बेनी, म्याग्दी- म्याग्दीमा पहिलोपटक मोबाइल एपको प्रयोग गरी लिफ्ट प्रविधिको सिँचाइ सञ्चालन गरिएको छ।
एन्ड्रोइड मोबाइलमार्फत स्थानीय कृष्णबहादुर खत्रीले म्याग्दी नदीको किनारमा लिफ्ट प्रविधिको सिँचाइ गरेका हुन्। नदीपारिबाट सिँचाइको कन्ट्रोल र मेकानिकल सर्किटलाई चलाएर नदीबाट २५० मिटरमाथि बेनी नगरपालिका–२, खवरामा ६३ एमएलको पाइपमार्फत पानी पुर्याइएको छ।
मोबाइलबाट सिँचाइको इनारमा प्रयोग गरिएको मेसिनको मेनस्विच २५० मिटर वरपरबाट अन गरेको ५ सेकेन्डमै २५० मिटरको दुरीमा रहेको खवराको लब्लीहिलमा पानी खसेको हो।
धौलागिरि क्षेत्रमा नै पहिलोपटक म्याग्दीमा मोबाइल एप्सको माध्यमबाट सिँचाइ आयोजनाको पानी आपूर्ति बन्द र खुल्ला गर्ने प्रविधिको प्रयोग सफल भएको खत्रीले बताए।
बेनी नगरपालिका–७ हुलाकचोकका खत्री इलेक्ट्रोनिक्स सेन्टरका सञ्चालकसमेत हुन्। यसअघि उनले म्याग्दी नदीको मंगलाघाट क्षेत्रबाट करिब १५० मिटर दुरीमा रहेको आफ्नो घरबाटै पनि यही प्रविधि चलाएका थिए।
नेपालमै एप्सको प्रयोगबाट सिँचाइलाई कन्ट्रोल गर्नेहरु निकै कम रहेको उनको दाबी छ। एप्सको एकपटक अन र अफ गर्न करिब रु चार खर्च हुने उनले बताए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
