काठमाडौं- राष्ट्रिय ध्वजाबाहक नेपाल एयरलाइन्सले ३२ वर्ष अगाडि खरिद गरेको कर्णाली नाम दिइएको बोइङ-७५७ लिलामीको बाटो खुला भएको छ।
केही समयअघि बसेको नेपाल वायुसेवा निगमको सञ्चालक समितिले सो जहाज बिक्रीका लागि अनुमति दिएको बोर्ड सदस्यसमेत रहेका संस्कृति, पर्यटन तथा नागरिक उड्डयन मन्त्रालयका सह-सचिव बुद्धिसागर लामिछानेले जानकारी दिए।
लामो समयदेखि बोइङ उडानलाई निरन्तरता दिने वा नदिने भने विषय अन्योल थियो। अन्योलकै कारण बोइङ जहाज मलेसियाबाट मर्मत गरेर जनवरी १६ मा काठमाडौं ल्याइए पनि ग्राउन्डेड थियो। बोर्डबाट जहाज लिलामीको अनुमति पाएको निगमले ग्लोबल टेन्टरको तयारी समेत अन्तिम चरणमा पुर्याइसकेको छ।
निगमले झन्डै एक वर्ष अगाडि 'नाइन एनएसिए कलसाइन' 'कर्णाली’ बोइङ बिक्री गर्नु परेको अवस्थामा कति मूल्यमा गर्न सकिन्छ भन्दै मूल्यांकन गर्ने फिन्टेक ग्लोबललाई कन्सल्ट्यान्टका रुपमा छनोट गरेको थियो। कन्सल्ट्यान्टलाई ४५ दिनको समय दिइएको थियो। मूल्यांकनका लागि गरिएको ग्लोबल टेन्डरमा तीन वटा कम्पनीले आवेदन दिएका थिए। जसमा स्वीस कम्पनी फिन्टेक छनोटमा परेको थियो।
विमान बिक्रीका लागि कन्सल्ट्यान्ट कम्पनीले बुझाएको प्रतिवेदनमा बढीमा ५२ लाख ९६ हजार अमेरिकी डलर (मंगलबारको विनिमय दरअनुसार करिब ५९ करोड रुपैयाँ) र कम्तीमा ४३ लाख ३३ हजार अमेरिकी डलर (झन्डै ४९ करोड रुपैयाँ) मा बिक्री गर्न सकिने उल्लेख छ।
अब निगमले पनि यही प्रतिवेदनका आधारमा ग्लोबल टेन्डर प्रक्रिया मार्फत् बढी रकम कबोल गर्ने फर्मलाई बोइङ बिक्री गर्न सक्नेछ।
विमानको मर्मत सम्भार गर्न धेरै रकम खर्च गर्नु परेको तथा विमान पुरानो हुँदै गएकाले विमानको सञ्चालन, इन्धन खर्च बढिरहेको पाइएपछि निगमले कर्णाली विमान बेच्ने निर्णय गरेको थियो।
सन् १९८७ मा अमेरिकी बोइङ कम्पनीसँग नेपाल एयरलाइन्सले ऋणमा दुई वटा बोइङ खरिद गरिएको थियो। यीमध्ये गण्डकी नाम दिइएको बोइङ यसअघि नै १५ करोड रुपैयाँमा बिबी एयरवेजलाई बिक्री गरिसकेको छ। तर, कर्णाली बोइङ भने उडानयोग्य भएपनि ५ महिनादेखि ग्राउन्डेड छ।
नेवानिसँग अहिले अन्तर्राष्ट्रिय उडान गर्ने दुई वटा एयरबस र दुई वटा वाइडबडी जहाज छन्।
बोइङ र वाइडवडी विमान सञ्चालनमा नेवानिलाई असहजता भएपछि बोइङलाई विस्थापित गर्ने तयारी स्वरुप मूल्यांकन गर्न कम्पनी छनोट गरेको थियो। कम्पनीले विमानका पार्टपूर्जासमेत मूल्यांकन गरी दररेटसहित प्रतिवेदन पेस गरेको थियो।
कर्णाली नाम दिइएको बोइङ विमानमा १ सय ९० सिट छन्। यसमा १६ वटा बिजनेस क्लासका सिट छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787798392.jpg)
-1786602170.png)
-1786513116.png)
