चितवन– नेपाल कम्युनिष्ट पार्टी (नेकपा) का अध्यक्ष एवं पूर्वप्रधानमन्त्री पुष्पकमल दाहाल प्रचण्डले कृषिमा आधारित अर्थतन्त्र र उद्योगबाट मात्रै आर्थिक समृद्धिको नयाँ युगको सूत्रपात गर्न सम्भव हुने बताएका छन्।
कृषि तथा वन विज्ञान विश्वविद्यालयले रामपुरमा आयोजना गरेको कृषि मेलाको शनिबार उद्घाटन गर्दै प्रचण्डले भने– 'कृषिको विविधिकरण, आधुनिकीकरण, विज्ञान र प्रविधिको सदुपयोग गरेर तीन करोड होइन, दस करोडलाई खान पुग्ने उत्पादन गर्न सकिने तागत नेपालको जमिनमा छ। नेपाली किसानहरुमा छ।’
'जबसम्म कृषिमा आधारित उद्योगहरु स्थापना गर्ने कुरा अगाडि बढ्दैन, बेरोजगारीको समस्याको समाधान पनि हुँदैन', उनले भने, 'कृषिमा आधारित अर्थतन्त्र र कृषिमा आधारित उद्योगले मात्रै हामीले नेपालको आर्थिक क्रान्ति वा आर्थिक समृद्धिको नयाँ युगको सूत्रपात गर्न सम्भव छ।'
प्रचण्डले कृषि तथा वन विज्ञान विश्वविद्यालयलाई नेपालको विशिष्ट, उत्कृष्ट र दक्षिण एसियाको नमुना विश्वविद्यालय बनाउनु पर्नेमा जोड दिए। ‘नयाँ संकल्पका साथ उत्पादन वृद्धि र रोजगारी सृष्टिको साथ नयाँ अभियानका रुपमा अगाडि लैजान जरुरी छ’, उनले भने।
सरकारले आफ्नो नीति तथा कार्यक्रमबाट कृषिमा सुधारका काम गरिरहेको र प्रधानमन्त्री कृषि आधुनिकीकरण परियोजना त्यसको एउटा उदाहरण भएको उनको भनाइ थियो।
‘हिजो मैले कृषिमा स्नातक गर्दा यही अगाडिको कलेजबाट गरेँ। दस कठ्ठामा धानखेती गरेको थिएँ। मैले ट्याक्टर चलाउन सिकेको यही कृषि कलेजमा हो। सामान्य किसानको छोरो हुनुको नाताले कृषिमा क्रान्ति गर्नु पर्छ भन्ने सोचेर राजनीतिमा होमिएँ’, पुराना दिन सम्झँदै उनले भने।
‘संविधानसभाको निर्वाचनपछि प्रधानमन्त्री बनेपछि मलाई रामपुर क्याम्पसलाई कृषि विश्वविद्यालय बनाउनु पर्छ भन्ने सोच आयो। समाजवाद हुनको लागि पर्याप्त उत्पादन र रोजगारी हुनु पर्छ। विज्ञान र प्रविधिको उच्च प्रयोग हुनु पर्छ। कृषिमा क्रान्तिकारी तरिकाले भिन्न इजरायल, कृषिमा प्रविधिको प्रयोगमा अगाडि रहेका चीन र भारतबाट हामीले सिक्नु पर्छ। कृषिमा आधुनिकीकरण गर्नु पर्छ। चक्लाबन्दीद्वारा सामूहिक खेती प्रणालीको आफ्नै मोडालिटीको विकास गर्न सकिन्छ’, उनले भने।
राजनीतिक नेतृत्वको हैसियतले र यहाँ पढेको विद्यार्थी भएको नाताले कृषिमा क्रान्ति ल्याउने आकांक्षा लिएर अगाडि बढ्न जरुरी रहेको अध्यक्ष प्रचण्डले बताए। ‘यो विश्वविद्यालयको विकास हामी सबैको संकल्पले मात्र सम्भव छ’, उनले भने, ‘जसका लागि योजनावद्ध ढंगले हामी अगाडि बढ्नेछौं।’
प्रचण्डले कार्यक्रममा सम्मानित कृषकहरुलाई बधाई दिँदै कृषि मेलाको सफलताको शुभकामना दिए। शनिबारदेखि सुरु भएको मेला मंगलबार समापन हुनेछ। कृषि तथा वन विज्ञान विश्वविद्यालयले पहिलोपटक कृषि मेलाको आयोजना गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
