काठमाडौं- सरकारले स्थानीयको विरोध हुँदाहुँदै पनि कमलपोखरीको महानगरीय प्रहरी वृत्त मालीगाउँमा सार्ने निर्णय गरेको छ। मन्त्रिपरिषद् बैठकले गरेका निर्णय सार्वजनिक गर्दै गोकुल बाँस्कोटाले मालीगाउँमा प्रहरी वृत्त सार्ने निर्णय गरेको बताए।
उक्त स्थानमा रहेको बालाबलिकाका लागि खाद्य कार्यक्रमलाई सानोठिमी सारेर त्यहाँ महानगरीय प्रहरी वृत्त राख्ने निर्णय गरेको सरकारले गरेको हो।
महानगरीय प्रहरी वृत्त कमलपोखरी भिआइपीको बसोबास रहेको मालीगाउँ क्षेत्रमा सार्न खोजेपछि स्थानीयले केही समयदेखि विरोध गर्दै आएका थिए। प्रहरी वृत्त सार्नका लागि तयारी भएको बालमन्दिरको सरकारी जग्गासँगै बृहस्पति विद्यासदनसमेत जोडिएको भन्दै स्थानीयहरुले विरोध जनाएका थिए।
विद्यालयसँगै जोडेर प्रहरी कार्यालय स्थापना हुन लागेको प्रति स्थानीयहरुले आपत्ति जनाउँदै कुनै पनि रुपमा सार्न नदिने चेतावनी दिएका थिए। स्थानीयहरुले उक्त क्षेत्रका सांसद गगनकुमार थापा, नेकपाका नेता राजन भट्टराई, प्रधानमन्त्रीका सल्लाहकार विष्णु रिमाल, महानगरपालिकाका मेयर विद्यासुन्दर शाक्य र वडा सदस्यलाई समेत प्रहरी वृत्त नसार्न आग्रह गर्दै दबाब दिएका थिए। तर सरकारले उनीहरुको दबाबलाई वेवास्ता गर्दै मन्त्रीपरिषदवाट उक्त निर्णय गरेको हो।
बाल मन्दिरको नाममा रहेको काठमाडौं महानगरपालिका-५ को मालीगाउँमा शिक्षाका लागि खाद्य कार्यक्रम रहेको ४ रोपनी क्षेत्रमा महानगरीय प्रहरी वृत्त राख्ने निर्णय भएको हो।
के भन्छन् स्थानीय?
गृह मन्त्रालयको ठाडो निर्देशनमा बाल मन्दिरको जग्गा कब्जा गरेर प्रहरी वृत्त राख्न खोजेकोले आफूहरु विरोधमा उत्रने स्थानीयको भनाई छ। वडा नम्बर–५ का स्थानीय पवन केसीले आफूहरु प्रहरी चौकीको नभई आफ्ना टोलको सामाजिक सुरक्षा र शान्तिका लागि विरोधमा उत्रको बताए।
‘हामी सुरक्षा निकाय र प्रहरी चौकीको विरोधी होइनौं,’ उनले भने, ‘तर भिआइपी क्षेत्रको बीचमा र विद्यालयसँग जोडेर प्रहरी चौकी राख्न खोज्नु आपत्तिजनक छ।’
शिक्षाका लागि खाद्य कार्यक्रम यहाँ पचासौं वर्षदेखि बस्दै आएको तर यसलाई हटाएर स्थानीयसँग सल्लाह नै नगरी प्रहरी कार्यालय बस्न खोज्नुले विरोध गर्नु परेको केसीको भनाइ छ। ‘यो क्षेत्र सुरक्षाले संवेदनशील होइन। छेउमै सशस्त्रको पशुपति बाहिनी र प्रहरी बिट दुईतिर छ। तर, किन यही महानगरीय प्रहरी वृत्त सार्न खोजियो हाम्रो शंका यही हो।’
विद्यालयसँगै जोडिएर प्रहरी चौकी बस्ने भएकाले यसले दिर्घकालीन असर देखिनसक्ने भन्दै आफूहरु चिन्तित भएको उनको भनाइ छ। ‘यहाँ आउने मानिस र हतकडीमा आएका अपराधीलाई विद्यार्थीहरुले विद्यालयको झ्यालबाट हेर्नुपर्दा के होला?’, केसीले प्रश्न गरे, ‘यो क्षेत्र अपराधीहरुको चलखेल गर्ने स्थलको रुपमा विकास हुने हो कि भन्ने मात्रै हाम्रो चिन्ता हो।’
स्थानीय निकायलाई समेत जानकारी नदिई प्रहरी कार्यालय आउनुले आफूहरु विरोधमा रहेको स्थानीयको भनाइ छ।
स्थानीय क्लबका अध्यक्ष प्रकाश केसीले पनि यो ठाउँ प्रहरी कार्यालयका लागि उपयुक्त नभएको जिकिर गरे। यहाँ सशस्त्र प्रहरी कार्यालयदेखि र प्रहरी बिटसमेत भएको तथा विद्यालयसँग जोडिएर प्रहरी कार्यालय स्थापना हुन नसक्ने उनले टिप्पणी गरे। ‘जेलमा सज्जन मान्छे राखिँदैन, झ्यालबाट विद्यार्थीले हेर्दा उनीहरुको मानसिकतामा के आउँछ होला? हाम्रो समाज नराम्रो होला भनेर हामी विरोधमा उत्रेका हौं,’ उनले प्रष्ट्याए।
यो पनि : महानगरीय प्रहरी वृत्त कमलपोखरी मालिगाउँमा सर्न खोज्दा स्थानीय किन भए आन्दोलित? [भिडियाे]
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
