काठमाडौं– सोमबारदेखि सुरु हुने एभरेस्ट प्रिमियर लिग (इपिएल) क्रिकेट प्रतियोगितामा भाग लिएका टिमहरुले धमाधम विदेशी खेलाडी भित्र्याइरहेका छन्। जसमध्ये काठमाडौं किंग्स एलाभेन र ललितपुर पाट्रिओट्सले विदेशी खेलाडीको नाम सार्वजनिक गरेका छन्। चितवन टाइगर्सले शनिबार विदेशी खेलाडी सार्वजनिक गर्दैछ।
सोमबार कीर्तिपुरस्थित त्रिवी मैदानमा हुने उदघाटन खेलमा काठमाडौं र ललितपुरबीच प्रतिस्पर्धा हुनेछ।
इपिएल खेल्ने चर्चित खेलाडी श्रीलंकाका मोहमद फरविज महारुफ हुन्। श्रीलंकाको राष्ट्रिय टिमबाट लामो समय खेलेका अलराउन्डर फरविजलाई काठमाडौंले कप्तानको जिम्मेवारी दिएको छ। सन् २००४ को युवा विश्वकपमा उत्कृष्ट प्रदर्शन गरेपछि उनी राष्ट्रिय टिममा परेका थिए।
सन् २००४ मा जिम्बावे विरुद्ध उनले टेस्ट खेलमा डेब्यु गरेका थिए। सन् २०११ मा अन्तिम पटक टेस्ट खेलेका उनले २२ टेस्ट खेले। सन् २००४ मै जिम्बावे विरुद्धको खेलमै एकदिवसीय खेलमा डेब्यु गरेका फरविजले १ सय ९ एकदिवसीय खेल खेलेका थिए। पछिल्लो पटक सन् २०१६मा उनले इंग्ल्यान्डविरुद्ध एकदिवसीय खेल खेलेका थिए।
टी–२० मा ८ खेलमा मौका पाएका उनको पछिल्लो खेल गत वर्ष इंग्ल्यान्डविरुद्ध नै हो। उनको टेस्टमा ७२ रन तथा एकदिवसीयमा ६९ रन उच्च स्कोर हो। टेस्टमा २५ विकेट लिएका फरविजले एकदिवसीयमा १ सय ३५ विकेट लिएका छन्।
काठमाडौंमा फरविजसँगै श्रीलंकाकै अक्षय फर्नान्डेज र सागर कुमार पनि आबद्ध भएका छन्।
यता ललितपुर पाट्रिओट्सले इन्डियन प्रिमियर लिग (आइपिएल) खेलेका योगेश नागरसहित सुबोध भाटी र जयकिसन अनिलकुमार कोलसावालाई आबद्ध गरेको छ। सन् २००९ मा दिल्ली डेयरडेभिल्समा डेब्यु गरेका योगेशले सन् २०१२ सम्म मौका पाए। २७ वर्षीय योगेशले सन् २०१२ मा चेन्नइविरुद्ध ४३ रन प्रहार गरेका थिए। अलउराउन्ड योगेशसँग दिल्लीको यू–१९ टिम तथा दिल्लीबाट रणजी ट्रफी खेलेको अनुभव छ।
विकेटकिपर ब्याट्सम्यान जयकिशन कोल्सावाला गुजरातका हुन्। उनीसँग पनि पहिलो श्रेणीको क्रिकेट खेलेको अनुभव छ। उत्तरप्रदेशमा जन्मिएका सुवोध भाटी दिल्लीबाट रणजी ट्रफी खेल्ने गर्छन्।
काठमाडौं किंग्स एलाभेन टिम– सोमपाल कामी, नरेस बुढाऐर, सागर पुन, जितेन्द्रकुमार मुखिया, अमित श्रेष्ठ, राजु रिजाल, सुशील कँडेल, सिद्धान्त लोहनी, पुरन विक, बिक्रम भुसाल, अमरसिंह राउटेला, फरविज महारुफ, अक्षय फर्नान्डेज र सागर कुमार ।
ललितपुर पाट्रिओट्स टिम– ज्ञानेन्द्र मल्ल, मेहबुबआलम, कुशल भुर्तेल, सन्दिप लामिछाने, ललित राजवंशी, शंकर राना, पवन शर्राफ, राजवीर सिंह, सन्दिप जोरा, रसिद खान, सोनु तामाङ, योगश नागर, सुबोध भाटी र जयकिसन अनिलकुमार कोल्सावाला।
दुवै टिमले ट्यालेन्ट हन्टमार्फत छनोट गरेका १–१ खेलाडी घोषणा गर्न बाँकी छ।
इपिएलमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज् र चितवन टाइगर्सले प्रतिस्पर्धा गर्नेछन्। प्रत्येक टिमलेअक्सन (बोलकबोल) मार्फत १०–१० खेलाडी भित्र्याएका थिए। टिमहरुले ३–३ जना विदेशी तथा एक स्थानीय खेलाडी ट्यालेन्ट हन्टमार्फत छानिरहेका छन्।
काठमाडौंमा सोमपाल कामी, ललितपुरमा ज्ञानेन्द्र मल्ल, विराटनगरमा पारस खड्का, भैरहवामा शरद भेषावकर, पोखरामा शक्ति गौचन र चितवनमा दीपेन्द्रसिंह ऐरी ‘मार्की’ खेलाडीका रुपमा आबद्ध भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
