काठमाडौं– अन्तर्राष्ट्रिय क्रिकेट काउन्सिल (आइसिसी) ले एभरेस्ट प्रिमियर लिग (इपिएल) लाई अन्तत: मान्यता प्रदान गरेको छ। देशको क्रिकेट संघ निलम्बनमा रहेको अवस्थानमा घरेलु क्रिकेट प्रतियोगिता गर्न आइसिसीको मान्यता हुनु पर्ने नियम अनुरुप आइसिसीले इपिएललाई मान्यता प्रदान गरेको हो।
मान्यतापछि अब राष्ट्रिय तथा अन्तर्राष्ट्रिय क्रिकेटर इपिएलमा सहभागी हुन बाटो खुलेको छ। मान्यता बापत इपिलले २० हजार डलर समेत आइसिसीलाई बुझाउनु पर्ने इपिएलका कार्यकारी निर्देशक आमिर अख्तरले जनाएका छन्। यो मान्यता एक वर्षका लागि मात्र हुनेछ। मान्यता पाएपछि अख्तरले नेपाली क्रिकेटका लागि खुसीको खबर भएको नेपाल लाइभलाई प्रतिक्रिया दिए।
आइसिसीले निलम्बित नेपाल क्रिकेट संघ (क्यान) लाई इपिएलको बारे सोधपुछ गरेको थियो। 'आइसिसीले इपिएलको बारेमा सोधपुछ गरेको थियो,' क्यानका महासचिव अशोकनाथ प्याकुरेलले नेपाल लाइभसँग भने,'हामीले नेपालमा प्रतियोगिता नभएको अवस्थामा इपिएल हुँदा खेलाडीलाई फाइदा पुग्ने जवाफ पठाएका थियौं।'
यसअघि आइसिसीले इपिएल मान्यता प्राप्त प्रतियोगिता नभएकाले कुनै पनि खेलाडीलाई खेल्न अनुमति नभएको नेपाल लाइभले खुलासा गरेको थियो। आइसिसीका सिनियर क्रिकेट अप्रेसन म्यानेजर निगेल मास्कारेन्हासले इपिएल खेल्न कुनै खेलाडीलाई अनुमति नभएको तथा अनुमतिन दिन नसकिने इमेल मार्फत जनाएका थिए।
आइसिसीले २०७३ वैशाखमा नेपाल क्रिकेट संघ (क्यान) लाई निलम्बन गरेको थियो। आन्तरिक विवादका कारण क्यान निलम्बनमा परेपछि आइसिसीले नेपाली क्रिकेटको व्यवस्थापन हेर्दै आइरहेको छ।
आगामी पुस ३ देखि तय भएको इपिएलको खेल तालिका समेत सार्वजनिक भइसकेको छ। लाखौं खर्च गरिसकेको इपिएलले अक्सनबाट खेलाडी छनोट गरेको थियो।
कीर्तिपुरस्थित त्रिभुवन विश्वविद्यालयको मैदानमा हुने इपिएलमा काठमाडौं किंग्स इलेभेन, ललितपुर पाट्रिओट्स, विराटनगर वारियर्स, भैरहवा ग्लाडिएटर, पोखरा राइनोज् र चितवन टाइगर्सले प्रतिस्पर्धा गर्नेछन्।
इपिएलका लागि खेलाडी अक्सन (बोलकबोल) मार्फत प्रत्येक टिमले १०–१० खेलाडी भित्र्याएका थिए। अब प्रत्येक टिमले ३–३ जना विदेशी तथा एक स्थानीय खेलाडी ट्यालेन्ट हन्टमार्फत छान्न बाँकी छ।
काठमाडौंमा सोमपाल कामी, ललितपुरमा ज्ञानेन्द्र मल्ल, विराटनगरमा पारस खड्का, भैरहवामा शरद भेषावकर, पोखरामा शक्ति गौचन र चितवनमा दीपेन्द्रसिंह ऐरी ‘मार्की’ खेलाडीका रुपमा आबद्ध भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772688883.png)
-1772688279.png)
-1764146706.png)
