काठमाडौं– काठमाडौंमा जारी एभरेस्ट प्रिमियर लिग (इपिएल) क्रिकेट प्रतियोगिताअन्तर्गत शुक्रबार चितवन टाइगर्स र विराटनगर वारियर्सबीच खेल हुनुअघि चितवनले समाजिक सञ्जालमा एउटा भावुक सन्देश पोस्ट गर्यो। जसमा उसले आफ्नो टिमका कप्तान पृथु बाँस्कोटाको जर्सी पोस्ट गर्दै लेख्यो–‘वि मिस यु पृथु’।
शुक्रबारको खेलमा पृथु क्रिकेट मैदानमा थिएनन्, उनी टेकुस्थित प्रहरी हिरासतमा आफ्नो टोलीको खेल टेलिभिजनमा हेरिरहेका थिए।
अघिल्लो बुधबार दरबारमार्गको ‘डेजा भू’ नाइट क्लबमा भएको तोडफोड घटनापछि उनलाई प्रहरीले हिरासतमा लिएको थियो। उनी विरूद्ध प्रहरीले ठगी मुद्दामा कार्यवाही अगाडि बढाएको छ। प्रहरी हिरासतमा उनीसहित ७ जना छन्।
अमेरिकी डिजे मार्समेलो घोषित कार्यक्रमका लागि क्लबमा उपस्थित नभएपछि आक्रोशित भीडले क्लब तोडफोड गरेको थियो। नियोजित रुपमा ठगी गरेको हुनसक्ने भन्दै प्रहरीले आयोजकद्वय रितेश मारवाडी र राजेश महर्जनसहित क्लबका सञ्चालकलाई समेत पक्राउ गरेको थियो।
क्लबमा पृथुको पनि सेयर थियो। यसैले पृथुसहित सञ्चालक जयन श्रेष्ठ, मयंक खड्का, विशाल डाँगी र मिलन श्रेष्ठविरूद्ध प्रहरीले ठगी मुद्दा अघि बढाएको छ। अदालतबाट सुरुमा ७ र पछि ४ दिन हिरासतमा राख्ने अनुमति पाएपछि पृथु अझै केही दिन थुनामै रहने छन्।
‘डेजा भू’ काण्ड र उनको क्रिकेट करिअरलाई लिएर नेपाल लाइभका लागि सीताराम कोइरालाले शुक्रबार टेकुस्थित महानगरीय प्रहरी परिसरमा गरिएको कुराकानी :
वास्तवमा ‘डेजा भू’ क्लबमा त्यो दिन भएको के थियोे?
वास्तविक कुरा हामीले भेन्यू भाडामा उपलब्ध गराएका हौं। कार्यक्रमबारे सञ्चालकलाई कुनै सरोकार हुँदैन। टिकट बिक्रिमा पनि हाम्रो संलग्नता हुँदैन्। सबै आयोजकको हातमा हुन्छ। कार्यक्रममा हामी सञ्चालकलाई समेत छिर्ने अनुमति हुँदैन्। टिकट र भित्रको व्यवस्थापन पनि आयोजक कै हातमा हुन्छ।
कार्यक्रममा उनीहरूले बोलाएको कलाकार आइपुग्नु भएन। ज्वरो आएको हुनाले द्वारिकाज होटलमै बस्नु भएछ। कलाकार समयमै आउन नसक्ने कुरा आयोजकले ढिला बताएपछि उपस्थित भिड भड्कियो।
भिड अनियन्त्रित भएको समय म क्लब भित्र थिइन। मैले कलाकार नआउने कुरा सार्वजनिक गर्नुभन्दा २ मिनेटअघि मात्र थाहा पाएँ। यसपछि मलाई लागिसकेको थियो, केही गडबड पक्कै हुन्छ। हतार–हतार क्लबभित्र पुग्दा स्टेजहरू भताभुंग भइसकेको रहेछ।
घटनाले तपाईको करिअरमा कत्तिको असर पर्ने अनुमान गर्नु भएको छ?
ईपिएल खेल्न पाइन। एकदमै दुःख लागेको छ। मेरो विषयमा नकारात्मक टिप्पणी पनि भइरहेको छ। तर, मैले नराम्रो केही गरेको छैन्। त्यसैले म विचलित छुईन्। आफै गरि खान व्यावसाय गरेको हुँ।
तपाईंहरुको पनि कमजोरीका कारण घटना भएको प्रहरी आरोप छ नी?
आयोजकको त्रृटीका कारण भएको घटनामा सञ्चालकलाई मुद्दा हाल्ने काम भएको छ। यसबाट म स्तब्ध छु। हामीले ठगी गर्नका लागि आयोजकलाई क्लब भाडा दिएको होइनौं।
कलाकार नआएपछि टिकटको पैसा फिर्ता गर्न सञ्चालकहरूले पहल गर्नु भएन भन्ने छ नी?
होइन, होइन। हामीले टिकट विक्रि नै गरेका होइनौं। कसरी फिर्ता गर्नु? हामीले आयोजकलाई भेन्यु मात्र बेचेको हो। व्यवस्थापनको सबै जिम्मा उनीहरूको हुन्छ। त्यसैले पैसा फिर्ता गर्ने जिम्मेवारी पनि उनीहरूकै हो। उनीहरूले पैसा फिर्ता गर्छु पनि भनिसकेका थिए।
तपाई ‘डेजा भू’ मा कसरी आवद्ध हुनुभयो?
‘प्लस टु’ पढेका मिल्ने साथीहरूले प्रस्ताव ल्याएका थिए। प्रस्ताव राम्रो लागेपछि सेयर किनेको हुँ। ‘डेजा भू’ मा मेरो १० प्रतिशत सेयर छ। पछिल्लो समय राम्रोसँग चलिरहेको पनि थियो। त्यसै इस्यु बनाउनु नपर्ने कुरालाई इस्यु बनाइयो।
क्रिकेट करिअरमा यसले कत्तिको धक्का पुग्ने अनुमान गर्नु भएको छ?
ईपिएल निकै ‘मिस’ भइरहेको छ। मैले टिभिबाट आफ्नो टिम चितवनको खेल हेरिरहेको छु। लगातार तीन खेलमा पराजित भइसकेको छ। कप्तान भएको नाताले नराम्रो लागिरहेको छ। ईपिएल खेल्न पाएको भए अर्के हुन्थ्यो। तर, ठ्याक्कै क्याम्पका लागि हिड्न पर्ने समयमा यहाँ आउनु पर्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
