा मुख्यगरी प्रजातन्त्र पक्षधर व्यवसायी, विद्यार्थी र धार्मिक समूह सहभागी थिए र प्रदर्शन मूलतः शान्तिपूर्ण थियो।
प्रदर्शनको कारण
गत वर्षको फेब्रुअरीमा हङकङका १९ वर्षीय युवामाथि ताइवानमा बिदा मनाउन सँगै गएकी आफ्नी २० वर्षीया गर्भवती प्रेमिकाको हत्या गरेको अभियोगपछि उनको सुपुर्दगीका लागि कानुन संशोधनको उक्त प्रस्ताव आएको छ।
ती युवा ताइवानबाट भागेर हङकङ फर्किएका थिए। ताइवानका अधिकारीहरूले उनलाई सुपुर्दगी गर्न हङकङका अधिकारीहरूलाई आग्रह गरेका थिए।
तर, ताइवानसँगको सुपुर्दगी सम्झौताको अभावका कारण त्यसो गर्न नसकिने उत्तर हङकङका अधिकारीहरूको उठाएका थिए।
कानुनमा गरिने परिवर्तनपछि हत्या र बलात्कारजस्ता आपराधिक आरोप लागेका अभियुक्त आफूसमक्ष सुपुर्दगी गर्न चीन, ताइवान र मकाउका अधिकारीहरूले आग्रह गर्ने बाटो खुल्ने आशंका उक्त विधेयकका आलोचकहरूको छ।
हङकङका अधिकारीहरूले भने सुपुर्दगी गर्ने अनुमति दिने वा राजनीतिक वा धार्मिक अपराधका सन्दिग्धलाई सुपुर्दगी नगर्ने अन्तिम अधिकार हङकङको अदालतमा रहेको बताएका छन्।
सरकारले भने कम्तीमा ७ वर्षको जेल सजाय पाएर भागेकालाई मात्रै सुपुर्दगी गर्ने भन्दै सर्वसाधारणलाई आश्वस्त पार्न खोजेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_k6NyB2pvBh-1772612065.jpg)
-1764146706.png)
