काठमाडौं– विमानस्थलबाट चिम्पान्जी तस्करीको आरोपमा पक्राउ परेका तीन कर्मचारी धरौटीमा छुटेका छन् । तस्करीमा संलग्न व्यक्तिहरु भने जेल चलान भएका छन् ।
बिहिबार काठमाडौं जिल्ला अदालतले भन्सार अधिकृत आशुतोष राईलाई ५ लाख तथा तथा नायब सुब्बाद्धय चुणामणि शर्मा र क्वारेन्टाइन कार्यालयका नासु धिरेन्द्र बहादुर शाहलाई २÷२ लाख धरौटीमा छाड्ने आदेश दिएको हो।
भन्सार र क्वारेन्टाइनका कर्मचारीले घुस खाएर तस्करीमा सहयोग गरेको प्रहरी अनुसन्धानमा खुलेको थियो । उनीहरुलाई एयरपोर्ट भन्सार कार्यालयले समेत निलम्बन गरिसकेको छ।
नेपाल प्रहरीको केन्द्रीय अनुसन्धान ब्यूरो(सिआईबी)ले विमानस्थलबाटै पास भएको दुई वटा चिम्पान्जी, आठ वटा बाँदर र एक सय १२ वटा चरासहित तस्करीमा संलग्न ६ जनालाई गत असोज ३१ गते पक्राउ गरेको थियो। सिआईबीले सञ्जिव भारती र राजकुमार तिवारी, भारतीय नागरिकहरु मोहम्मद उस्मान, मोहम्मद फएन र शरिफ सहिन तथा पाकिस्तानी नागरिक आवेद अस्लामा खान पक्राउ परेका गरेको थियो। उनीहरु ६ जनालाई नै अदालतले पुर्पक्षका लागि कारागार चलानको आदेश दिएको छ।
अभियुक्तमध्ये राजकुमार तिवारी भन्सार एजेन्ट हुन् । तस्करहरुले उनै तिवारीमार्फत कर्मचारीलाई घुस खुवाएर चिम्पान्जि तथा बाँदर विमानस्थलबाट पास गराएका थिए। तिवारीले नायब सुब्बा चुणामणि शर्मालाई ५० हजार रुपैयाँ दिएर चिम्पाञ्जि पास गरेको बयान दिएका थिए। घुस खुवाएर चेकजाँच बिनै पास गर्ने क्वारेन्टाइन कार्यालयका नासु धिरेन्द्र बहादुर शाहलाई समेत सिआईबीले पक्राउ गरी मुद्दा दायर गरेको थियो।
तस्करीमा संलग्न समूहले नाइजेरियाबाट चिम्पाञ्जि, बाँदर तथा चराहरु ल्याएको हो। चराहरु ल्याउने पाइने भएपनि संरक्षित वन्यजन्तु चिम्पान्जीको ओसारपसार प्रतिबन्धित छ । उनीहरुले चराभित्र चिम्पाञ्जि लुकाएर ल्याएको थिए । नेपालबाट भारतमा लैजान चिम्पान्जी ल्याइएको थियो । जसमा अन्तराष्ट्रिय गिरोहकै संलग्नता देखिएको छ। सिआईबीले सरकारी वकिल कार्यालयमार्फत आइतबार अदालतमा संगठित अपराध मुद्दा दायर गरेको थियो । पक्राउ परेका तीनजना भारतीय चिम्पाञ्जी लिन नेपाल आएका थिए । पाकिस्तानी नागरिक खान पैसा लिनका लागि मंगलबार मात्र दुबईबाट नेपाल आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
