नारायणप्रसाद खतिवडा नुवाकोट क्षेत्र नम्बर २ बाट निर्वाचित सांसद हुन्। संविधानसभाको दोस्रो निर्वाचनमा उनी नुवाकोट ३ मा कांग्रेस उम्मेदवार बहादुरसिंह तामाङसँग पराजित भएका थिए। तर यसपटक कांग्रेस उम्मेदवार अर्जुननरसिंह केसीलाई पराजित गर्दै सांसद बन्न पुगे। खतिवडाले ३६ हजार ८ सय ९२ मत पाएका थिए भने केसीले २६ हजार ३ सय ३५ मत मात्रै पाउन सके।
खतिवडा पहिलो पटक सांसद भएका हुन्। नेपाल लाइभले सुरु गरेको 'संसदमा नयाँ अनुहार' शृंखलाका लागि खतिवडासँग किशोर दहालले गरेको कुराकानी :
जनताले तपाईंलाई किन सांसद बनाए भन्ने लाग्छ?
म जनताको बीचमा हिजोदेखि काम गर्दै आएको मान्छे हुँ। जनताको समस्या समाधानको लागि म सधैं लागिपरिरहेको छु। त्यसैले, जनतामाझ राम्रो सम्बन्ध स्थापित गरेको छु। त्यसैले पनि जनताले मलाई निर्वाचित गरेर सांसद बनाए भन्ने लाग्छ।
पहिलो पटक सांसद बन्दै हुनुहुन्छ। संसद बैठकको सञ्चालन प्रक्रिया र अन्य कामकारबाहीप्रति तपाईंको कल्पना वा रोमाञ्चकता कस्तो छ?
म पहिलोपटक सांसद भए तापनि त्यसको सञ्चालन प्रक्रिया वा समग्रमै संसदीय व्यवस्थाप्रति अध्ययन गरेको छु। पदको जिम्मेवारी वा दायित्वबारे मलाई जानकारी छ। त्यसैले मैले अनौठो अनुभव गरिरहेको छैन। मलाई स्वाभाविकै नै लागिरहेको छ।
सांसदको रुपमा तपाईंको खल्तीमै भएका योजनाहरु केके छन्?
मसँग निजी योजना भन्ने केही पनि छैन। मैले ख्याल गर्ने भनेको नुवाकोटको विकास र समृद्धिको योजना नै हो। नुवाकोट २ का जनताले मलाई निर्वाचित गराउनुभएकाले उहाँहरुको चाहना र योजना नै मेरो योजना हो। यहाँकै भौतिक पूर्वाधारको क्षेत्रमा मैले सुधार गर्नुपर्नेछ। निर्माणमा लाग्नुपर्नेछ। समग्रमा नुवाकोटको सामाजिक अवस्थादेखि अन्य सबै अवस्था सुधार गर्ने मेरो लक्ष्य छ।
तपाईंलाई ६ महिनापछि नै 'पूरा गर्नुभयो त?' भनेर सोध्न सकिने कुनै काम छ?
विशेषगरी निर्माणको क्षेत्रमा व्यवस्थापन गर्ने कुरा हो। नेपाल सरकारले विभिन्न क्षेत्रबाट हालेको योजनाहरुको व्यवस्थापन गर्ने र नयाँ आवश्यकता पूरा गर्नका लागि मेरो समग्र ध्यान जानेछ। म पहिले पनि जिल्लामा जनप्रतिनिधि भएर विकासको सवालमा एक खालको अनुभव हासिल गरिसकेको छु। मुख्यगरी यहाँको विकासको लागि योजनाहरु बनाएका छौं, त्यसै अनुसार अगाडि बढ्छौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
