काठमाडौं- नेपाली कांग्रेसले पहिलो चरणको जागरण अभियान अहिलेसम्मकै कांग्रेसको बृहत्तर कार्यक्रम भएको बताएको छ। बैसाख २५ देखि जेठ २५ सम्म भएको पहिलो चरणको अभियानबारे जानकारी दिन आज आयोजित पत्रकार सम्मेलनमा प्रवक्ता विश्वप्रकाश शर्माले यसबारे जानकारी गराएका हुन्।
जागरण अभियानपश्चात् समग्रतामा सरकारप्रति विकर्षण र कांग्रेसप्रति आकर्षण बढेको कांग्रेसको निचोड छ। कमजोरीहरुलाई सुधार्दै भदौ २४ गतेबाट हुने दोस्रो जागरण अभियानलाई थप प्रभावकारी बनाउने शर्माले जानकारी गराए।
प्रादेशिक संरचना अनुरुप संगठन नभएका कारण अभियान प्रभावकारी भएन कि भन्ने आवाजलाई स्वाभाविक लिएको शर्माले बताए। प्रथम चरणमा मूलतः महासमितिबाट पारित भएको विधानलाई कार्यकर्तालाई बुझाउने कार्यमा उपयोग गरिएको उनको भनाइ छ।
पछिल्लो चरणको अभियानअघि नै संगठन निर्माण हुने उनले कार्यकर्तालाई आश्वस्त बनाए। प्रवक्ता शर्माले भने, ‘दोस्रो चरणको अभियानअघि नै संगठन निर्माण हुनेछन्। नेविसंघको नयाँ कार्य समिति र तरुण दललाई पूर्णता दिइनेछ।’
महाधिवेशनलाई रोक्नका लागि जागरण अभियान सुरु गरिएको आलोचनाको शर्माले प्रतिवाद गरे। उनले भने, ‘यात्रा सुरु नै नगरी गन्तव्य पुग्न सकिन्न।’
जागरण अभियानबाट जिल्ला प्रतिनिधिले तयार गरेको प्रतिवेदन असारको दोस्रो साताभित्र बुझाउनुपर्ने कांग्रेसले निर्देशन जारी गरेको छ। प्राप्त प्रतिवेदनको आधारमा प्रतिनिधि र पार्टी नेतृत्वको छलफल हुने बताइएको छ।
‘प्रतिनिधिसँग पार्टी नेतृत्वले प्रत्यक्ष जिल्लाको अनुभव सुनाउने कार्यक्रम तय गरिएको छ,’ उनले भने, 'त्यसलगत्तै केन्द्रीय कार्य समितिको बैठक डाकिनेछ।'
दोस्रो चरणको अभियानअघि प्रशिक्षण कार्यक्रमलाई प्राथमिकता दिने कांग्रेसले जनाएको छ। जनसम्पर्क समिति अन्तर्गतका ३३ देशका प्रतिनिधिका लागि जुन २१ देखि २३ सम्म डेनमार्कमा प्रशिक्षण आयोजना गरिने पनि कांग्रेले जनाएको छ।
यस्तै शर्माले जागरण अभियानमा ३१ हजार ६४२ जना विभिन्न पार्टीबाट कांग्रेसमा प्रवेश गरेको दाबी गरे। पार्टी प्रवेश गर्नेमा अधिकांश सत्तारुढ दलका भएको उनले जानकारी दिए। शर्माले ठट्यौली पारामा भने, ‘कांग्रेस प्रवेश गर्नेहरुमा दुई तिहाइ नेकपाकै छन्।’
कांग्रेस प्रवेश गरेकालाई भूमिकाविहीन नराख्ने भन्दै उनले नीति, अनुसन्धान प्रतिष्ठानमार्फत प्रशिक्षण गरी जिम्मेवारी तोकिने उनले प्रस्ट पारे।
पहिलो चरणमा देशका साथै नेपालबाहिर ३३ देशमा जागरण अभियान अन्तर्गत गणतन्त्र र सुशासनका बारेमा विचार, विमर्श रहेको प्रवक्ता शर्माले जानकारी गराए।
विधेयकप्रति आपत्ति
गुठी विधेयकप्रति कांग्रेसले आपत्ति जनाएको छ।
धर्म प्रचारका संस्थामा सहभागी हुने सरकारले नेपाली संस्कृति परम्परामा ठेस पुर्याएको शर्माले आरोप लगाए। भावनामा चोट पुग्ने गरी ल्याइएको विधेयकमा विरोध रहेको उल्लेख गर्दै शर्माले संविधानले दिएको अधिकार अनुरुप भएका प्रदर्शनमा प्रहरीले गरेको दमनप्रति आपत्ति जनाए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।