काठमाडौँ- प्रधानमन्त्री कप एकदिवसीय क्रिकेट प्रतियोगिताको उपाधि नेपाल पुलिस क्लबले जितेको छ।
शनिबार कीर्तिपुर क्रिकेट मैदानमा भएको फाइनलमा अर्को विभागीय टिम त्रिभुवन आर्मीलाई चार विकेटले हराउँदै उपाधि उचालेको हो। टस जितेर पहिले ब्याटिङ गरेको आर्मीले ३३ ओभर तीन बलमा १ सय २५ रनमा अलआउट भएको थियो भने पुलिसले ४० ओभर तीन बलमा ६ विकेट गुमाउँदै लक्ष्य भेटाएको थियो।
आर्मीका लागि राजु रिजालले ३२ र सोमपाल कामीले ३५ रन बनाउनु बाहेक अन्य खेलाडी सस्तैमा आउट भएका थिए। जसमा रोहित पौडेल १८ र भीम सार्की २० रनमा पेभेलियन फर्किए। पुलिसका पवन सरार्फ र ललितनारायण राजवंशीको कसिलो बलिङले आर्मीका ब्याट्सम्यानलाई दबाबमा राखेका थिए। पुलिसका पवनले ७ ओभरमा ४ मेडल राख्दै १२ रन खर्चेर ४ विकेट लिए भने ललितले ९ दशमलव ३ ओभर बलिङ गर्दै १ मेडन सहित ३६ रन खर्चेर ४ विकेट लिए। सागर ढकालले १ विकेट हात पारे।
अर्को तर्फ पुलिसको सुरुवात भने राम्रो हुन सकेन, दुई रनमा पहिलो विकेट गुम्यो भने ५४ रनमा दोस्रो विकेट झर्यो। त्यसपछि ७५ रनमा तेस्रो तथा ७६ रनमा चौथो विकेट गुमाउन पुग्यो।
पुलिसका अनिल साह मात्र २ रनमा आउट भए भने अमित श्रेष्ठले ४४ रन बनाएका थिए। अमीत र सुनील धमलाले दोस्रो विकेटका लागि ५२ रनको साझेदारी भएको थियो। तर त्यसपछि आरिफ शेख मात्र ६, पवन सराफ एक र दिपेन्द्र सिंह ऐरी ७ रनमा आउट हुन पुगे।
त्यसपछि फेरी कुशल भुर्तेललाई ६ रनमा गुमाएपछि पुलिसले छैटौ विकेट गुमायो। पुलिसका लागि सुनील धमलाले अविजीत ४२ रन बनाए। अन्तिममा पुलिसका कप्तान मञ्जित श्रेष्ठले ११ रन जोडे। बलिङमा आर्मीका करण केसीले तीन तथा साहब आलमले दुई विकेट लिएका थिए।
यता उपाधि विजेता पुलिसले नगद २० लाख पुरस्कार पनि पाएको छ। उप विजेता भएको आर्मीले १० लाख रुपैयाँ पाएको छ। राष्ट्रिय खेलकूद परिषद राखेपको आयोजना तथा व्यवस्थापनमा भएको प्रधानमन्त्री कपमा सात वटा प्रदेश र तीन विभागीय गरी १० टिमको सहभागीता रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
