काठमाडौं- पछिल्लो पटक नेपाली चलचित्रहरुमा युगल गीत गाउने परिपाटी बढेको छ। विशेषगरी प्रेमील गीतहरुमा सुन्न सकिने युगल गायनमा दर्शक तथा श्रोताको रुची समेत बढेको पाइन्छ। सामाजिक सञ्जाल युट्युबमा भ्युज र टिकटकमा राखिएका भिडियोलाई आधार मान्दा पनि युगल गीतमा मोह बढेको पुष्टि हुन्छ।
नेपाली सिनेमा क्षेत्रमा प्रभाव जमाइरहेका संगीतकार अर्जुन पोखरेल युगल गायनलाई बढावा दिनेमध्येमा पर्छन्। उनले संगीत दिने अधिकांश चलचित्रमा युगल गायनले स्थान पाउने गरेको छ। यही परिपाटीलाई उनले यसपटक चलचित्र बाहिरको गीतमा पनि प्रयोग गरेका छन्।
करणराज गिरी र अन्जु पन्तको आवाज रहेको 'जिन्दगी खास हुनेछ' बोलको गीत बजारमा आएको हो। विशेषगरी चलचित्रमा समेटिएका युगल गायनमा संगीतकार पोखरेलको पहिलो रोजाइमा पर्ने गरेकी गायिका पन्तकै आवाज यस गीतमा पनि सुन्न सकिन्छ।
'प्ले ब्याक सिंगिङ'मा जम्न खोजिरहेका गायक गिरीका लागि भने यो गीत आफूलाई प्रमाणित गर्ने अवसर र चुनौती दुवै हुने मानिएको छ। यी दुवै गायकगायिकाको जुगलबन्दी सुन्नलायक बनेको छ।
नेपाली चलचित्रमा केही 'हिट नम्बर'हरु दिइसकेका युवा गीतकार मुक्त उदास यस गीतका सर्जक हुन्। प्रेमिल गीत सिर्जनामा बढी लगाव राख्दै आएका उदासले यो गीत पनि सोही लगावको नतिजा भएको प्रतिक्रिया दिए। 'युवामनमा विशेषगरी खेल्ने विषयवस्तु केही छ भने त्यो मायाप्रेम नै हो,' उदासले भने, 'आफू पनि सोही उमेर समूहकै भएकोले पनि यसमा बढी रुची लागेको हुनसक्छ। जिन्दगी खास हुनेछमा पनि दुई प्रेमीको वार्तालाप र बुझाईलाई नै समेट्ने कोशिष गरेको छु।'
आमरुपमा मायाप्रेमका गीत लेख्न सहज होला भन्ने पनि लाग्छ। तर, उदास यसमा फरक मत राख्छन्। 'सरल र सबैलाई समेट्ने गीत लेख्न हामीले सोच्नेजस्तो सहज छैन,' उदास भन्छन्, 'तर लेखिसकेपछि यसको प्रभावलाई सोच्दा थप सन्तोष र आनन्द लाग्छ। किनकी यस्ता गीतमा सामान्य शब्दले पनि गहिरो भाव व्यक्त गरेका हुन्छन्।'
देशबाहिर सुटिङ गरिएको यस गीतमा रोहित थापा र सुपुस्पा भट्ट 'फिचर' भएका छन्। महाराज थापाले संगीत संयोजन गरेको यस गीतको म्युजिक भिडियोको निर्देशन भने शान थापाले गरेका छन्।
भिडियोः
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।