काठमाडौं- आइसिसी क्रिकेट विश्वकप २०१९ मा भारतले साविक विजेता अस्ट्रेलियालाई ३६ रनले पराजित गरेको छ। जारी विश्वकपमा भारतको यो लगातार दोस्रो जित हो। यसअघि लगातार २ खेलमा जित हात पारेको अस्ट्रेलिया पहिलो पटक पराजित भएको हो।
आइतबार लन्डनमा भएको खेलमा भारतले दिएको ३५३ रनको लक्ष्य पछ्याएको अस्ट्रेलिया ५० ओभरमा ३१६ रनमा अलआउट भयो। अस्ट्रेलियाका लागि स्टिभ स्मिथले ६९ रन र डेभिड वार्नरले ३६ रनको योगदान दिए। विकेटकिपर ब्याट्सम्यान एलेक्स क्यारीले नटआउट ५५ रन जोडे पनि जितका लागि पर्याप्त हुन सकेन।
बलिङमा भारतका भुवनेश्वर कुमार र जसप्रित बुमराहले ३-३ विकेट लिए। युजेभेन्द्र चाहलले २ विकेट हात पारे।
त्यसअघि लन्डनको ओभलमा टस जितेर पहिले ब्याटिङ गरेको भारतले ५० ओभरमा ५ विकेटको क्षतिमा ३५२ रन जोड्यो।
भारतका लागि ओपनिङ ब्याट्सम्यान शिखर धवनले शतक प्रहार गरे। उनले ११७ रन जोड्न १०९ बल खेलेर १६ चौका हिर्काए। अर्का ओपनर रोहित शर्माले ५७ रन बटुले। दुईबीच १२७ रनको ओपनिङ साझेदारी भएको थियो। कप्तान विराट कोहलीले ८२ रनको योगदान दिए। उनले ७७ बलमा ४ चौका र २ छक्का हिर्काए।
हार्दिक पाण्ड्या २७ बलमा ४ चौका र ३ छक्को मद्दतमा ४८ रन र महेन्द्रसिंह धोनी १४ बलमा २७ रन जोडेर आउट भए। केएल राहुलले नटआउट ११ रन बनाए।
बलिङमा अस्ट्रेलियाका मार्कोस स्टोइनिसले २ विकेट लिए। पाट कमिङ्ग्स र मिचेल स्टार्कले १–१ विकेट हात पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
