विराटनगर- विराटनगरस्थित कोइराला निवासबाट सरकारले सुरक्षाकर्मी हटाइएको विरोधमा सयौंको संख्याका कांग्रेसीहरु विराटनगरको कोइराला निवास पुगेका छन। काठमाडौंको सुन्दरीजलमा रहेको बिपी संग्रालयका अध्यक्ष परशुराम पोख्रेलको नेतृत्वमा करिब २ सयको संख्यामा कांग्रेसीहरु विरोध जनाउन विराटनगर पुगेका हुन्।
कोइराला निवासलाई मन्दिरको स्वरूप सम्झिँदै उनीहरुरुले भूइँमा ढोग गर्दै निवास प्रवेश गरेका नेपाली कांग्रेस मोरङका सभापति डिगबहादुर लिम्बुले बताए।
मुस्लिमहरुको मक्का-मदिना र हिन्दुहरुको पशुपतिनाथ जस्तै पवित्र भूमिका रुपमा लिन्छन् कोइराला निवासलाई देशभरका कांग्रेसजनहरु।
समूहलाई निवासका सहयोगी शुभनारायण राय, मोरङ कांग्रेसका सभापति लिम्बु, सचिव मोदराज घिमिरे, विराटनगर महानगरका मेयर भिम पराजुली, कांग्रेस नेतृ रुक्मिणी कोइराला, ट्रेड युनियन कांग्रेसका नेता नारायणबाबु कार्की, प्रदेससभा सदस्यहरु- लोकप्रसाद संग्रौला र शिवनारायण सिंहलगायतले स्वागत गरेका थिए।
समूहले शुक्रबार दिउँसो कोइराला निवासमा दण्डवत गरेर प्रवेश गरेका थिए। यति ठूलो संख्यामा कार्यकर्ताले निवासको भूइँमा दण्डवत गरेर एकैपटक कोइराला निवास प्रवेश गरेको यो पहिलो घटना हो। यो घटनाले कोइराला निवासको गरिमा र महत्व अझ उचाईमा पुगेको बिपी संग्रालयका अध्यक्ष परशुराम पोख्रेलले बताए।
अध्यक्ष पोखरेलले बिपी र गिरीजा प्रसाद कोइरालाको विचार र आर्दशलाई मेचीदेखि महाकालीसम्म एउटै मालामा गोलबन्द गर्न यो अभियान सुरू गरेको स्पष्ट पारे। टोली पहिलो चरणमा कोइराला परिवारको पुर्ख्यौली थलो सिन्धुलीको दुम्जाको भ्रमण सकेर विराटनगर आएको उनले जानकारी दिए।
'दोस्रो चरणमा गाणतन्त्रात्मक संविधान जारी गर्ने पूर्वप्रधानमन्त्री सुशील कोइरालाको कर्मथलो नेपालगन्ज र पार्टी सभापति एवम् पूर्व प्रधानमन्त्री शेरबाहादुर देउवाको गृह जिल्ला डडेलधुरा भ्रमण गर्ने कार्यक्रम तय गरिएको छ,' उनले भने।
सहभागीहरुले कोइराला निवासबाट संघीय सरकारले सुरक्षाकर्मी हटाउनु दुःखद घटना भएको बताउॅदै सरकारले बिपी र गिरिजा प्रसादमाथि अपमान गरेको टिप्पणी गरेका थिए।
पञ्चायतकालमा कांग्रेसको सुराकी लिनकै लागि भए पनि निवासमा सुरक्षाकर्मी राखिएको स्मरण गर्दै उनीहरुले गणतन्त्र आएपछि फिर्ता बोलाउनु पञ्चायत भन्दा नेकपाको सरकार निरंकुश भएको आरोप लगाएका थिए। यस विषयमा ध्यानार्कषण गराउन प्रदेशका आन्तरिक मामिलामन्त्री हिक्मत कार्कीलाई ज्ञापनपत्र बुझाउने पनि पोखरेलले बताए।
पञ्चायतविरूद्धको आन्दोलनको क्रममा बिपी कोइरालाले ८ वर्ष सुन्दरीजलमा कष्टकर जेल जीवन बिताएका थिए। सोही स्मरणमा सुन्दरीजलको माटो र संग्राहलयको तस्बिर कोइराला निवासलाई हस्तान्तरण गरिएको थियो। संग्राहलयका अध्यक्ष पोखरेलले मोरङ कांग्रेसका सभापति लिम्बू र निवासकी सहयोगी पाना उरावलाई माटो र तस्बिर हस्तान्तरण गरेका थिए।
कांग्रेस सभापति लिम्बूले कोइराला निवास प्रजातन्त्रवादीहरूको आस्थाको धरोहर भएको बताउँदै निवासले कांग्रेसलाई संस्कारको पाठ सिकाएको जिकिर गरे। कोइराला निवासले उठाएको मुद्धालाई समाजमा रूपान्तरण गर्न सके कांग्रेस थप बलियो बन्ने उनको भनाइ थियो।
भारतको फारविसगन्जस्थित कांग्रेसले गरेको विमान अपरण घटनास्थल अवलोकन गर्न टोली शुक्रबार नै त्यसतर्फ प्रस्थान गरेको छ। विमान अपरणका कमान्डर वसन्त भट्टराईसमेत टोलीसँगै फारविसगन्ज गएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
