एजेन्सी– बलिउडका महानायक अमिताभ बच्चनले थुप्रै सुपरहिट फिल्म दिएका छन्। उनले खेलेका सयौं फिल्ममध्येबाट १० वटा उत्कृष्ट फिल्म छान्न सजिलो छैन। तर, विभिन्न भारतीय सञ्चारमाध्यममा आएका समाचार र समीक्षकहरुको बयानका आधारमा अमिताभको जीवनमै हलचल ल्याउने सर्वोत्कृष्ट १० फिल्म यहाँ प्रस्तुत गरिएको छः
१. आनन्द (१९७१)
यो फिल्ममा नायक थिए, सुपरस्टार राजेश खन्ना। बाबु मोसायको चरित्रमा अमिताभ बच्चन सहायक भूमिकामा थिए। तर,सशक्त अभिनयको बलमा अमिताभले दर्शकको ध्यान आफूतिर तान्न सफल भए। आनन्द राजेश खन्नाको श्रेष्ठ फिल्ममध्ये एक मान्न सकिन्छ। तर, फिल्म हेरिसकेपछि अमिताभलाई कुनै दर्शकले पनि भुल्न सक्दैनन्। दोस्रो दर्जाको भूमिका भएर पनि अमिताभले यो फिल्ममार्फत बलिउडमा आफ्नो उपस्थिति सशक्त ढंगले दर्शाए।
२. जंजीर (१९७३)
जब बलिउडका दिग्गज कलाकारले यो फिल्ममा काम गर्न इन्कार गरिदिए तब बाध्य भएर निर्देशक प्रकाश मेहराले अमिताभ बच्चनलाई हिरो बनाएका थिए। कलाकार प्राणसँग जब अमिताभले पहिलो दृश्य दिए, प्राणले मेहरालाई कुनामा लगेर भने– यो केटो एक दिन बलिउडको सुपरस्टार बन्ने छ। फिल्म जंजीरबाटै अमिताभ योङ एंग्री म्यानले चिनिन थाले। यो फिल्म सुपरहिट भएपछि अमिताभले कहिल्यै पछाडि फर्कनु परेन।
३. दिवार (१९७५)
त्यतिबेला नायकले नकारात्मक भूमिका निभाउन मन पराउँदैनथे। तर, दिवारमा अमिताभ खलचरित्रमा देखापरेका थिए। नकारात्मक भूमिका भएर पनि दर्शकले अमिताभलाई खुब मन पराए।
४. शोले (१९७५)
हिन्दी फिल्म जगतकै सफलतम फिल्ममध्ये एक शोलेमा जय र विरुको जोडीको निकै प्रशंसा भयो। विरुको तुलनामा जय कम बोल्थे। अमिताभले विनासंवाद आँखा र अनुहारको भावले धेरै दृश्यलाई अविश्मरणीय बनाइदिए। सहनायक जस्तो देखिए पनि यो फिल्ममा अमिताभलाई निकै रुचाइएको थियो।
५. अमर अकबर एन्थोनी (१९७७)
मनमोहन देसाईको ठेठ मसला फिल्ममध्ये एक अमर अकबर एन्थोनीमा अमिताभ एन्थोनीको भूमिकामा थिए। अमिताभ एक्लैले यो फिल्ममा दर्शकलाई पेट मिचीमिची हँसाएका थिए। यो यस्तो समय थियो, अमिताभले पर्दामा जस्तोसुकै हर्कत गरे पनि दर्शक कुनै तर्क–वितर्क गर्दैनथे।
६. शक्ति (१९८२)
यो फिल्मले भलै सफलता प्राप्त गर्न सकेन तर दर्शकले दुई जना महान अभिनेतालाई सँगै देख्ने अवसर प्राप्त गरे। फिल्म शक्तिमा अमिताभसँगै अर्का महानायक दिलिपकुमार पनि थिए। तर अभिताभलाई यो फिल्ममा अभिनय गर्न निकै मुस्किल भएको थियो। उनलाई कैयौं पटक रिटेक दिनुपरेको थियो। यो फिल्ममा कसले श्रेष्ठ अभिनय गरेको थियो, अहिलेसम्म पनि बहस जारी छ।
७. अग्निपथ (१९९०)
फिल्म अग्निपथ बक्स अफिसमा असफल भएको थियो तर पछि टेलिभिजनमा खुब हेरियो र रुचाइयो। यो फिल्ममा अमिताभले गरेको उत्कृष्ट अभिनयलाई अहिले पनि सम्झने गरिन्छ। अमिताभले यो फिल्ममार्फत आफ्नो शैली परिवर्तन गरेका थिए। उनले आवाज बदलेका थिए। तर अमिताभको यो प्रयोग दर्शकले रुचाएनन्। तर बेजोड अभिनयका कारण अग्निपथबाट अमिताभलाई सर्वश्रेष्ठ अभिनेताको राष्ट्रिय पुरस्कार प्रदान गरिएको थियो।
८. ब्ल्याक (२००५)
देवराज सहायको भूमिका निभाएर यस फिल्ममार्फत आफूले अभिनयको शिखर चुमे झैं लाग्छ अमिताभलाई। फिल्म ब्ल्याकमाथि उनी गर्व गर्छन्। यो फिल्म हेरिसकेपछि लाग्छ, अमिताभको अभिनयको कुनै सीमा नै छैन। उनले यही फिल्ममार्फत एक चरित्र अभिनेताको रुपमा समेत आफूलाई अब्बल सावित गरेका थिए।
९. पा (२००९)
फिल्म पामा अमिताभले १२ वर्षको एक यस्तो चरित्रको भूमिका निभाएका छन्, जो प्रोगेरियाबाट पीडित छन्। यति सानो उमेरमा पनि उनी ७० वर्षीय बृद्ध जस्ता देखिन्छन्। यो भूमिका अमिताभले यति सहज ढंगले निर्वाह गरे कि, उनलाई चिन्न नै गाह्रो पथ्र्यो। त्यो पात्रको सोच १२ वर्षको बच्चा जस्तो थियो भने शरीर ७० वर्षको जस्तो। फिल्म पाबाट अमिताभले उत्कृष्ट अभिनेताको राष्ट्रिय पुरस्कार प्राप्त गरेका थिए।
१०. पिकु (२०१५)
फिल्म पिकुमा अमिताभले बंगाली भूमिका निर्वाह गरेका छन्, जो कब्जियतको शिकार हुन्छन्। अमिताभले यो भूमिका यति सशक्त ढंगले निभाए कि, दर्शक दंगदास परे। उत्कृष्ट अभिनयका लागि अमिताभलले यो फिल्मबाट राष्ट्रिय पुरस्कार समेत प्राप्त गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
