प्रहरी वृत्तका लागि ताेकिएकाे मालिगाउँ स्थित बाल मन्दिरकाे नाममा रहेकाे क्षेत्र।
काठमाडौं– महानगरीय प्रहरी वृत्त कमलपोखरी भिआइपीहरुको बसोबास रहेको मालीगाउँ क्षेत्रमा सार्न खोजेपछि स्थानीयहरुले विरोध जनाएका छन्। प्रहरी वृत्त सार्नका लागि तयारी भएको सरकारी जग्गासँगै वृहस्पति विद्यासदन विद्यालयसमेत जोडिएको भन्दै स्थानीयहरुले विरोध जनाएका हुन्।
विद्यालयसँगै जोडेर प्रहरी कार्यालय स्थापना हुन लागेको प्रति स्थानीयहरुले आपत्ति जनाउँदै कुनै पनि रुपमा सार्न नदिने चेतावनीसमेत दिएका छन्। स्थानीयहरुले उक्त क्षेत्रका सांसद गगनकुमार थापा, नेकपाका नेता राजन भट्टराई, प्रधानमन्त्रीका सल्लाहकार विष्णु रिमाल, महानगरपालिकाका मेयर विद्यासुन्दर शाक्य र वडासदस्यलाई समेत प्रहरी वृत्त नसार्न आग्रह गर्दै दबाबसमेत दिएका छन्।
बाल मन्दिरको नाममा रहेको काडमाडौं महानगरपालिका-५ को मालीगाउँमा शिक्षाका लागि खाद्य कार्यक्रम रहेको ४ रोपनी क्षेत्रमा महानगरिय प्रहरी वृत्त राख्न खोजेपछि स्थानीयहरु विरोधमा उत्रेका हुन्। स्थानीय क्लब र जनताहरुले गृह, शिक्षा, प्रधानमन्त्री कार्यालय, काठमाडौं महानगरपालिका र स्थानीय वडा कार्यालयलाई समेत उक्त निर्णय रोक्न दबाब दिएका छन्।
गृह मन्त्रालयको ठाडो निर्देशनमा बाल मन्दिरको जग्गा कब्जा गरेर प्रहरी वृत्त राख्न खोजेकोले आफूहरु विरोधमा उत्रन बाध्य भएको स्थानीय वडा नम्बर-५ का पवन केसीले बताए। ‘हामी सुरक्षा निकाय र प्रहरी चौकीको विरोधी होइनौं,’ उनले भने, ‘तर भिआइपी क्षेत्रको बीचमा र विद्यालयसँग जोडेर प्रहरी चौकी राख्न खोज्नु आपत्तिजनक छ।’
खाद्य कार्यक्रम यहाँ पचासौं वर्षदेखि बस्दै आएको छ तर यसलाई यहाँबाट हटाएर स्थानीयसँग सल्लाह नै नगरी प्रहरी कार्यालय बस्न खोज्नुले विरोध गर्नु परेको केसीकाे भनाइ छ। ‘यो क्षेत्र सुरक्षाले संवेदनशील होइन। छेउमै सशस्त्रको पशुपति बाहिनी र प्रहरी बिट दुईतिर छ। तर, किन यही महानगरीय प्रहरी वृत्त सार्न खोजियो हाम्रो शंका यही हो।’
विश्व खाद्य कार्यक्रम परिसर।
विद्यालयसँगै जोडिएर प्रहरी चौकी बस्ने भएकाले यसले दिर्घकालीन असर देखिनसक्ने भन्दै आफूहरु चिन्तित भएकाे उनकाे भनाइ छ। ‘यहाँ आउने मानिस र हतकडीमा आएका अपराधीलाई विद्यार्थीहरुले विद्यालयको झ्यालबाट हेर्नुपर्दा के होला?’, केसीले प्रश्न गरे, ‘यो क्षेत्र अपराधीहरुको चलखेल गर्ने स्थलको रुपमा विकास हुने हो कि भन्ने मात्रै हाम्राे चिन्ता हाे।’
स्थानीय निकायलाई समेत जानकारी नदिई प्रहरी कार्यालय आउनुले आफूहरु विरोधमा उत्रिएकाे स्थानीयकाे भनाइ छ।
स्थानीय क्लबका अध्यक्ष प्रकाश केसीले पनि यो ठाउँ प्रहरी कार्यालयका लागि उपयुक्त नभएको जिकिर गरे। यहाँ सशस्त्र प्रहरी कार्यालयदेखि र प्रहरी बिटसमेत भएको तथा विद्यालयसँग जोडिएर प्रहरी कार्यालय स्थापना हुन नसक्ने उनले टिप्पणी गरे। ‘जेलमा सज्जन मान्छे राखिँदैन, झ्यालबाट विद्यार्थीले हेर्दा उनीहरुको मानसिकतामा के आउँछ होला? हाम्रो समाज नराम्रो होला भनेर हामी विरोधमा उत्रेका हौं।,’ उनले प्रष्ट्याए।
तर, काठमाडौं आयुक्त कार्यालयका एसएसपी श्याम ज्ञवालीले भने प्रहरी वृत्त सर्ने निश्चित नभएको जिकिर गरे।
'कमलपोखरी क्षेत्र खाली गर्नुपर्ने भएकाले ठाउँ हेरिएको हो, निर्णय भएको छैन,' ज्ञवालीले भने, ‘सर्ने/नसर्ने बारेको निर्णय सरकारले गर्छ, स्थानीयसँग समन्वय गरेर मात्र सर्ने कार्य हुन्छ।’
भिडियाे:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
